Te mau vahine nō te fafaura’a e ’āpiti atu ’e te Atua

’Ua māuruuru vau i te ha’amaita’ira’a e paraparau ia ’outou, te mau tamāhine nō te fafaura’a a te Atua. Tā’u fā i teie pō, ’o te fa’aitoitora’a ïa ia ’outou i roto i te tāvinira’a rahi tei pi’ihia ’outou ’ia rave. ’Oia mau, ’ua fāri’i te mau tamāhine ato’a e fa’aro’o mai ra i tō’u reo i te hō’ē pi’ira’a nō ’ō mai i te Fatu ia Iesu Mesia.

’Ua ha’amata tō ’outou pi’ira’a i te taime ’a tu’uhia ai ’outou i te tāhuti nei, i te vāhi ’e i te taime tei mā’itihia nō ’outou e te Atua tei ’ite maita’i roa ia ’outou ’e tei here roa ia ’outou ’ei tamāhine nāna. I te ao vārua, ’ua ’ite ’oia ia ’outou ’e ’ua ha’api’i ia ’outou ’e ’ua tu’u ia ’outou i te vāhi e fāna’o ai ’outou i te ha’amaita’ira’a, varavara i roto i te tua’ā’ai o te ao nei, i ani-manihini-hia i roto i te ’āpo’o pape nō te bāpetizora’a. I reira ’outou e fa’aro’o ai i te mau parau a te hō’ē tāvini pi’ihia nā Iesu Mesia : « Nō te mana i tu’uhia mai iā’u e Iesu Mesia, tē bāpetizo nei au ia ’oe i te i’oa o te Metua, ’e nō te Tamaiti ’e nō te Vārua Maita’i. ’Āmene ».¹

I te haerera’a mai ’outou i rāpae i te pape, ’ua fāri’i ’outou i te tahi fa’ahou pi’ira’a ’ia tāvini. ’Ei tamāhine ’āpī nō te fafaura’a a te Atua, ’ua parau fafau atu ’outou ’e ’ua fāri’i ho’i ’outou i te hō’ē fa’auera’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, i te ha’amaura’ahia ’outou ’ei melo. ’Ua fafau ’outou i te Atua e rave i ni’a ia ’outou i te i’oa o Iesu Mesia, ’ia ha’apa’o i tāna mau fa’auera’a ’e ’ia tāvini iāna.

Te ta’ata tāta’itahi e rave i teie mau fafaura’a, e tano maita’i roa ’oia nō te tāvinira’a tā te Fatu e pi’i iāna ’ia rave. Tē vai nei rā te hō’ē pi’ira’a faufa’a rahi ’e te ’oa’oa tā te mau tamāhine ’e te mau tamaiti nō te fafaura’a a te Atua e amo hō’ē nei. ’O te tāvinira’a ïa i te ta’ata nōna.

I tōna paraparaura’a i te mau tuahine, ’ua hōro’a te peresideni Russell M. Nelson i te hō’ē ha’apotora’a fa’ahiahia nō te pi’ira’a a te Fatu ia ’outou ’ia ’āmui mai i roto i tāna ’ohipa. ’Ua fa’ata’a te peresideni Nelson i tō ’outou pi’ira’a mai teie : « Ua parau te Fatu ē, ‘Tā’u ’ohipa ’e tō’u hanahana, ’ia fa’atupu i te tāhuti ’ore ’e te ora mure ’ore o te ta’ata nei’ (Mose 1:39). Nō reira e nehenehe tāna pipi tamāhine e parau ē : ‘Tā’u ’ohipa ’e tō’u hanahana ’o te tauturura’a ïa i te mau ta’ata tei herehia e au ’ia taea’ehia ia rātou taua tītaura’a i te ra’i ra’.

« Nō te tauturura’a i te tahi ta’ata ’ia tae i tōna fāito pūai tiretiera, e tuha’a ïa nō te misiōni hanahana a te vahine. ’Ei metua vahine, ’ei ’orometua ha’api’i ’aore rā ’ei feiā mo’a aupuru, e fa’ahōho’a ’oia i te araea ora ’ia au i te hōho’a o tāna mau tīa’ira’a. ’Āpiti atu ’e te Atua, tāna misiōni hanahana, ’o te tauturura’a ïa i te mau vārua ’ia ora ’e ’ia fa’ateiteihia tō rātou vārua. Teie te fāito o tōna poietera’ahia. E noa’a te hanahana ari’i, te fa’aitoitora’a ’e te fa’ateiteira’a ».²

E’ita tā ’outou e nehenehe e ’ite afea, ’aore rā e aha te maoro tā ’outou iho misiōni e rōtahi ai i ni’a i te tāvinira’a i roto i te mau pi’ira’a metua vahine, ti’a fa’atere ’aore rā tuahine aupuru. Nō tōna here, ’aita te Fatu e hōro’a nei ia tātou i te mā’itira’a nō te taime, te maorora’a ’aore rā te ’āpapara’a nō tā tātou mau hōpoi’a. Terā rā, ’ua ’ite ’outou nā roto i te mau pāpa’ira’a mo’a ’e te mau peropheta ora ē, e tae mai teie mau hōpoi’a ato’a, i roto ānei i teie orara’a ’aore rā i tō muri iho, i te mau tamāhine ato’a a te Atua. ’E e mau fa’aineinera’a ana’e rātou nō te ora mure ’ore i roto i te mau ’utuāfare here—« te hōro’a hau a’e i te mau hōro’a ato’a a te Atua ».³

E mana’o pa’ari ïa ’ia tu’u i tāna tauto’ora’a ato’a nō te fa’aineine i teienei ma te fa’ahope’ara’a i te ferurira’a. E mea ’ōhie a’e te reira ’ohipa inaha tītauhia nō teie mau hōpoi’a fātata i te hō’ē ā fa’aineinera’a.

