Ko e Lasānia Faiʻahó
Tā fakatātā ʻa Allen Garns
Kuo fuoloa ʻeku ongoʻi e holi ke taʻo maá pe ngaohi ha meʻatokoni pea ʻoatu ia ki ha taha ʻi homau uōtí ke vahevahe ʻeku ʻofá pea mo e ʻofa ʻa e ʻEikí mo kinautolu, ka naʻe teʻeki ai pē ke u fai ia.
ʻOku ou manako ke ngaohi meʻatokoni, ka ko au pē eni mo hoku husepānití ʻoku ʻi ʻapi he taimi ní. Ko ia ai, ʻoku siʻisiʻi ange e meʻatokoni ʻoku ngaohi ʻi heʻema houa kaí he ʻoku faʻa lau ʻaho pea toki ʻosi e meʻakaí, kapau ʻe lahi ki heʻema maʻu meʻatokoní.
Naʻá ku fakakaukau ʻi ha pō ʻe taha ke ngaohi ha lasānia. Ne ʻikai ke u ngaohi ha kapa lahi ʻe taha, ka ko ha kapa iiki ʻe ua. Te ma lava leva ai ʻo maʻu meʻatokoni efiafi ʻaki e taha, pea ʻe lava ke u foaki e kapa ʻe tahá ki ha taha naʻá ne fie maʻu.
Ne u fetuʻutaki ki he palesiteni Fineʻofá ke vakai pe naʻe fie maʻu ʻe ha taha ha meʻatokoni ke ʻoatu maʻanautolu. Naʻá ne lau kau ki ha faʻē taautaha naʻá ne ngāue pea ʻi ai haʻane fānau ʻe toko ua. ʻI he hoʻatā efiafi ko iá, naʻá ku text ki he faʻeé ʻo talaange ne u ngaohi ʻo lahi ʻeku lasāniá pea ʻoku ou fie vahevahe ia mo hono fāmilí.
Naʻá ne text mai ʻo pehē, “ʻOku faikehe ʻaupito ia! ʻIo, ʻe lelei ʻaupito ia!” Naʻá ne kei ʻi he ngāué, ka ʻe ʻi ʻapi ʻene fānaú, pea ʻe lava ke u tuku ange ia ʻi ha faʻahinga taimi pē.
Hili ha kiʻi taimi nounou mei ai, naʻá ne toe text mai ʻo fehuʻi mai, “Naʻá ke ʻiloʻi ko hoku ʻaho fāʻeleʻí e ʻahó ni?” Naʻá ku fakapapauʻi ange ne ʻikai ke u teitei ʻilo ia. Naʻá ne tali mai, “Sai, faiʻaho fiefia pē kiate au!”
ʻI heʻeku ʻave e meʻatokoní, ko ʻene toki tuku mai pē ia mei he ngāué. Naʻá ne fiefia, pea pehē foki ki heʻene fānaú.
ʻI he Sāpaté, naʻá ne maʻu au ʻi he lotú, pea naʻá ne loʻimataʻia ʻi heʻene talamai ko e mei taʻu kotoa pē ʻi hono ʻaho fāʻeleʻí, ne ngaohi ʻe heʻene kui fefiné haʻane meʻatokoni efiafi—pea ko e lasānia maʻu pē ia. Ne mālōlō ʻene kui fefiné he taʻu kimuʻá, pea ko hono fuofua faiʻaho eni ne ʻikai ʻi ai ʻene kui fefiné ke ngaohi ha lasānia maʻana.
ʻI heʻeku tuku atu e lasāniá ʻi hono ʻaho fāʻeleʻí, ne fakamālohia ʻene fakamoʻoni ʻoku ʻafioʻi ʻe he ʻEikí ia mo ʻofa ʻiate iá. Pea naʻá ne fakamālohia ʻeku fakamoʻoni kapau te tau fakaʻatā kitautolu ke hoko ko ha meʻangāue ʻi he toʻukupu ʻo e ʻEikí, te Ne fakahaaʻi mai e tafaʻaki te tau lava ʻo tokoni aí.