Yumi Save Mekem Gud Moa mo Stap Gud Moa

Ol dia brata blong mi, hem i wan insperesen blong luk i go long bigfala kongregesen ia blong ami blong Lod we oli olgeta we oli holem prishud. !Yufala i wan strong paoa blong mekem gud! Mifala i lavem yufala Mifala i prea from yufala. Mo mifala i talem tangkyu from yufala.

I no longtaem i pas, tingting blong mi i stap stastap long instraksen we God i givim tru long Profet Josef Smit: “No tokbaot eni narafala samting, be fasin blong sakem sin nomo i go long jeneresen ia.”¹ Toktok ia, oli stap ripitim plante taem truaot long ol skripja.² I pusum wan klia kwestin i kam: “?Be, evriwan i nid blong sakem sin?” Ansa hem i, yes.

Plante pipol i ting se fasin blong sakem sin, i wan panismen—wan samting blong stap longwe long hem, be nomo sapos bigfala samting i hapen. Be filing ia, blong kasem panismen, i kam long Setan. Hem i stap traem blong blokem yumi blong lukluk i go long Jisas Kraes,³ we i stanap wetem ol han blong Hem i open i stap,⁴ i stap hop mo i wantem hilim, fogivim, klinim, mekem i kam strong, klinim evriwan, mo mekem yumi kam tabu.

Toktok ia, fasin blong sakem sin long lanwis Grik long Niu Testeman, hem i metanoeo. Fas tok, meta– i minim “jenis.” Las tok, –noeo i go wetem ol Grik toktok we i minim “maen,” “save,” “spirit,” mo “win blong laef.”⁵

From hemia nao, Jisas i askem yu mo mi, blong “sakem sin;”⁶ Hem i stap invaetem yumi blong jenisim maen blong yumi, save blong yumi, spirit blong yumi—iven wei we yumi pulum win. Hem i stap askem yumi blong jenisim wei we yumi lavem man, tingting, wok, spendem taem blong yumi, tritim waef blong yumi, tijim ol pikinini blong yumi, mo iven, wei blong kea long bodi blong yumi.

Blong save progres, i no gat wan samting we i mekem yumi moa fri, gat moa gud fasin, o i moa impoten bitim blong stap lukluk evri dei long fasin blong sakem sin. Blong sakem sin, i wan wan spesel taem; hem i wan rod blong folem. Hem i ki blong hapines mo pis long maen. Taem yumi yusum wetem fet, fasin blong sakem sin i openem doa blong yumi kasem paoa blong Atonmen blong Jisas Kraes.⁷

Sapos yu stap wok strong blong muv folem rod ia blong kavenan, o yu bin glis o jiamaot long kavenan rod ia, o yu no iven save luk rod ia blong kavenan aot long ples we yu stap long hem naoia, mi plis long yu se yu sakem sin. Eksperiensem paoa we i mekem yu kam strong taem yu sakem sin evri dei—paoa blong mekem mo stap gud moa evri dei.

Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. Yumi jusum blong gro long spirit mo kasem glad—glad long fasin blong pemaot man, tru long Hem.⁸ Taem yumi jusum blong sakem sin, !yumi jusum blong kam moa olsem Jisas Kraes!⁹

Ol brata. Yumi nidim blong mekem gud moa mo stap gud moa from se yumi stap insaed long wan faet. Faet agensem sin i wan rilwan. Enemi i stap dabdabolem ol traehad blong hem blong spolem ol testemoni blong yumi, mo blong stopem wok blong Lod. Hem i stap givim, long ol smol soldia blong hem, ol strong tul blong faet we i stopem yumi blong tekpat long glad ia mo lav ia blong Lod.¹⁰

Fasin blong sakem sin i ki ia blong stap longwe long fasin blong harem nogud we ol trap blong enemi oli stap givim long yumi. Lod i no askem blong yu kam stret evriwan naoia, long taem ia blong progres blong yumi long laef we i no save finis. Be Hem i askem yumi blong kam klin evriwan sloslo. Blong sakem sin evri dei, i rod blong folem blong kam klin evriwan, mo fasin blong stap klin evriwan i tekem paoa i kam. Blong yu stap klin evriwan i mekem yumi kam ol tul wetem paoa long ol han blong God. Fasin blong yumi blong sakem sin—blong stap klin evriwan—bae i givim paoa long yumi blong help blong mekem Isrel i kam tugeta bakegen.