Ha’amata ana’e nā ni’a i te hōpoi’a ’ia riro ’ei tuahine aupuru. Mai te mea tei ia ’outou nei terā hōpoi’a ’ei tamāhine 10 matahiti i roto i te hō’ē ’utuāfare ’ua pohe te metua tāne, ’aore rā ’ei peresideni Sōtaiete Tauturu tei pa’apa’a a’enei tōna ’oire i te auahi ’aore rā ’ei vahine i te fare ma’i nō te tahi tāpū—’ua fāna’o ’outou i te rāve’a nō te rave i tō ’outou pi’ira’a nō ’ō mai i te Fatu ’ia riro ’ei tamāhine aupuru nāna.

’Ia hi’ohia, e mea ta’a ’ē roa teie nau huru hōpoi’a aupurura’a. Terā rā, e tītau pauroa te reira i te fa’aineinera’a ’ā’au pūai ’e te here, te fa’aro’o mata’u ’ore, e’ita te Fatu e hōro’a i te fa’auera’a maoti rā e fa’aineine ’oia i te rāve’a, ’e te hina’aro ’ia haere ’e ’ia rave nōna.⁴

Nō tōna fa’aineinera’a, e tauahi te tamāhine 10 matahiti i tōna metua vahine ’ivi ma te pure nō te ’ite nāhea ’oia e tauturu ai i tōna ’utuāfare. ’E e tāmau noa ’oia i te nā reira.

’Ua fa’aineine te peresideni Sōtaiete Tauturu nō te aupuru atu hou terā auahi mana’o-’ore-hia i tōna vāhi. ’Ua noa’a iāna i te mātau i te ta’ata ’e i te here ia rātou. ’Ua tupu tōna fa’aro’o ia Iesu Mesia i te rahi i roto i terā mau matahiti, ’ua fāri’i ’oia i te pāhonora’a i tāna mau pure i te Fatu ’ia tauturu iāna i roto i te mau ’ohipa tāvinira’a ri’i nōna. Nō tōna fa’aineine-māite-ra’a, ’ua ineine ’oia ’e ’ua hina’aro roa ’oia e fa’anahonaho i tōna mau tuahine nō te tāvini i te mau ta’ata ’e te mau ’utuāfare i roto i te fifi.

’Ua fa’aineinehia te hō’ē tuahine i te fare ma’i, tei tāpūhia, nō te tāvini i tōna mau hoa feiā ma’i. ’Ua tāvini ’oia i tōna orara’a tā’āto’a nō te Fatu i te mau ta’ata ’e’ē ato’a mai te huru ra ē, e ta’ata tupu rātou ’aore rā e hoa rātou. I te putapūra’a tōna ’ā’au i te pi’ira’a e tāvini i te fare ma’i, nō tōna itoito roa i te tāvinira’a i te ta’ata ma te here rahi ha’amata atu ra te tahi atu feiā ma’i ’ia hina’aro ’eiaha ’oia ’ia ora ’oi’oi mai.

Mai tā ’outou e fa’aineine nō te aupuru i te ta’ata, e nehenehe ’outou, ’e e mea tītauhia ho’i ia ’outou ’ia fa’aineine nō tō ’outou pi’ira’a ’ei ti’a fa’atere nō te Fatu, ’ia tae mai te reira. E tītauhia te fa’aro’o ia Iesu Mesia tei a’ahia i roto i te here rahi o te mau pāpa’ira’a mo’a nō te arata’i i te ta’ata ’e nō te ha’api’i ia rātou i tāna parau ma te mata’u ’ore. ’Ei reira ’outou e ineine ai ’ia pārahi mai te Vārua Maita’i ’ei hoa tāmau nō ’outou. E tae mai tō ’outou ’ana’anatae nō te parau ē, « nā’u e rave », i te taime e pe’ape’a te reo o tō ’outou tauturu peresidenira’a Feiā ’Āpī Tamāhine i te nā-’ō-ra’a mai : Ua ma’ihia te tuahine Alvarez i teie mahana. Nā vai e rave i te ha’api’ira’a ? »

Hō’ē ā huru fa’aineinera’a nō te mahana nehenehe e pi’i te Fatu ia ’outou i te hōpoi’a metua vahine. E tītauhia rā te ’ā’au here rahi atu ā i tei mātāmua ra. E tītauhia te fa’aro’o rahi atu ā ia Iesu Mesia i tei noa’a mai i tō ’outou ’ā’au. ’E e tītauhia te pūai nō te pure nō te fa’aurura’a, te arata’ira’a ’e te tāmarū a te Vārua Maita’i, hau atu i tā ’outou i ’ite a’enei e nehenehe.

