Rere Finis blong Kasem Evri Samting we Mi Nidim

Elda Craig C. Christensen mo mi, i bin kompanion, i no longtaem i pas, long wan prishud lidasip konfrens, mo hem i yusum tu simpol kwestin nomo blong tokbaot bigwan prinsipol ia blong kam wan hom we i senta mo Jos i sapotem. Hem i givim tingting se, taem yumi gobak hom afta ol Jos miting long Sandei mo askem: “?Yu lanem wanem abaot Sevya mo gospel blong Hem tedei long Jos?”, nao yumi mas askem long taem blong ol Jos miting blong yumi: “?Wanem nao yu bin lanem abaot Sevya mo gospel blong Hem long wik ia, insaed long hom blong yu?” Stret fasin blong kipim Sabat dei i tabu, niufala kurikulom, mo jenis long taemtebol blong ol miting, evriwan ia i helpem yumi blong lanem gospel, tugeta insaed long hom blong yumi mo long jos.

Wanwan memba blong Jos blong Jisas Kraes blong Ol Lata-dei Sent i gat wanwan responsabiliti ia blong lanem, mo laef folem ol tijing blong Lod mo blong kasem, tru long stret atoriti, ol odinens blong fasin blong sevem man mo kam olsem wan god. Yumi no sapos blong ting se Jos, olsem wan oganaesesen, bae i tijim o talem long yumi evri samting ia we yumi nidim blong save mo mekem, blong kam ol strong disaepol mo blong yumi stap strong wetem strong tingting kasem en.² Be, responsabiliti blong yumi wanwan i blong lanem wanem yumi sapos blong lanem, blong laef olsem we yumi save finis wei blong laef, mo blong kam huia Masta i wantem yumi blong kam. Mo ol hom blong yumi oli stret ples blong lan, laef, mo kam man o woman ia.

Olsem wan pikinini, Josef Smit i bin lanem abaot God aot long famli blong hem. Ol traehad blong hem blong faenemaot tingting blong God nao i mekem se hem i go lukaotem trutok long medel blong ol defren Kristin grup, blong i tingting hevi long ol skripja, mo blong prea wetem tru hat long God. Taem yang Josef Smit i gobak long hom blong hem afta we hem i go long Tabu Bus, stret afta we Papa mo Pikinini i kamkamaot long hem, hem i toktok faswan long mama blong hem. Taem “[hem] i stap lei long ples blong mekem faea, mama i askem se wanem i hapen long [hem]. [Josef i ansa: ‘No wari, evri samting i oraet—mi oraet nomo.’ Afta [Hem] i talem long mama blong [hem]: ‘Mi kam blong save blong miwan.’”³ Eksperiens blong Josef i givim wan paten blong lan we i gat paoa, we yumi evriwan i mas mekem folem. Yumi tu, yumi nid blong kam blong save blong yumiwan.

Stamba tingting we i kavremap ful plan we Papa long Heven i gat long ol pikinini blong Hem, i blong kam moa olsem Hem. Folem hemia, Hem i givim yumi ol stamba janis blong save gro mo progres. Komitmen blong yumi, blong lan mo laef folem trutok, i stap kam moa impoten long wan wol ia we “i stap muvmuv” tumas⁴ mo i stap konfius mo kam rabis moa. Yumi no save ting se, blong kam nomo long ol miting blong Jos mo tekpat long ol program, bae i mekem se yumi kasem evri samting blong kam antap mo kasem evri proteksen long saed blong spirit we bae i mekem se yumi save stanap strong long dei blong faet agensem Setan.⁵

“Ol papa mo mama oli gat tabu wok blong lukaotem ol pikinini blong olgeta wetem lav mo fasin blong stap stret oltaem.”⁶ Ol lida, tija blong Jos mo ol aktiviti we oli gat insperesen, oli helpem ol hadwok blong wanwan mo famli blong gro long saed blong spirit. Mo nomata yumi evriwan i nid blong gohed fored long kavenan rod ia, bigbigfala stamba responsabiliti ia blong developem paoa long spirit mo strong paoa long bodi, i stap long solda blong wanwan long yumi.

Tingbaot hao nao Nifae, pikinini blong profet Lihae, i bin wantem blong luk, harem, mo save blong hemwan, tru long paoa blong Tabu Spirit, ol samting ia we papa blong hem i bin lanem long visen blong tri blong laef. I klia se Nifae i bin nidim mo i kasem blesing long yang taem blong hem tru long eksampol mo ol tijing blong “ol gudfala papa mo mama” blong hem.⁷ Be yet, olsem Josef Smit, hem i bin wantem blong lanem mo save samting hemwan.

