ʻE Lava Nai Ke U Tokoniʻi Ha Taha Ke Liliu?

ʻĪmisi

Christ with the woman at the well

Vai Moʻui, tā ʻe Simon Dewey

Ne ngaohi kitautolu mo ha tuʻunga malava ke liliu. Ko e taumuʻa ʻo ʻetau aʻusia fakamatelié ke tupulaki ki hotau tuʻunga malava fakalangí. Ko e taha ʻo ʻetau ngaahi taumuʻa taupotu taha ʻi he ngāue fakaetauhí, ke tokoniʻi e niʻihi kehé ke haʻu kia Kalaisi pea fakahoko e ngaahi liliu ʻoku fie maʻu ke nau foki ai ki Hono ʻaó. Ka koeʻuhí ko ʻenau tauʻatāina ke filí, ʻoku fakangatangata pē hotau fatongia ke tokoniʻi kinautolu ke nau anga faka-Kalaisi angé.

Ko ha ngaahi lēsoni maʻongoʻonga eni ʻe fitu mei he Fakamoʻuí ki he founga te tau lava ai ʻo tokoniʻi e niʻihi kehé ke hangē ko Iá.

1. ʻOua Naʻá Ke Manavasiʻi ke Fakahoko ha Liliu

   ʻĪmisi

   Christ with the woman taken in adultery

   Ko e Fefine Naʻe Moʻua ʻi he Tono Tangatá, tā ʻe Harry Anderson

   Ne ʻikai manavasiʻi e Fakamoʻuí ke fakaafeʻi e niʻihi kehé ke nau liʻaki e ngaahi founga motuʻá pea tali ʻEne ngaahi akonakí. Naʻá Ne fakaafeʻi ʻa Pita mo Sēmisi ke liʻaki ʻena ngāué pea “ke [na] toutai tangata” (Maʻake 1:17). Naʻá Ne fakafeʻi e fefine ne moʻua ʻi he feʻauakí ke “ʻalu pea ʻoua ʻe toe fai angahala” (Sione 8:11). Naʻá Ne fakaafeʻi e talavou koloaʻiá ke tuku ʻene pikitai ki he ngaahi meʻa fakamāmaní kae muimui kiate Ia (vakai, Maʻake 10:17–22). ʻE lava foki ke tau lea fakahangatonu mo angaʻofa fakatouʻosi ʻi heʻetau fakaafeʻi e niʻihi kehé ke fakahoko ha ngaahi liliu pea muimui ki he Fakamoʻuí.

2. Manatuʻi Ko e Fili Ia ʻAnautolu ke Liliú

   He ʻikai lava ke fakamālohiʻi e faʻahinga liliu ʻoku fakaafeʻi ʻe he Fakamoʻuí. Naʻe akonaki mo fakaafe e Fakamoʻuí, ka naʻe ʻikai ke Ne fakamālohiʻi. Naʻe “ʻalu mamahi” ʻa e talavou koloaʻiá (Mātiu 19:22). Ne fili ʻe ha tokolahi ʻo ʻEne kau ākonga ʻi Kāpaneumé ke “foki ki mui,” pea naʻá Ne fehuʻi ki he Toko Hongofulu Mā Uá pe te nau toe ʻalu foki mo kinautolu (vakai, Sione 6:66–67). Ne fili ha niʻihi ʻo e kau muimui ʻo Sione Papitaisó ke muimui ki he Fakamoʻuí, ka ne ʻikai pehē ha niʻihi (vakai, Sione 1:35–37; 10:40–42). Te tau lava ʻo fakaafeʻi e niʻihi kehé ke nau hangē ko Iá, ka he ʻikai lava ke tau fakahoko e fili ke liliú maʻanautolu. Pea kapau kuo teʻeki ai ke nau fili ke liliu, ʻoku ʻikai totonu ke tau loto-foʻi—pea ʻikai foki totonu ke tau ongoʻi kuo tau tōnounou.

3. Lotu ke Malava e Niʻihi Kehé ʻo Liliu

   ʻĪmisi

   Christ praying

   Fakaikiiki mei he Kuó u Hūfia Koe, tā ʻe Del Parson

   Lolotonga e Lotu Hufekina ʻa Sīsuú, naʻá Ne kole ki he ʻOtuá ke fakahaofi ʻEne kau ākongá mei he koví, ke nau hangē ko Ia mo e Tamaí, pea fakafonu kinautolu ʻe he ʻofa ʻa e ʻOtuá (vakai, Sione 17:11, 21–23, 26). Pea ʻi Heʻene ʻafioʻi ʻe fie maʻu ʻe Pita ha mālohi ʻi heʻene ngaahi ngāué ke tupulaki ʻi hono fatongiá, ne lotua ia ʻe he Fakamoʻuí (vakai, Luke 22:32). ʻE lava ke fai ʻe heʻetau ngaahi lotú ha faikehekehe (vakai, Sēmisi 5:16).