Lod i tijim Josef Smit se, “ol raet blong prishud, oli joen nomo long ol paoa blong heven be oli no save seperet, mo we ol paoa blong heven, oli no save kontrolem o yusum, be nomo folem ol prinsipol blong stret mo gud fasin.”¹¹

Yumi save wanem bae i save mekem yumi yusum moa ol paoa blong heven. Yumi save tu wanem bae blokem progres blong yumi—wanem yumi nid blong stop blong mekem blong kasem moa paoa blong heven. Ol brata. Prea blong lukaotem blong andastanem wanem i stanap long rod blong yu blong sakem sin. Faenemaot wanem i stopem yu blong sakem sin. Mo afta, !yu jenis! !Sakem sin! Evriwan long yumi i save mekem gud moa mo stap gud moa bitim bifo.¹²

I gat ol spesifik wei, we yumi save kam blong kam gud moa. Wan wei, i wei we yumi tritim bodi blong yumi. Mi stanap we mi sapraes long merikel ia, we i bodi blong man. Hem i wan bigfala kriesen, we i nid blong yumi go antap i go from ful tabu paoa blong yumi. Yumi no save progres sapos yumi no gat bodi ia. Taem Hem i givim yumi presen ia, we i bodi ia, God i letem yumi blong tekem wan impoten step evriwan blong kam moa olsem Hem.

Setan i andastanem gud hemia. Hem i harem nogud tumas we, from hem i mekem apostasi long laef bifo, nao hem i no kwalifae nating long spesel janis ia, i mekem hem i stap we hem i jalus oltaem mo i no laekem man nating. From hemia, plante, o ating kolosap evriwan long ol temtesen we hem i putum long rod blong yumi, i mekem yumi stap abiusum bodi blong yumi, o bodi blong ol narawan. From se Setan i no hapi nating from hem i no gat wan bodi, hem i wantem yumi blong no stap hapi from bodi blong yumi.¹³

Bodi blong yu i olsem wan tempol blong yuwan, we oli krietem blong i stap haos blong spirit blong yu we i no save finis.¹⁴ Hamas yu kea long tempol ia i impoten. Naoia, mi askem yufala ol brata: ?Yu yu intres moa blong dresemap mo mekem bodi blong yu blong wol i laekem yu bitim blong mekem God i glad long yu? Ansa blong yu i sendem wan daerek mesej i go long Hem abaot ol filing blong yu long saed bigfala presen ia we Hem i givim long yu. Blong respektem bodi blong yumi, ol brata, mi ting se yumi save mekem i gud moa mo stap gud moa.

Wan nara wei tu we yumi save mekem gud moa mo stap gud moa, i hao yumi ona long ol woman insaed long laef blong yumi, stat wetem ol waef mo ol gel blong yumi, ol mama mo ol sista blong yumi.¹⁵

Sam manis i pas, mi kasem wan leta we i brekem hat blong mi, we i kam long wan dia sista. Hem i raetem: “[Ol gel blong mi mo mi] i filim se mifala i stap long strong kompetisen from hasban mo boe oli givim ful tingting nomo long 24 aoa spot apdeit, vidio gem, stok maket apdeit, mo stap lukluk evri kaen saed mo wajem gem blong evri profesenol spot. I luk olsem se mifala i nomo sidaon long jea long fored wetem hasban mo boe, from se jea long fored naoia i fulap wetem spot mo gem.¹⁶

Ol brata. Fas mo moa impoten diuti, olsem wan we i holem prishud, i blong lavem mo kea long waef blong yu. Kam wan wetem hem. Kam patna blong hem. Mekem i isi blong hem i wantem stap blong yuwan. I no gat intres long laef we i mas kam faswan ova long fasin blong bildimap wan rilesensip we i no save finis wetem hem. I no gat wan samting long Tivi, long mobaelfon o tablet, o wan kompiuta we i moa impoten bitim gudlaef blong waef. Mekem wan lis long hao yu stap spendem taem blong yu mo weaples nao yu stap putum paoa blong yu long hem. Hemia bae i talem se hat blong yu i stap wea. Prea blong mekem hat blong yu i stap long sem tiun blong hat blong waef blong yu. Lukaotem blong givim glad long hem. Askem kaonsel blong hem mo lisin. Wanem bae hem i talem bae i mekem wok blong yu i kam gud moa.