Sapos evri samting we yufala evriwan o mi, i save abaot Jisas Kraes mo gospel blong Hem we i kambak, i wanem we ol narawan oli tijim o talem long yumi, nao fandesen blong testemoni blong yumi abaot Hem mo glori wok blong Hem long las dei, i stanap long sanbij nomo.⁸ Yumi no save dipen nomo, o tekem gospel laet mo save long ol nara man—iven olgeta we yumi lavem mo trastem.

I impoten blong luk nao se, Profet Josef Smit i bin tijim se wanwan Lata-dei Sent i nidim blong andastanem hemwan “ol bigfala plan mo stamba tingting blong God long wol ia blong yumi we i stap kam yet.”⁹

“Iven sapos yumi save ridim mo andastanem evri samting we oli bin raetem stat long ol dei blong Adam, long saed blong rilesen blong man wetem God mo ol enjel long wan fiuja taem, bae yumi save smol nomo abaot hemia. Blong stap ridim eksperiens blong ol narawan, o revelesen we God i givim long olgeta bae i neva givim yumi wan ful lukluk abaot huia yumi mo tru rilesen blong yumi wetem God. Save abaot ol samting ia, yumi save kasem nomo tru long eksperiens, tru long ol odinens blong God we Hem i bin putum from stamba tingting ia.”¹⁰

Blong givim rod from bigfala spirit stamba tingting ia blong wanwan man, woman, mo famli, i wan long ol stamba risen blong gat ol program mo aktiviti blong Jos blong Jisas Kraes blong Ol Lata-dei Sent oli lukluk moa long hom olsem senta we Jos i sapotem, long stret taem ia we God i stap mekem evri wok blong Hem oli kamtru.

Bae mi talem sot samfala besik mining blong stap lanem gospel we i lukluk moa blong hapen long hom senta mo Jos i sapotem.

Stamba misinari trening senta, i stap insaed long hom blong yumi; seken misinari trening senta, i stap long Provo, Manila, Meksiko Siti, mo long ol nara ples. Klas blong Sandei Skul we i givim moa tijing, i mas stadi blong yumiwan mo wetem famli insaed long ol haos we yumi stap long ol; ol seken Sandei Skul klas, oli stap holem insaed long ol mitinghaos blong yumi.

Ol famli histri senta, naoia oli stap insaed long hom blong yumi. Sam moa sapot long wok blong lukaotem famli histri, i stap tu insaed long ol mitinghaos blong yumi.

Stamba klas blong rere blong go long tempol, i hapen insaed long hom blong yumi; ol seken tempol klas blong rere blong go long tempol, oli save hapen tu wanwan taem long ol mitinghaos blong yumi.

Blong mekem hom blong yumi i stap olsem sef ples, we yumi save “stanap long ol tabu ples”¹¹ i wan stamba nid long ol las dei ia. Mo fasin blong lanem samting long hom olsem senta we Jos i sapotem, i impoten i stap blong gat paoa long spirit mo gat proteksen tedei, mo i gat moa nid from long fiuja.

Plis, tingting long wei we prinsipol ia blong gat hom senta we Jos i sapotem, i go long fasin blong yumi wanwan i rere mo i stap klin inaf blong kasem ol tabu odinens mo kavenan insaed long haos blong Lod.

I tru, wok blong rere blong go long tempol, i hapen gud moa insaed long hom blong yumi. Be plante memba blong Jos oli no save gud wanem i stret blong talem mo no talem long saed blong ol tempol eksperiens, aotsaed long tempol.

Presiden Esra Taf Benson i talem from wanem yumi stap gat tu tingting olsem:

“Tempol i wan tabu ples, mo ol odinens insaed long tempol oli tabu tumas. From se oli tabu tumas, samtaem yumi fraet blong talem eni samting abaot tempol long ol pikinini mo ol apupikinini blong yumi.

“From hemia, plante oli no developem wan ril filing blong wantem go long tempol, o taem oli go longwe, oli mekem be oli no save tumas hao blong mekem olgeta oli rere from ol wok we bae oli mas mekem mo ol kavenan we bae oli tekem insaed.

“Mi biliv se, blong andastanem gud, bae i mekem ol yut blong yumi oli rere bigwan from tempol … mo bae i givim wan filing insaed long olgeta, blong lukaotem ol prishud blesing blong olgeta, semmak olsem Ebraham i bin lukaotem blong hemwan.”¹²

Tufala besik gaedlaen ia i save helpem yumi blong kasem moa andastaning ia we Presiden Benson i tokbaot.

Gaedlaen namba 1 From se yumi lavem Lod, oltaem yumi mas tokbaot tabu haos blong Hem wetem respek. Yumi no mas talemaot o tokbaot ol spesel simbol o saen we i go wetem ol kavenan we yumi kasem insaed long ol tabu tempol seremoni. Mo tu, yumi no mas toktok raon long tabu infomesen we yumi mekem spesel promes insaed long tempol, se bae yumi no talemaot.