4. Akoʻi Kinautolu ke Falala ki Hono Mālohí

   Ko e Fakamoʻuí pē ʻe lava ai ke tau liliu moʻoni mo tupulaki ki he ivi malava fakalangi ʻoku tau maʻu kotoá. Ko Ia “ko e hala, mo e moʻoni, pea mo e moʻui: ʻoku ʻikai haʻu ha tangata ʻe taha ki he Tamaí, kae ʻiate [Ia]” (Sione 14:6). Ko Hono mālohí pē ʻe lava ke “liliu [ai] ʻa e ngaahi meʻa vaivaí ko e mālohí” (ʻEta 12:27). Naʻe tupu mei Hono mālohi fakaleleí ʻa e malava ʻa ʻAlamā ko e Siʻi ʻo liliú (vakai, ʻAlamā 36:16–23). Te tau lava foki ʻo akoʻi e niʻihi kehé ke nau falala ki he Fakamoʻuí koeʻuhí ke nau lava foki ʻo maʻu hono mālohi faifakamaʻá ʻi heʻenau moʻuí.

5. Tokangaʻi Kinautolu ʻi he Tuʻunga Te Nau Lava ʻo Aʻusiá

   ʻE lava ke hoko e ʻofá mo hono tali e niʻihi kehé ko ha ivi takiekina mālohi ki he liliú. Ne nofo e fefine he vaitupú mo ha tangata ne ʻikai ko hano husepāniti. Naʻe “ofo [e kau ākonga ʻa Sīsuú] ʻi heʻene talanoa mo e fefiné” (Sione 4:27), ka naʻe tokanga ange ʻa Sīsū ki he meʻa te ne lava ʻo aʻusiá. Naʻá Ne akoʻi ia mo ʻoange ha faingamālie ke liliu, pea naʻá ne fai ia. (Vakai, Sione 4:4–42.)

   ʻI heʻetau fakafeangai ki he niʻihi kehé tuʻunga ʻi honau kuohilí kae ʻikai ko e tuʻunga te nau ala aʻusiá, te tau lava ai ʻo taʻofi kinautolu. Ka te tau lava ʻo fakamolemoleʻi mo fakangaloki e ngaahi fehalaaki ʻo e kuohilí. Te tau lava ʻo tui ʻe liliu e niʻihi kehé. ʻE lava ke tau tukunoaʻi e ngaahi vaivaí kae ʻohake e ngaahi meʻa lelei he ʻikai lava ke nau ʻiloʻi ʻiate kinautolú. “ʻOku ʻi ai hotau fatongia ke ʻoua naʻa tau vakai ki he kakaí ʻi he tuʻunga ʻoku nau ʻi aí, ka ʻi he tuʻunga te nau ala aʻusiá.”¹

6. Tuku ke Nau Fononga Fakatatau mo Honau Tuʻunga Malavá

   ʻOku fie maʻu ha taimi ki he liliú. Kuo pau ke tau “fai atu ai pē ʻi he faʻa kātaki kae ʻoua ke fakahaohaoaʻi [kitautolu]” (Tokāteline mo e Ngaahi Fuakava 67:13). Naʻe faʻa kātekina ʻe Sīsū e niʻihi kehé naʻa mo hono akonekina ʻa kinautolu ne nau fakafepakiʻi Iá, ʻo fakamoʻoniʻi Hono fatongia ne foaki kiate Ia ʻe Heʻene Tamaí mo tali ʻenau ngaahi fehuʻí (vakai, Mātiu 12:1–13; Sione 7:28–29). Te tau lava ʻo kātekina e niʻihi kehé mo poupouʻi kinautolu ke nau faʻa kātaki ʻiate kinautolu pē.

7. ʻOua Naʻá ke Foʻi Kapau Te Nau Foki ki Heʻenau Tōʻonga Motuʻá

   ʻĪmisi

   Christ with Peter

   ʻOku Lahi Hake Hoʻo ʻOfa Kiate Aú ʻIate Kinautolú ni? tā ʻe David Lindsley

   Hili e pekia ʻa Kalaisí, ne aʻu pē kia Pita mo ha niʻihi ʻo e kau ʻAposetolo kehé, ne nau foki ki he meʻa naʻa nau angamaheni ki aí (vakai, Sione 21:3). Naʻe fakamanatu ange ʻe Kalaisi kia Pita ʻoku fie maʻu ke ne “fafanga [ʻEne] fanga sipí” (vakai, Sione 21:15–17), pea naʻe foki ʻa Pita ki he ngāué. ʻE lava foki ke mātuʻaki faingofua e foki ki he ngaahi founga ki muʻá. ʻE lava ke kei hokohoko atu ʻetau poupoú ʻaki haʻatau fakalotolahi angavaivai fakataha mo ha ngaahi fakaafe ueʻi fakalaumālie ke hokohoko atu e muimui ki he Fakamoʻuí mo feinga ke hoko ʻo hangē ko Iá.