Sapos yu nid blong sakem sin from wei ia we yu bin tritim ol woman we oli stap kolosap moa long yu, stat naoia. Mo tu, tingbaot se hemia i responsabiliti blong yu blong helpem ol woman insaed long laef blong yu blong kasem ol blesing ia we oli risal blong stap laef folem loa blong jastiti. Neva stap olsem risen ia we woman blong yu i no save kasem ol tempol blesing blong hem.

Ol brata. Yumi evriwan i nid blong sakem sin. Yumi nid blong girap mo kamaot long jea, lego kontrola, mo wekap long bigfala spirit slip we yumi stap long hem. Hem i taem blong werem ful klos blong faet blong God, blong yumi save mekem ol moa impoten wok long wol ia. Hem i taem blong “sakem huknaef blong yumi, mo tekem kaekae wetem ful paoa blong tingting, ful maen, mo ful paoa blong [yumi].”¹⁷ Ol paoa blong ivel oli pul strong moa wetem fos tedei bitim bifo. Olsem ol wokman blong Lod, yumi no save stap slip taem faet ia i strong i stap.

Famli blong yu i nidim lidasip mo lav. Kworom blong yu mo olgeta long wod o branj blong yu oli nidim paoa blong yu. Mo evriwan we i mitim yu, i nidim blong save se wan tru disaepol blong Lod i luk mo i mekem wok olsem wanem.

Ol dia brata blong mi. Papa blong yumi i jusumaot yufala blong kam long wol ia long impoten taem ia from hamas yu bin strong long laef bifo. Yufala i ol man ia we oli moa gud, wetem moa strong tingting we i bin kam long wol ia. Setan i save huia yu naoia, mo huia yu long laef bifo, mo i andastanem wok ia we i mas hapen bifo Sevya i kambak bakegen. Afta plante taosen yia blong praktisim rabis waes trik blong hem, enemi i gat eksperiens mo hem i no save stretem hem.

Tangkyu tumas, prishud we yumi holem i strong moa bitim ol rabis plan blong enemi. Mi plis long yufala blong stap ol man, mo ol yang man ia we Lod i nidim yufala blong stap. Mi prea se bae yufala i lukluk nomo evri dei blong sakem sin, mekem se i pat fulwan long laef blong yufala blong yufala i save yusum prishud ia wetem moa strongfala paoa bitim bifo. Hemia i wan wei ia nomo we bae yufala i kipim yufala i stap sef mo kipim famli blong yufala i sef long saed blong spirit long ol dei blong jalenj we oli stap long fored.

Lod i nidim ol man we oli no selfis, we oli putum gudlaef blong ol narawan i kam faswan long hemia blong olgetawan. Hem i nidim ol man we oli wok wetem tingting blong harem voes blong Spirit i klia gud. Hem i nidim ol man blong kavenan, we oli kipim ol kavenan blong olgeta wetem strong mo tru fasin. Hem i nidim ol man we oli putum strong tingting blong kipim olgeta oli klin gud long saed blong seks—ol man we oli klin inaf we Hem i save singaotem long eni taem blong givim ol blesing wetem ol hat we oli klin gud, ol maen we oli klin, mo ol han we oli glad blong givim blesing. Lod i nidim ol man we oli wantem tumas blong sakem sin—ol man wetem strong tingting blong givim seves, mo stap insaed long ami blong God we oli ol man we oli klin inaf wetem prishud.

Mi blesem yufala blong kam ol kaen man ia. Mi blesem yufala wetem strong paoa long tingting blong sakem sin evri dei mo blong lanem olsem wanem blong yusum ful prishud paoa. Mi blesem yufala blong pasem lav blong Sevya i go long waef mo ol pikinini blong yufala mo long evriwan we i save yufala. Mi blesem yufala blong mekem gud moa mo blong stap gud moa. Mo mi blesem yufala se, taem yufala i stap traehad olsem, bae yufala i eksperiensem ol merikel insaed long laef blong yufala.

Yumi joen long wok blong God we I Gat Olgeta Paoa. Jisas Hem i Kraes. Yumi, yumi ol wokman blong Tufala. Mi testifae long hemia, long nem blong Jisas Kraes, amen.