Stap Kakae Gud long Ol Toktok blong Kraes

Taem mi yang, mi bin ting se blong stap kakae gud hem i blong kakae wan bigfala kaekae nomo wetem raes, susi raes, mo soyo sos. Naoia nao mi save se blong stap kakae gud hem i blong stap laekem wan kakae we i tes naes. Hem i wan eksperiens blong glad, blong stap fidim bodi, blong selebret, blong soem lav long ol famli mo olgeta we yumi lavem, blong stap talem tangkyu blong yumi long God, mo blong stap bildim wan rilesensip taem yumi stap laekem ol fulap kaekae we i tes naes tumas. Mi biliv se taem yumi kaekae gud long toktok blong Kraes, yumi mas stap tingting i go long semmak kaen eksperiens ia. Blong stap kaekae gud long ol skripja i no blong stap ridim nomo. Hem i mas karem tru glad i kam long yumi mo bildim rilesensip ia wetem Sevya.

Hemia oli tijim i klia long Buk blong Momon. Tingting i gobak long drim blong Lihae we hem i bin luk wan tri “we frut blong hem i bin gud tumas blong i save mekem man i hapi.” Frut ia i ripresentem lav blong God, mo taem Lihae i testem frut, “frut ia i … swit bitim evri frut we [hem i] bin testem bifo.” Hem i “fulumap sol blong [hem] wetem bigfala glad we i bigwan tumas” mo hem i wan samting we hem i wantem blong serem wetem famli blong hem (1 Nifae 8:10–12).

Taem yumi kaekae gud, bae yumi faenem se hamas kaekae o kaen kaekae we yumi gat, hem i nomata sapos hat blong yumi i fulap long tangkyu. Famli blong Lihae i laef long mit we i no tan long medel bus, be Nifae i tokbaot gud hadtaem ia, se: “Ol blesing blong Lod long mifala i bigwan tumas” i mekem se “ol woman blong mifala … oli bin strong” mo oli save bonem ol pikinini “mo no komplen” (1 Nifae 17:1–2).

Blong stap kaekae gud samtaem i blong traem, mo tu, blong testem. Alma i tokbaot wan gudfala sid we oli planem insaed long hat blong yumi. Taem yumi stap gat ol eksperiens long hem, yumi luksave se sid ia i stat “blong kam swit” (luk long Alma 32:28–33).

Ol blesing blong stap kakae gud long ol toktok blong Kraes i gat fulap paoa mo i save jenisim laef. I gat speseli tri we mi wantem invaetem yufala blong putum long laef blong yufala.

Faswan, ol toktok blong Kraes i save helpem yumi blong “mekem save blong yumi long saed blong spirit i kam moa bigwan blong kasem revelesen” (Russell Nelson, “Revelesen blong Jos, Revelesen blong Laef blong Yumi,” Liahona, Mei 2018, 93) mo lidim yumi long sef fasin truaot long laef blong yumi. Momon i tijim se ol toktok blong Kraes i save “lidim ol man blong mekem wanem we i stret” mo i gat moa paoa bitim eni samting we “naef blong faet” i save winim (Alma 31:5). Taem mi bin stap lukaotem waes blong God blong go tru ol jalenj blong mi, evri taem, taem mi traem “paoa blong toktok blong God” (Alma 31:5), mi bin filim insperesen mo save mekem ol waes desisen, winim ol temtesen, mo blesem laef blong mi wetem moa fet long Kraes, mo wetem lav blong olgeta raon long mi. Profet blong yumi, Russell M. Nelson, i tijim yumi se, “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem” (“Revelesen blong Jos, Revelesen blong Laef blong Yumi,” 93). Revelesen we i nid bae i kam taem yumi traem “paoa blong toktok,” mo toktok ia bae i gat moa paoa bitim eni samting we bae yumi save traem o pikjarem long maen blong yumi.

Nambatu, taem yumi stap traehad wetem aedentiti mo fasin blong nogat tras long yumiwan, bae “toktok blong God we i mekem man i hapi” (Jekob 2:8) long ol skripja bae i helpem yumi save huia yumi tru mo givim paoa we i bitim blong yumiwan. Blong luk save aedentiti blong mi olsem wan pikinini blong God i wan long ol taem we i swit tumas we mi bin eksperiensem. Long ol eli taem long yangfala blong mi, mi no bin save eni samting abaot ol tijing blong Sevya. Long fas taem we mi bin ridim Niu Testeman, ol toktok blong Kraes i bin rili hilim sol blong mi we i gat soa. Mi bin luksave se mi no stap miwan. mo mi, mi pikinini blong God. Taem mi bin luksave tru aedentiti blong mi long fored blong God, mi luksave evri paoa we mi save kasem we i no gat en, tru long Atonmen blong Kraes.

