Stap Rere from Kambak blong Lod

Long tu wik taem, bae yumi selebretem Ista. Laef Bakegen long Ded i konfemem se Jisas Kraes i hae mo God Papa, Hem i ril. Tingting blong yumi i go long Sevya, mo yumi tingting hevi long laef blong hem we i no gat wan i semmak, mo bigfala paoa blong bigfala sakrifaes blong Hem we i pem praes from sin.¹ Mi hop se yumi stap tingting tu long kambak blong Hem we i stap yet, taem bae Hem i rul olsem King blong Ol King, mo Lod blong Ol Lod.²

Sam taem i pas long Buenos Aeres, Ajentina, mi bin tekpat long wan konfrens wetem ol lida we oli kamaot long plante defren relijin. Lav blong olgeta long ol nara pipol blong olgeta, yu no save mistek long hem. Oli wantem blong helpem olgeta we oli safa, mo helpem ol pipol oli kamaot long fasin we oli yusum olgeta mo pua laef. Mi tingtingbak long ol hamas yumaniterian wok blong Jos ia, wetem ol projek we oli mekem wetem sam nara grup blong fet we oli stap long konfrens ia. Mi filim dip tangkyu from bigfala hat blong ol memba blong Jos blong Jisas Kraes blong Ol Lata-dei Sent we i mekem se ol kaen seves olsem hemia blong Kraes, i posibol.

Long tetaem ia, Tabu Spirit i bin konfemem tufala samting long mi: Faswan, wok blong givhan long ol nid blong laef long wol, i wan mas, mo i mas gohed. Sekenwan, mi no ting long hem, be i gat paoa mo i klia. Hem i hemia: i bitim seves we i no selfis; hem i impoten olgeta, blong mekem wol i rere from Seken Kaming blong Lod Jisas Kraes.

Taem bae Hem i kam, fasin blong fos o yusum man, mo fasin blong no gat jastis bae i go daon mo bae i stop:

“Wael dog tu bae i stap wetem smol sipsip, mo lepad bae i ledaon wetem wan yang nanigot, mo yang buluk mo yang laeon mo buluk we i fatfat oli stap tugeta; mo wan smol pikinini bae i lidim olgeta. …

“Bae oli no mekem olgeta oli harem i soa o prapa spolem gud olgeta bakegen long evri tabu bigfala hil blong mi, from wol ia bae i fulap wetem save blong Lod, semmak olsem ol wota oli kavremap solwota.”³

Pua fasin mo fasin blong stap safa bae i no go daon nomo be bae i lus:

“Bambae oli no moa hanggri bakegen, oli no moa tosta bakegen. Bambae san i no moa bonem olgeta bakegen. …

“from we Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.”⁴

Iven sobodi mo harem nogud blong ded ia, bae i nomo gat:

“Long taem ia, bae wan bebi i no save ded kasem nomo we hem i olfala; mo laef blong hem bae i longwan semmak olsem laef blong wan tri;

“Mo taem hem i ded, bae hem i no slip; bae hem i no slip insaed long graon, be bae i jenis i kam niu i kwik olsem taem man i sarem wan ae, mo bae i go antap long heven, mo ples blong spel blong hem bae i gat glori.”⁵

So, yes, bae yumi mekem evri samting blong helpem man we i safa mo harem nogud naoia, mo bae yumi givim taem blong yumi mo wok strong moa blong mekem ol wok blong rere from dei ia, taem we sobodi mo ivel, tugeta bae i stop, taem we, “Kraes Hemwan bambae i rul wetem paoa long wol ia; mo, wol ia bambae i kam niufala mo bambae i kasem glori blong hem olsem paradaes⁶ Bae i wan dei blong pemaot man mo jajmen. Foma Angliken Bisop blong Durham, Dokta N. T. Wright, i bin tokbaot mining blong Atonmen blong Kraes, Laef Bakegen long Ded, mo Jajmen blong winim fasin blong no gat jastis mo putum evri samting i raet bakegen.

