Te tā’amura’a fafaura’a

Te mau taea’e ’e te mau tuahine, tē fa’ati’ahia ra te ’ā’amu nō te hō’ē tamari’i Paraimere tē ha’api’i ra i te pure. « Māuruuru nō te reta A, te reta B… te reta G ». Nā ’ō fa’ahou a’era tāna pure : « Māuruuru nō te mau reta X, Y, Z. E te Metua i te Ao ra, māuruuru nō te nūmera 1, te nūmera 2. » Tē pe’ape’a ra te ’orometua Paraimere, ’ua tīa’i rā. Nā ’ō a’era te tamari’i : « Māuruuru nō te nūmera 5, te nūmera 6—’e māuruuru ato’a nō tō’u ’orometua Paraimere. ’O ’ōna ana’e tei vaiiho iā’u e fa’aoti i tā’u pure. »

Tē fa’aro’o mau nei te Metua i te Ao ra i te pure a te mau tamari’i ato’a. Ma te here fāito ’ore, tē tāparu nei ’oia ia tātou ’ia haere mai ’e ’ia ti’aturi ’e ’ia tā’amu iāna nā roto i te fafaura’a.

’Ua ’ī te ao nei i te natuaea (mirage), te mana’o vare ’e te ’aravihi ha’avare. Mai te huru ra ē ’ua rahi roa te mau mea vava’o (passager) ’e te ania (superficiel). ’Ia tātarahia te hōho’a fa’anehenehe, te hōho’a fa’ahua, te mau au ’e te mau au ’ore a te ta’ata, e tītau tātou i te hō’ē mea hau atu i te vāniti (vernis) matara haere noa, te natira’a tau poto ’aore rā te tītaura’a i tōna maita’i pae tino. ’Aua’a a’e maoti, tē vai ra te rāve’a nō te reira.

’Ia haere tātou i nā fa’auera’a rahi a te Atua e here iāna ’e i te feiā ’ati a’e ia tātou nā roto i te fafaura’a, e nā reira tātou, ’eiaha mai te ta’ata ’e’ē ’e te manihini, mai tāna ra tamari’i i te ’utuāfare.¹ Tē vai noa nei terā parau mau huru ’ē. ’Ia mo’e tō tātou huru pae tino i roto i te tā’amura’a fafaura’a, e ’ite mai tātou, ’e e riro mai ho’i tātou i tō tātou huru maita’i roa a’e nō te tau mure ’ore²—e mea ti’amā ’e te oraora ’e te pāpū—’e e ’ite tātou i tā tātou mau tā’amura’a faufa’a roa a’e. Te tā’amura’a fafaura’a, ’o te ravera’a ïa ’e te ha’apa’ora’a i tā tātou i parau fafau i te Atua ma te tura rahi, nā reira ato’a i te tahi ’e te tahi, nā roto i te mau ’ōro’a mo’a, ’o tē tītau i te mana nō te paieti ’ia ’itehia i roto i tō tātou orara’a.³ ’Ia fafau atu tātou i te tā’āto’ara’a o tō tātou huru, e hau atu tā tātou e riro mai i tō te huru i teieinei. E hōro’a te tā’amura’a i te fafaura’a i te vāhi, te parau ’ā’amu ’e te ’aravihi nō te riro mai. E fa’ahotu te reira i te fa’aro’o i te ora ’e i te fa’aorara’a.⁴