Gaedlaen namba 2 Tempol hem i haos blong Lod. Evri samting insaed long tempol i poenem yumi i go long Sevya, Jisas Kraes. Yumi save toktok raon long ol besik stamba tingting, mo doktrin mo ol prinsipol we i go wetem ol tempol odinens mo kavenan.

Presiden Howard W. Hunter i givim kaonsel ia: “Bae yumi serem, wetem ol pikinini blong yumi, ol filing long spirit we yumi bin kasem insaed long tempol. Mo bae yumi save tijim gud moa, wetem moa gud filing, ol samting ia we i stret blong talem abaot ol stamba tingting blong haos blong Lod.”¹³

Folfolem ol jeneresen i kam stat long Profet Josef Smit i go kasem Presiden Russel M. Nelson, doktrin blong stamba tingting blong ol odinens mo kavenan blong tempol, ol lida blong Jos oli bin tijim plante.¹⁴ Wan rij tank blong ol risos oli stap, long buk, long odio, long vidio, mo ol narawan bakegen, blong helpem yumi blong lan abaot ol odinens blong stap rere, ol endaomen, ol mared mo ol nara siling odinens.¹⁵ Infomesen i stap tu abaot fasin blong folem Sevya tru long fasin blong stap kasem mo stap ona long ol kavenan blong kipim loa blong stap obei, loa blong sakrifaes, loa blong gospel, loa blong jastiti, mo loa blong konsekresen.¹⁶ Evri memba blong Jos oli mas kam blong save gud ol gudfala tul we oli stap long temples.ChurchofJesusChrist.org.

Pikja

temples.churchofjesuschrist.org

Presiden Russel M. Nelson i tokbaot bigwan se impoten blong gat balens bitwin ol tabu seremoni blong tempol mo gudfala infomesen abaot ol tempol we Jos i pablisim; se oli mas stret evriwan, oli stret blong talem mo pablik i save ridim. “Mi rekomendem se ol memba oli ridim ful toktok insaed long Baebol Diksonari, abaot ol samting blong tempol, olsem ‘Anoentem,’ ‘Kavenan,;’ ‘Sakrifaes,’ mo ‘Tempol.’ Wan i save ridim tu Eksodas, ol japta 26 kasem 29, mo Levitikas, japta 8. OlTesteman, mo tu ol buk blong Moses mo Ebraham insaed long Perel we i Gat Bigfala Praes, oli poenemaot bigwan se tempol wok i bin hapen longtaem bifo, mo stamba tingting blong ol odinens ia.”¹⁷

Pikja

Tabu Tempol Klos vidio

So traem tingting se, boe o gel blong yu i askem: “Wan long skul i talem se oli serem ol defren kaen klos long tempol. ?I tru?” I gat wan sot vidio i stap long temples.ChurchofJesusChrist.org we nem blong hem i “Sacred Temple Clothing.” I wan gudfala risos blong eksplenem olsem wanem, bifo, ol man mo ol woman oli bin laekem tabu miusik, ol defren wei blong prea, ol saen blong relijin long klos, ol aksen, mo ol seremoni blong talemaot ol filing insaed we oli givim long God. From hemia, Jos i sapotem fasin blong rere long hom senta, blong kasem ol glori blesing blong tempol tru long besik tijing mo ol gudfala risos, olsem vidio ia. I gat plante gudfala infomesen we yufala i save yusum.¹⁸

Taem yumi stap traehad, wetem Spirit blong Lod we i no flas,¹⁹ bambae yumi kasem blesing blong andastanem mo kasem, insaed long hom blong yumi, balens ia we i nid, blong save wanem i stret mo wanem i no stret blong toktok raon long hem abaot ol tabu tempol odinens mo kavenan.

MI ting se sam long yufala i stap askem yufalawan finis sapos yufala i save lanem gospel insaed long hom senta we Jos i sapotem. Maet yuwan nomo i memba blong Jos long hom, o yu no gat sapot long waef o hasban, o yu singgel papa o mama, o yu stap yuwan olsem wan singgel o divos Lata-dei Sent, mo yu gat ol kwestin abaot wei we ol prinsipol ia oli blong yu yusum. Maet yutufala i wan hasban mo waef we i lukluk yutufala mo askem: “?Bae yumitu save mekem?”

!Yes, yu save mekem! Mi promes se ol blesing we i gat paoa bae oli kam bigwan mo bae oli kamaot klia long laef blong yu. Ol doa bae oli open. Laet bae i saen. Paoa blong yu blong mekem samting i kam antap blong save strong mo gat longfala tingting blong gogohed.

Mi witnes se ol blesing we oli givim riwod bae oli kam taem yumi stap traehad blong mekem wanwan responsabiliti blong yumi blong lanem mo lavem gospel we i kambak blong Jisas Kraes. Yumi rili “save rere blong kasem evri samting we yumi nidim.”²⁰ Mi promes mo testifae olsem long tabu nem blong Lod Jisas Kraes, amen.