Hem i talem: “God i putum wan dei i stap, we bae Hem i mekem se jajmen i kam long wol tru long wan man we Hem i bin jusum—mo hemia, Hem i talemaot stret hemia long evriwan taem Hem i mekem man ia i girap long ded. Ol tru samting abaot Jisas blong Nasaret, mo speseli abaot laef bakegen long ded, oli fandesen blong stret save ia se wol i no blong nating. Long en, i no ol trabol nomo; se taem yumi mekem jastis naoia, yumi no stap westem taem, blong traem sapotem wan bilding we bae i foldaon long en, o blong fiksim wan trak we long en bae oli sakem. Taem we God i mekem Jisas i girap long ded, hem i smol taem ia insaed long bigfala aksen blong jajmen, we i bin stap insaed long wan sel, olsem wan sid, sid ia blong bigfala hop. God i talemaot, long wan wei we i gat bigfala paoa we i bitim tingting blong yumi, se Jisas blong Nasaret, Hem nao rili i Mesaea. … Long bigfala taem blong jik we i hapen long histri, Jisas Hemwan i gotru long wan jajmen we i rabis mo i no stret, from Hem i kam long wan ples we i simbol mo i pulum tugeta evri rabis mo nogud fasin blong histri, blong Hem i tekem ol trabol ia, ol tudak ia, ol rabis fasin ia, nogud jastis ia, long Hemwan, mo blong yusumaot evri paoa.”⁷

Taem we mi stap long konfrens long Buenos Aeres, we mi tokbaot finis, Spirit i bin talem klia long mi finis se Jos blong Jisas Kraes blong Ol Lata-dei Sent i wan ia nomo we i gat paoa mo i kasem wok blong mekem ol wok blong rere blong Seken Kaming blong Lod; i tru, Jos ia i kambak from stamba tingting ia nao. ?I gat eni ples we yu save faenem wan pipol we oli akseptem se taem tedei, i profesi taem ia blong “dispensesen blong taem blong evri wok blong God i kamtru” we God i putum we bae “[Hem i] putum evri samting i kam wan?⁸ Sapos yu no faenem, long ples ia, wan komuniti we i wantem mekem wanem i nid blong mekem blong olgeta we oli stap laef mo olgeta we oli ded finis, blong rere from dei ia, sapos yu no faenem long ples ia, wan oganaesesen we i glad blong komitim hem blong putum taem mo mane from kam tugeta ia, mo rere wan pipol blong kavenan blong risivim Lod, nao bae yu no faenem hemia long eni nara ples.

Taem Hem i stap toktok long Jos long 1831, Lod i talemaot:

“Ol ki blong kingdom blong God, Lod i givim wetem tras long man we i stap long wol, mo stat long ples ia, bambae gospel bae i rol i go long evri ples. …

“Prea long Lod, se bae kingdom blong hem bae i go evri ples long wol, blong ol man we oli stap laef long hem oli save kasem kingdom ia, mo oli mekem olgeta oli rere from ol dei we oli stap kam, we Pikinini blong Man bae i aot long heven i kam daon, wetem klos blong glori blong hem we i saen gud, blong mitim kingdom blong God we i stanap long wol ia.”⁹

?Wanem nao yumi save mekem blong rere naoia from dei ia? Yumi save mekem yumi rere olsem wan pipol; yumi save putum tugeta ol kavenan pipol blong Lod; mo yumi save help blong karem promes ia blong fasin blong sevem man “we God i bin mekem long ol papa,” we oli ol bubu blong yumi.¹⁰ Evri samting ia i mas hapen, i bigwan, bifo Lod i kam bakegen.

Wanem i impoten mo i wan mas, blong Lod i kambak, i we, i mas gat, long wol, wan pipol we i rere blong akseptem Hem long taem we bae Hem i kam. Hem i talem se olgeta we bae oli stap long wol ia long dei ia, “olgeta we oli daon go kasem olgeta we oli hae, … bae oli fulap wetem save abaot Lod, mo bambae oli luk long ae blong olgeta, mo bambae oli leftemap voes blong olgeta, mo wetem voes, tugeta bae oli singsing long niufala singsing ia, mo talem: ‘Lod i tekem Saeon bakegen i kambak. … Lod i karem evri samting i kam wanples, oli kam wan. Lod i tekem Saeon i kamdaon aot long heven. Lod i tekem Saeon aot long wol, i go antap long heven.”¹¹