E riro mai te mau fafaura’a hanahana ’ei puna here nō te Atua ’e ’ei puna here nō ’ō mai i te Atua, ’e mai reira atu ’ei here nō te tahi ’e te tahi ’e i te tahi ’e te tahi. ʼUa rahi aʼe te here ʼe te ʼite o te Metua i te Ao ra ia tātou i tō tātou iho nei here ʼe te ʼite ia tātou iho. Maoti te fa’aro’o ia Iesu Mesia ’e te tauira’a iāna iho (te tātarahapa) e tae mai ai tōna aroha, tōna maita’i ’e te fa’a’orera’a hara. E tāmarū te reira i te pēpē, te vai-’ōtahi-noa-ra’a ’e te ti’a ’ore tā tātou e fa’aruru i te tāhuti nei. Nō te mea e Atua ’oia, tē hina’aro nei tō tātou Metua i te Ao ra ’ia fāri’i tātou i te hōro’a rahi roa a’e a te Atua—tōna ’oa’oa, tōna ora mure ’ore.⁵

E Atua nō te fafaura’a tō tātou Atua. Nō tōna nātura, e « ha’apa’o [’oia] i te fafaura’a [’e e] fa’a’ite mai i te aroha ».⁶ E vai noa tāna mau fafaura’a « ’a vai ai te tau, ’a mau ai te fenua, ’a pārahi ai ho’i te hō’ē ta’ata i ni’a i te fenua ’ia fa’aorahia ’oia. »⁷ ’Aita tātou nō te ’ōvere i roto i te pāpū ’ore ’e te fē’a’a i tō tātou vaira’a, nō te poupou rā i te mau aura’a poihere nō te fafaura’a « e mea pūai a’e… i te mau tāpe’ara’a nō te pohe ».⁸

Nō te tā’āto’ara’a te mau tītaura’a o te mau ’ōro’a ’e te mau fafaura’a a te Atua, tei te ta’ata hō’ē rā te mā’iti. Nō te maita’i o te Atua, e ti’a i te ta’ata tāta’itahi noa atu te vāhi ’e te matahiti ’ia fāri’i i te mau ’oro’a fa’aorara’a. Tē vai nei te ti’amāra’a ’ia mā’iti—nā te ta’ata hō’ē e mā’iti e fāri’i ānei i te mau ’ōro’a i pūpūhia. E mau pou fa’a’ite te mau ’ōro’a a te Atua i ni’a i tāna ’ē’a nō te fafaura’a. Tē parau nei tātou i te fa’anahora’a a te Atua nō te fa’aho’ira’a i tāna tamari’i i te fare, te rāve’a ora, te fa’anahora’a nō te fa’aorara’a, te fa’anahora’a nō te ’oa’oa. E noa’a te ora, te fa’aorara’a ’e te ’oa’oa tiretiera maoti tō Iesu Mesia « fa’atupu[ra’a] i teie nei tāra’ehara ti’a mau ».⁹

Te rirora’a tātou nā te Atua ’e te haerera’a ’e te tahi ’e te tahi i ni’a i tōna ’ē’a nō te fafaura’a, o te fāri’ira’a ïa i te ha’amaita’ira’a nō te tā’amura’a fafaura’a.

’A tahi, e fa’atumu te tā’amura’a fafaura’a i ni’a ia Iesu Mesia ’ei « ārai i te faufa’a ’āpī ra ».¹⁰ E ti’a i te mau mea ato’a e rave ’āmui nō tō tātou maita’i i te taime ’ua « mo’a [tātou] i te Mesia nā roto i te… faufa’a ïa a te Atua ».¹¹ E tae mai te mau ha’amaita’ira’a ato’a i parauhia i te feiā e vai ha’apa’o maita’i noa ē tae noa atu i te hope’a. Te « maita’i ’e te ’oa’oa o te ta’ata e ha’apa’o i te mau fa’aue ra a te Atua », ’oia ho’i, ’o te « ha’amaita’ihia… i te mau mea ato’a, o te tino nei ’e o te Vārua ato’a ho’i », ’e ’o te « pārahi… ’e te Atua ato’a i roto i te ’oa’oa hō’ē ’ore ra ».¹²

’A fa’atura ai tātou i tā tātou mau fafaura’a, e tae mai te mana’o i te tahi taime ē, tei rotopū tātou i te mau melahi. ’E ’o te reira iho ā—’o rātou tā tātou i here ’e ’o tē ha’amaita’i nei ia tātou i teie pae o te pāruru, ’e ’o rātou tā tātou i here ’e ’o tē ha’amaita’i nei ia tātou nā te tahi atu pae o te pāruru.