Inos i bin serem eksperiens blong hemwan long save we i kam long fasin blong lukluk gud long ol toktok blong Kraes. Taem Inos i letem ol toktok we papa blong hem i bin tijim abaot “laef we i no save finis, mo glad blong ol sent, i bin go draon dip long hat blong [hem],” sol blong hem i “bin hanggri; mo [hem i] bin nildaon long fored blong Meka blong [hem] … wetem wan strongfala prea” (Inos 1:3–4). Long prea ia, hem i kam blong save Sevya mo lanem se yumi gat bigfala valiu, mo oli lavem yumi mo save kasem fogivnes long ol mistek blong yumi, mo i tru, yumi ol pikinini blong God.

Nambatri, yumi save leftemap laef blong ol narawan tru long ol toktok blong Kraes. Semmak olsem Inos i bin gat taem mo ples blong hem we ol toktok blong Kraes i bin tajem hat blong hem, Lod bae i mekem pat blong Hem blong tajem ol hat blong olgeta we hem i wantem blong serem gospel wetem olgeta. Plante long yumi i filim daon taem yumi bin traem blong invaetem wan man blong harem gospel from risal we yumi wantem i no bin folem. Nomata long risal, Lod i stap invaetem yumi blong openem maot blong yumi mo serem gospel mesej ia wetem ol nara man.

Tu yia i pas, Lod i bin tajem hat blong dia mama blong mi, we i bin helpem hem blong disaed blong kasem odinens blong baptaes. Mi bin wet from dei ia blong i hapen kolosap 35 yia. Blong mekem se hem i mekem desisen ia, fulap memba blong Jos oli bin givhan long hem olsem we Kraes bae i mekem. Wan Sandei, hem i filim se hem i sud go long Jos. Hem i folem kwaet toktok blong Spirit. Taem hem i stap sit daon long ol jea long fored mo wet long sakramen miting blong stat, wan boe blong 4 yia i stanap long fored blong hem mo lukluk hem. Hem i talem halo long hem wetem wan smael. Smol boe ia i lego hem kwiktaem mo wokbaot i gobak long jea blong hem, we i stap long narasaed laen we mama blong mi i sidaon long hem. Smol boe ia i pikimap wan samting long jea blong hem mo i kambak mo givim wan hymbuk long mama blong mi mo i wokbaot gobak long jea blong hem. Mama blong mi i luk se i gat wan hymbuk long evri nara jea insaed long japel. Hem i save pikimap wan long jea narasaed long hem nomo. Be, hem i glad tumas long aksen blong boe ia, blong stap kaen, we boe ia i bin lanem long hom blong hem mo long Jos. Hem i wan taem blong pis blong hem. Hem i gat wan strong filing se God i stap invaetem hem blong kam mo folem Sevya. Hem i filim se hem i sud kasem baptaes. Smol boe ia i no lukaot blong oli luk save hem from wanem hem i bin mekem, be hem i stap mekem bes blong hem nomo blong laef folem toktok blong God blong lavem neiba blong hem. Kaen fasin blong hem i mekem wan impoten jenis insaed long hat blong mama blong mi.

Ol toktok blong Kraes bae i tajem hat dip daon mo openem ol ae blong olgeta we oli no luk Hem yet. Long rod i go long Emeas, tu disaepol i bin wokbaot wetem Jisas. Oli harem nogud mo no andastanem we Sevya i bin winim ded. Long harem nogud blong olgeta, oli no bin luksave se Kraes we i stap laef i stap wokbaot wetem olgeta. Nomata Jisas “i talemaot gud long tufala, olgeta tok blong Baebol we oli bin raetem blong tokbaot hem,” oli stil no luk save Hen olsem Sevya we i girap long ded kasem taem oli sit daon mo brekem bred wetem Hem. Afta nao “ol ae” blong olgeta i open. Taem yumi—o ol fren blong yumi, ol fren long wok, mo ol neiba—i kakae gud mo brekem bred wetem Hem, ol ae blong andastaning blong yumi bae i open. Taem ol disaepol long Emeas oli luklukbak long taem blong olgeta wetem Sevya we i bin girap long ded, oli talem se hat blong olgeta i bin laet insaed long olgeta taem Hem i bin openem ol skripja i go long olgeta (luk long Luk 24:27–32). Hemia bae i tru blong yumi evriwan.

Blong endem, mi serem testemoni blong mi se, blong stap kakae gud long ol toktok blong Kraes i save hapen eni taem, sapos yumi rere hat blong yumi from. Blong stap kakae gud long ol toktok blong Kraes bae i givim ol revelesen we i save stap sapotem yumi long laef, talem bakegen tru aedentiti blong yumi mo valiu blong yumi long fored blong God olsem pikinini blong Hem, mo lidim ol fren blong yumi i go long Kraes mo laef we i no save finis. Letem mi endem toktok blong mi wetem invitesen blong Nifae taem hem i talem: “Yufala i mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:20). Long nem blong Jisas Kraes, amen.