Long taem bifo. God i tekem stret mo gud siti blong Saeon i go long Hemwan.¹² Be long nara saed, long ol las dei, wan niu Saeon bae i risivim Lod taem Hem i kambak.¹³ Saeon i olgeta we hat blong olgeta i klin, wan pipol we oli gat wan hat mo wan tingting, we oli stap laef tugeta long stret mo gud laef, mo i no gat wan we i pua long medel blong olgeta.¹⁴ Profet Josef Smit i talem: “Yumi sapos blong gat wok blong bildimap Saeon, olsem bigfala stamba gol blong yumi.”¹⁵ Yumi bildimap Saeon insaed long ol hom, ol wod, ol branj, mo ol stek blong yumi, tru long yuniti, fasin olsem hemia blong God, mo tru long jareti.¹⁶

Yumi mas luksave se wok ia blong bildimap Saeon i stap hapen long wan taem we ol samting oli muvmuv—“wan dei blong bigfala nogud kros, wan dei we faea i bonem daon ol samting, wan dei blong prapa bigfala nogud taem, blong krae, blong harem sore from ded, mo blong kraekrae; mo olsem wan waelwin, bae hem i kam long ful fes blong wol, Lod i talem.”¹⁷ Mo long wei ia nao, kam tugeta insaed long ol stek oli “blong oli save difendem olgeta, mo blong oli stap long wan sef ples long taem blong strong win, mo long taem blong bigfala nogud kros, hemia long taem we bae mi kapsaetem ful paoa blong hem long ful wol.”¹⁸

Semmak olsem long ol taem bifo, yumi stap “mit tugeta fulap, blong livim kakae mo blong prea, mo blong toktok wan wetem narawan long saed blong gudfala laef blong ol sol blong [yumi]. Mo … blong tekem mo kakae bred mo dring waen, blong tingbaot Lod Jisas.”¹⁹ Olsem we Presiden Russell M. Nelson i bin eksplenem long jeneral konfrens long las Oktoba: “Stamba tingting blong Jos we i bin stap longtaem finis i kam, i blong helpem evri memba blong kam antap long fet blong olgeta long Lod Jisas Kraes, mo long Atonmen blong Hem; blong helpem olgeta blong mekem mo kipim ol kavenan we oli mekem wetem God, mo blong mekem ol famli oli kam strong moa, mo silim olgeta.”²⁰ Folem hemia, hem i stap talemaot bigwan mining blong ol tempol kavenan, mekem Sabat i tabu, lafet evri dei long gospel long hom we i senta, wetem sapot blong wan kurikulom stadi long Jos. Yumi wantem blong save abaot Lod, mo yumi wantem save Lod.²¹

Stamba hadwok blong bildimap Saeon, i blong pulum tugeta ol kavenan pipol blong Lod.²² “Mifala i biliv we Isrel bambae i mas kambak tugeta mo Olgeta Ten Traeb bambae oli kambak bakegen.”²³ Evriwan we bae i sakem sin, biliv long Kraes, mo kasem baptaes, oli ol kavenan pipol blong Hem.²⁴ Lod Hemwan i bin talem profesi se, bifo Hem i kambak, gospel ia, bae oli prijim long ful wol,²⁵ “blong karembak ol pipol blong mi, we oli blong haos blong Isrel,”²⁶ mo afta bambae en blong wol i kam.”²⁷ Profesi blong Jeremaea i stap kamtru:

“I gat dei i stap kam we ol man bambae oli nomo talem se, ‘Hae God i laef, i stap we i stap, mo hem i God we i tekemaot ol man blong hem long Ijip bifo;

“Hae God i laef, i stap we i stap, mo hem i God we i tekemaot ol man blong hem long kantri ya long Not mo long ol narafala kantri we hem i mekem olgeta oli go stap olbaot long hem, nao i tekem olgeta oli kambak long kantri, … we mi bin givim long ol bubu blong olgeta bifo.”²⁸

Presiden Nelson i ripripitim bigwan se, “kam tugeta ia [blong Isrel], i samting we i moa impoten we i stap tekem ples long wol tedei. I no gat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem. Mo sapos yu jusum, … yu save tekpat bigwan long hem.”²⁹ Ol Lata-dei Sent, oltaem oli ol misinari pipol. Plante handred taosen oli bin ansa long ol misin koling stat long stat blong Restoresen; ol ten blong ol taosen oli stap givim seves naoia. Mo, olsem we Elda Quentin L. Cook i jes tijim, evriwan long yumi, yumi save tekpat long ol simpol mo nomol wei, wetem lav, blong invaetem ol narawan blong joenem yumi long jos, blong kam long hom blong yumi, mo kam pat blong sekol blong yumi. Taem oli pablisim Buk blong Momon, i signol ia nao se wok blong kam tugeta i stat.³⁰ Buk blong Momon hemwan i tul blong wok blong pulum tugeta mo i tul blong jenisim laef.