’Aita i maoro a’enei, ’ua ’ite māua te tuahine Gong i te tā’amura’a fafaura’a iti i roto i te hō’ē piha fare ma’i. ’Ua tītau-roa-hia te hō’ē māpē taui nō te hō’ē metua tāne ’āpī. ’Ua ta’i tōna ’utuāfare, ’e ’ua ha’apae i te mā’a ’e ’ua pure ho’i nōna, ’ia fāri’i ’oia i te hō’ē māpē. I te taera’a mai te parau ’āpī ē, ’ua noa’a mai terā māpē fa’aora, ’ua mana’o marū noa tāna vahine ē : « Maita’i pa’i ’aita terā ’utuāfare i fifi roa. » Te tā’amura’a nā roto i te fafaura’a, ’oia ho’i ïa mai tā te ’āpōsetolo Paulo i parau ē « ’ia māhanahana ho’i au ’e ’outou ato’a i tō tātou fa’aro’o, i tō ’outou ’e i tō’u ato’a ho’i ».¹³

I ni’a i te ’ē’a o te orara’a, penei a’e e mo’e tō tātou fa’aro’o i te Atua, ’aita rā e mo’e tōna fa’aro’o ia tātou. E aura’a parau, ’ua ’ama noa te mōrī i mua i tōna fare. Tē ani nei ’oia ia tātou ’ia haere mai ’aore rā ’ia ho’i mai i te mau fafaura’a e tāpa’opa’o nei i tōna ’ē’a. Tē tīa’i nei ’oia ma te ineine i te fāri’i ia tātou i roto i tōna rima, noa atu ā « tei te ātea ’ē ā » tātou.¹⁴ ’Ia hi’o tātou ma te mata fa’aro’o i te mau hōho’a, te terera’a ’aore rā te mau taime tū’ati’ati tei orahia e tātou, e nehenehe tātou e ’ite i tōna aroha marū ’e te fa’aitoitora’a, i roto iho ā rā i tā tātou mau tāmatara’a, tō tātou mau ’oto ’e te mau fifi, nā reira ato’a tō tātou mau ’oa’oa. Noa atu rā te pinepine tātou i te turori ’aore rā i te topa, mai te mea e tāmau tātou i te haere iāna ra, e tauturu mai ’oia ia tātou, hō’ē ta’ahira’a i te taime hō’ē.

Te piti, e fa’a’itera’a te Buka a Moromona nō te tā’amura’a fafaura’a, e mau i roto i te rima. ’O te Buka a Moromona te mauiha’a i parauhia nō te ha’aputuputura’a i te mau tamari’i a te Atua tei tohuhia ’ei fafaura’a ’āpī.¹⁵ ’Ia tai’o tātou i te Buka a Moromona, tātou ana’e iho ’e nā muri ia vetahi ’ē, e tai’ora’a marū ānei ’aore rā e mea pūai, e nehenehe tātou e ani atu i te Atua « ma te ’ā’au hina’aro mau, ma te mana’o pāpū, ’e ma te fa’aro’o i te Mesia » ’e e fāri’i nā roto i te mana o te Vārua Maita’i i te ha’apāpūra’a a te Atua ē, e parau mau te Buka a Moromona.¹⁶ Tei roto ato’a te ha’apāpūra’a ē, ’o Iesu Mesia tō tātou Fa’aroa, ’o Iosepha Semita te peropheta no te Fa’aho’i-fa’ahou-ra’a ’e ’ua topahia te ’Ēkālesia a te Fatu i tōna i’oa—Te ’Ēkālesia a Iesu Mesia i te Feiā Mo’a i te mau Mahana Hope’a nei.¹⁷