E tano paha ’outou i te ui ē, nāhea pa’i te hō’ē tāne, ta’a ’ē noa atu tōna matahiti, e nehenehe ai e ’ite e aha tei tītauhia nō te mau metua vahine. E uira’a ti’a roa ïa. E’ita e nehenehe i te mau tāne ’ia ’ite i te mau mea ato’a, e ti’a rā ia mātou ’ia ’apo mai i te tahi ha’api’ira’a nā roto i te heheura’a nō ’ō mai i te Atua ra. ’E tē ha’api’i rahi ato’a nei mātou i te mea tā mātou e hi’o, ’ia ’imi mātou i terā taime i te Vārua nō te tauturu ia mātou ’ia māramarama i tā mātou e hi’o ra.

’Ua hi’o noa vau ia Kathleen Johnson Eyring nā matahiti 57 māua i te fa’aipoipora’a. E metua vahine ’oia nō e maha tamāroa ’e e piti tamāhine. Tae roa mai i teie mahana, ’ua fāri’i ’oia i te pi’ira’a ’ia riro ’ei fa’aurura’a metua vahine nō te fēti’i piri, ’ua hau i te hānere ta’ata, ’e nō te tahi fa’ahou feiā tā tōna ’ā’au metua vahine i fa’a’amu, e rave rahi hānerera’a ta’ata.

Tē ha’amana’o ra ’outou i te fa’ahitira’a tano roa a te peresideni Nelson nō ni’a i te misiōni hanahana a te hō’ē vahine—tae noa atu tāna misiōni metua vahine : « ’Ei metua vahine, ’ei ’orometua ha’api’i ’aore rā ’ei feiā mo’a aupuru, e fa’ahōho’a ’oia i te araea ora ’ia au i te hōho’a o tāna mau tīa’ira’a. I roto i te ’āpitira’a e te Atua, tāna misiōni hanahana o te tauturura’a ïa i te mau vārua ’ia ora ’e ’ia fa’ateiteihia te mau vārua. Teie te fāito o tōna poietera’ahia ».⁵

’Ia au i tō’u piri iāna ’e tā’u i hāro’aro’a, ’ua pe’e tā’u vahine Kathleen i teie fa’auera’a, tei hōro’ahia i te mau tamāhine a tō tātou Metua. Te tāviri tā’u e ’ite ra, ’o te mau parau ïa « e fa’ahōho’a ’oia i te araea ora ’ia au i te hōho’a o tāna mau tīa’ira’a… i roto i te ’āpitira’a atu ’e te Atua ». ’Aita ’oia i fa’ahepo. ’Ua fa’atō [mouler] ’oia. ’E e hōho’a tāna nō tōna mau tīa’ira’a, ’o tāna ïa i tāmata i te fa’atō i te feiā tāna i here ’e tāna i aupuru ’ei metua vahine. Tāna hōho’a, ’o te ’evanelia ïa a Iesu Mesia—mai tā’u i ’ite nā roto i te pure ’e te hi’ora’a a tō’u mata i roto i terā mau matahiti.

Te rirora’a ’ei vahine nō te fafaura’a e ’āpiti atu ’e te Atua, ’o te huru fa’ahiahia ïa ’e te maita’i o te mau tamāhine a te Atua tei riro noa na ’ei metua vahine, ’ei arata’i ’e ’ei aupuru, ma te tāvini i te fāito ato’a ’e i te vāhi ato’a tāna i fa’aineine nō rātou. Tē parau fafau nei au ia ’outou ē, e ’ite mai ’outou i te ’oa’oa i ni’a i tō ’outou tere i te fare o te ra’i ra, ’ia ho’i atu ’outou iāna ’ei tamāhine ha’apa’o fafaura’a nā te Atua.

Tē fa’a’ite pāpū nei au ē, tē ora nei te Atua te Metua, ’e ’ua here ’oia ia ’outou. E pāhono mai ra ’oia i tā ’outou mau pure. Tē fa’atere nei tāna Tamaiti here i Te ’Ēkālesia a Iesu Mesia i te Feiā Mo’a i te mau Mahana Hope’a nei, i te mau mea ato’a. ’O te peresideni Russell M. Nelson tāna peropheta ora. ’E ’ua ’ite Iosepha Semita ’e ’ua paraparau ho’i ’oia i te Atua te Metua ’e ia Iesu Mesia i roto i te hō’ē uru rā’au i Palmyra (New York). ’Ua ’ite au e parau mau te reira. Tē fa’a’ite pāpū ato’a nei au ē, o Iesu Mesia tō tātou Fa’aora, ’ua here ’oia ia ’outou. ’E nā roto i tāna tāra’ehara, e nehenehe ’outou e tāmāhia ’e e fa’ateiteihia i te mau pi’ira’a teitei ’o te tae mai ia ’outou. Tē fa’a’ite pāpū nei au i te reira i te i’oa mo’a o Iesu Mesia, ’āmene.