Milton Camargo
Fas Kaonsela long Sandei Skul Jeneral Presidensi
I tekem kolosap wan yia blong Helio da Rocha Camargo, wan foma minista long wan nara jos, blong disaed blong kam baptaes insaed long Jos blong Jisas Kraes blong Ol Lata-dei Sent. I no longtaem afta, waef blong hem, Nair Belmira da Rocha Camargo i disaed blong folem eksampol blong hasban blong hem, mo blong kasem baptaes tu.
Long tetaem ia, Nair i bin gat bel wetem pikinini boe, we bae oli singaotem Milton. Yunaet desisen blong Camargo famli blong joenem Jos, bae i blesem famli blong olgeta blong plante fiuja jeneresen.
Brata Milton da Rocha Camargo i bon long namba 10 Maj 1958, long Sao Paolo, Brasil. Brata Camargo, we oli sastenem long 6 Epril 2019, olsem Fas Kaonsela long Sandei Skul Jeneral Presidensi, i talem se hem i gat blesing ia blong groap olsem wan memba blong Jos.
Hem i talem: “Lod i save yumi wanwan. “Ol plan blong Hem long wanwan long yumi, oli bigwan bitim we yumi save tingting long hem.”
Brata Camargo i mitim waef blong hem, Patricia, taem we papa blong hem i bin prisaed ova long Brasil Rio de Janero Misin, long ol let 1970. Kapol ia, i mared long namba 4 Jenuware 1980, kolosap wan yia afta we Brata Camargo i kambak hom afta we hem i givim seves olsem wan fultaem misinari long Potugal Lisbon Misin. Tufala i gat tri pikinini.
Long ol eli yia blong mared blong tufala, famli Camargo i bin stap long Rio de Janero, mo longwe, Brata Camargo i finisim wan digri long sivil enjinering long Instituto Militar de Engenharia. Afta long hemia, hem i kasem wan masta long bisnis administresen long Brigham Yang Yunivesiti.
Truaot long wok rod blong hem, Brata Camargo i bin dediketem taem mo paoa blong hem blong tijim ol narawan. Hem i bin wok long samfala yunivesiti, olsem Laureate Brazil Online Education, Universidad Tecnológica de México, mo laswan long BYU-Pathway Worldwide olsem vaes presiden blong kurikulom ia.
Brata Camargo i bin stap olsem wan Eria Seventi, presiden blong Brasil Porto Alegre Saot Misin (1997-2000), kaonsela long presidensi blong Brasil Misinari Trening Senta (2002-5), bisop, stek misin presiden, mo presiden blong kworom blong ol elda.