Nā roto i te fafaura’a tahito ’e te fafaura’a ’āpī, tē paraparau nei te Buka a Moromona ia ’outou te mau tamari’i a Lehi, « taua mau peropheta ra tamari’i ».¹⁸ ’Ua fāri’i tō ’outou mau tupuna i te hō’ē parau ’e te hō’ē fafaura’a e ’ite ’outou, tō rātou hua’ai, i terā reo mai raro i te repo ra i roto i te Buka a Moromona.¹⁹ Tē fa’a’ite nei taua reo tā ’outou e putapū nei ’a tai’o ai ē, ’o ’outou « te tamari’i i raro a’e i te faufa’a ra »²⁰ ’e ’o Iesu tō ’outou Tīa’i māmoe maita’i.

Tē ani nei te Buka a Moromona ia tātou tāta’itahi, mai te parau a Alama, ’ia « fa’aau [tātou] i te hō’ē faufa’a [i te Fatu], ’ia ha’amori atu [tātou] iāna, ’e ’ia ha’apa’o i tāna ra mau fa’aue, ’ia rahi atu tāna nīni’ira’a mai i tōna Vārua i ni’a ia [tātou] ».²¹ ’Ia hina’aro tātou e taui nō te maita’i a’e—mai tā terā ta’ata i parau, « e fa’aea i te ’oto ’e e ’oa’oa i te ’oa’oara’a »—e mahora tātou i te arata’ira’a, i te tauturu ’e i te pūai. E nehenehe tātou e riro na nā te Atua ’e nā te hō’ē pupu feiā ha’apa’o maita’i ’e e fāri’i i te mau ha’amaita’ira’a tei parauhia i roto i te ha’api’ira’a tumu a te Mesia²²—i teienei.

’O te fa’aho’ira’ahia te ha’amanara’a ’e te mana autahu’ara’a nō te ha’amaita’i i tāna mau tamari’i ato’a te toru o te huru tā’amura’a fafaura’a. I teie nei tau tu’ura’a, ’ua haere mai Ioane Bāpetizo ’e te mau ’āpōsetolo Petero, Iakobo ’e Ioane ’ei ve’a hanahana nā te Atua nō te fa’aho’i i tōna mana nō te autahu’ara’a.²³ E fa’anehenehe te autahu’ara’a a te Atua ’e tāna mau ’ōro’a i te mau aura’a i ni’a i te fenua nei ’e e nehenehe ho’i e tā’ati i te mau tā’amura’a fafaura’a i te ra’i.²⁴

E ti’a mau iho ā i te autahu’ara’a ’ia ha’amaita’i, mai te fānaura’a i te mēnema roa—mai te topara’a i’oa tamari’i i te ha’amaita’ira’a mēnema. E fa’aora te mau ha’amaita’ira’a autahu’ara’a, e tāmarū ’e e a’o. ’Ua riri te hō’ē metua tāne i tāna tamaiti ē tae roa a’era ’ua tae mai te here fa’a’ore hapa ’a hōro’a ai te metua tāne i tāna tamaiti i te hō’ē ha’amaita’ira’a autahu’ara’a. ’Ua pāpū ’ore te hō’ē tamāhine, ’o ’ōna ana’e te melo o te ’Ēkālesia i roto i tōna ’utuāfare, ’ua here ānei te Atua iāna ē tae roa a’era ’ua fāri’i ’oia i te hō’ē ha’amaita’ira’a autahu’ara’a fa’auruhia. Nā te ao nei, e mau patereareha hanahana ari’i e fa’aineine nei i te pae vārua nō te hōro’a i te mau ha’amaita’ira’a patereareha. ’Ia tu’u te patereareha i tōna rima i ni’a i tō ’outou upo’o, e putapū ’e e parau ’oia i te here o te Atua ia ’outou. E parau ’oia ’o vai tō ’outou ’ōpū i roto i te ’utuāfare o ’Īserā’ela. E fa’a’ite ’oia i te mau ha’amaita’ira’a nō ’ō mai i te Fatu. Ma te marū mātauhia, ’ua nā ’ō mai te vahine o te hō’ē patereareha nāhea tōna ’utuāfare e tītau nei i te Vārua i te mau mahana iho ā rā e hōro’a Pāpā i te mau ha’amaita’ira’a patereareha.