Mo tu, wan pat we i impoten tumas blong rere from Seken Kaming, hem i bigfala wok blong sevem ol bubu blong yumi. Lod i promes blong sendem Elaeja, we i profet, bifo Seken Kaming i kam, “bigfala dei blong Lod we man bae i fraet long hem,”³¹ blong “soemaot Prishud,” mo “planem insaed long hat blong ol pikinini, ol promes we Lod i bin mekem long ol papa.”³² Elaeja i bin kam olsem promes i talem. Deit hem i long 3 Epril 1836; ples hem i Ketlan Tempol. Long ples ia, mo taem ia, hem i bin givim prishud ia we oli promesem, ol ki blong pemaot ol dedman, mo silim ol hasban, waef mo famli truaot evri jeneresen blong taem mo truaot evri taem we i no save finis.³³ Sapos i no bin gat hemia, stamba tingting blong kriesen, bae i no save hapen, mo long wei ia, wol ia bae i gat panismen mo bae “i go lus evriwan.”³⁴

Long yut divosen we i kam fastaem long dedikesen long Rom Itali Tempol, ol handred blong ol yang man mo woman we oli go, oli bin soem long Presiden Nelson, ol kad we oli bin rere wetem nem blong ol bubu blong olgeta. Oli bin rere blong go insaed long tempol blong mekem ol baptaes long bihaf blong ol ded bubu blong olgeta, stret afta we bae i open. Hem i bin wan taem blong tangkyu, be yet, i wan eksampol blong muvum hariap wok ia blong stanemap Saeon blong ol jeneresen we oli go finis.

Taem yumi stap traem blong wok strong moa blong bildimap Saeon, wetem pat blong yumi blong pulum tugeta olgeta we Lod i jusum olgeta, mo wok blong pemaot ol dedman, yumi mas stop smol taem blong tingbaot se wok ia, i blong Lod mo Hem nao i stap mekem wok ia. Hem i Lod blong plantesen, mo yumi nao yumi ol wokman blong Hem. Hem i askem yumi blong wok long plantesen wetem ful paoa blong yumi wan “las taem” mo Hem i stap wok wetem yumi.³⁵ Ating bae i moa stret blong talem se Hem i letem yumi wok wetem Hem. Olsem we Pol i bin talem: “Mi mi planem kakae long garen, nao Apolos i [wotarem] garen ya, be God nomo i stap mekem kakae ya i gru gud.”³⁶ Hem nao bae i mekem wok blong Hem i muv hariap moa long stret taem blong Hem.³⁷ Hem i yusum ol hadwok blong yumi we i no stret gud, “ol smol wei blong yumi” blong mekem plante bigfala samting oli hapen.³⁸

Bigfala mo las dispensesen ia i stap bildimap hem sloslo kasem strong taem blong hem—Saeon long wol, we bae i joen wetem Saeon long heven long taem we Sevya i kambak wetem glori. Jos blong Jisas Kraes, God i givim wok ia long hem blong rere—mo hem i stap mekem wol i rere—from dei ia. Mekem se, long Ista ia, bae yumi selebretem Laef Bakegen long Ded blong Jisas Kraes, mo evri samting we hem i stap anaonsem: Kambak blong Hem blong wan taosen yia blong pis, wan stret mo gud jajmen mo wan stret jastis blong evriwan, wan bodi we i nomo save ded blong evriwan we i bin laef long wol ia, mo promes ia blong laef we i no save finis. Laef Bakegen long Ded i stamba save ia, se evri samting, bae oli kambak stret. Bae yumi go bildimap Saeon blong mekem dei ia i kam hariap. Long nem blong Jisas Kraes, amen.