Te hope’a, e tae mai te mau ha’amaita’ira’a nō te tā’amura’a fafaura’a i te taime e pe’e tātou i te peropheta a te Fatu ma te pōpou i te orara’a fafaura’a hiero, i roto ato’a i te fa’aipoipora’a. E rahi hope ’e te mure ’ore te fafaura’a nō te fa’aipoipora’a ’ia mā’iti tātou i te mahana tāta’itahi i te ’oa’oa o tō tātou hoa fa’aipoipo ’e o te ’utuāfare nā mua i tō tātou iho nei. ’Ia riro « vau » ’ei « tātou », e tupu ’āmui tātou i te rahi. E pa’ari ’āmui tātou, e ’āpī ’āmui tātou. ’A ha’amaita’i ai tātou te tahi i te tahi i te roara’a o te hō’ē orara’a ha’amo’e ia tātou iho, e ’ite mai tātou i tō tātou mau tīa’ira’a ’e te mau ’oa’oa i te ha’amo’ahia i roto i te tau ’e te tau mure ’ore.

Noa atu e mea ta’a ’ē terā vaira’a ’e terā vaira’a, ’ia rave tātou i te mea ato’a e noa’a ia tātou, te mea maita’i roa a’e, ’e ’ia ani ateate tātou ’e ’ia ’imi ateate tātou i tōna tauturu i te roara’a o te ’ē’a, e arata’i te Fatu ia tātou, mai te au i tōna taime ’e tāna ravera’a, nā roto i te Vārua Maita’i.²⁵ E mea nati te mau fafaura’a fa’aipoipora’a maoti te mā’itira’a a nā ta’ata to’opiti—e ha’amana’ora’a i tō te Atua fa’atura ’e tō tātou ato’a ho’i fa’atura i te ti’amāra’a ’ia mā’iti, nā reira ato’a tōna tauturu ’ia ’imi tāhō’ē i te reira.

E putapūhia te mau hotu nō te tā’amura’a fafaura’a nā roto i te mau u’i i te ’utuāfare ’e i roto i te ’ā’au. E fa’ahōho’a ri’i au i te reira i to’u iho itera’a.

I te ’arapaera’a māua te tuahine Gong ’e tē ha’amata ra māua i te ’ōpua e fa’aipoipo, ’ua ’apo mai au i te ha’api’ira’a nō ni’a i te ti’amāra’a ’ia mā’iti ’e te mau fa’aotira’a. Nō te hō’ē tau, teie au i te hō’ē fenua nō te ha’api’ira’a ’e tei te tahi atu fenua ’oia, e piti ra’ituāta’a (continent) ta’a ’ē. Nō reira ïa e ti’a iā’u ia parau ē, e parau tahu’a tuatoro (doctorat) tā’u nō te mau aura’a nā te ara.

I tō’u anira’a : « E te Metua i te Ao ra, ’o Susan ānei tā’u e fa’aipoipo ? » E mana’o hau tei tae mai. I tō’u rā ha’api’ira’a ’ia pure mā te hina’aro mau : « E te Metua i te Ao ra, ’ua here au ia Susan ’e ’ua hina’aro vau e fa’aipoipo iāna. Tē parau fafau nei au ’ia riro ’ei hoa fa’aipoipo ’e ’ei metua tāne maita’i roa ’o tā’u e nehenehe e riro »—i tō’u ha’ara’a nō te rave i te mau fa’aotira’a maita’i roa a’e, i reira te mau ha’apāpūra’a pae vārua pūai roa a’e i te taera’a mai.

I teienei, ’o tō mātou mau rā’au tuatāpapara’a FamilySearch Gong ’e Lindsay, te mau ’ā’amu ’e te mau hōho’a tē tauturu nei ia mātou ’ia ’ite i te mau mea, ’ia nati ’e ’ia tā’amu ia mātou maoti te ’ohipa i orahia nā roto i te mau u’i tā’amura’a fafaura’a.²⁶ Ia mātou nei, teie te tahi mau tupuna fa’ahiahia :

’O te tupuna vāhine Alice Blauer Bangerter, tei anihia ’ia fa’aipoipo e toru taime i roto i te hō’ē noa mahana, ē muri a’era, ’ua ani ’oia i tāna tāne fa’aipoipo ’ia hāmani i te hō’ē ta’ata’ahira’a nō te fa’arapu i te pata ia nehenehe oia ia rara’a, ’e ia tai’o i te ho’e ā taime.

’O te tupuna tāne Loy Kuei Char tei āmo i tāna mau tamari’i i ni’a i tōna tua ’e te mau tauiha’a ri’i o tōna ’utuāfare i ni’a i te hō’ē ’āteni, ’e ’ua nā rotoroto ’oia i te vari ’arahu i ni’a i te motu Big Island nō Vaihī. Tē ha’amaita’i nei te mau u’i pūpūra’a ’e te fa’atusiara’a a te ’utuāfare Char, i tō mātou nei ’utuāfare.

’Ua toe noa mai ’o Gram Mary Alice Powell Lindsay ’e tāna e pae tamari’i i te pohe-tā’ue-ra’a tāna tāne ’e tāna tamaiti matahiapo i roto noa i te tahi ārea mahana. ’Ei vahine ’ivi 47 matahiti, ’ua atu’atu ’o Gram i tōna ’utuāfare ma te pāturuhia e te feiā fa’atere ’e te mau melo i reira. I roto i taua mau matahiti ra e rave rahi, ’ua parau fafau Gram i te Fatu ē, mai te mea e tauturu te Fatu iāna, e’ita roa ’oia e amuamu. ’Ua tauturu te Fatu iāna. ’Aita ’oia i amuamu noa a’e.

E au mau taea’e, e au mau tuahine, mai tei ha’apāpūhia e te Vārua Maita’i, e fa’atumuhia te mau mea maita’i ato’a ’e te mure ’ore i ni’a i te vai-pāpū-ra’a te Atua tō tātou Metua mure ’ore ’e tāna Tamaiti, ’o Iesu Mesia ’e tāna tāra’ehara. ’O tō tātou Fatu Iesu Mesia te ārai nō te fafaura’a ’āpī. ’O te fā ’e te fafaura’a o te Buka a Moromona te fa’a’ite-pāpū-ra’a nō Iesu Mesia.²⁷ Nā roto i te tapura’a ’e te fafaura’a, ’ua ’ōpuahia te mana nō te autahu’ara’a tei fa’aho’ihia mai nō te ha’amaita’i i te mau tamari’i ato’a nā te Atua, nā roto ato’a i te fafaura’a nō te fa’aipoipora’a, te mau u’i ’utuāfare ’e te mau ha’amaita’ira’a ta’ata hō’ē.

’Ua parau tō tātou Fa’aora : « ’O vau nei te Alepha ’e te Omega, ’o Iesu te Fatu ; ’oia ïa, ’o vau nei ho’i ’oia, te ha’amatara’a ’e te fa’ahope’a, te Fa’aora nō tō te ao nei ».²⁸

Tei ia tātou i te ha’amatara’a, tei ia tātou nei ’oia, i roto i tā tātou ato’a mau tā’amura’a fafaura’a, ē tae noa atu i te hope’a. ’O tā’u ïa e fa’a’ite pāpū nei, i te i’oa mo’a o Iesu Mesia, ’āmene.