E piti fa’auera’a rahi

E ha’amata vau nā ni’a i te mea tā Iesu i ha’api’i ē, ’o nā ture rahi e piti.

« Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a.

« ’O te ture mātāmua teie ’e te hau i te rahi.

« ’E mai te reira ato’a te piti, e aroha atu ’oe i tō ta’ata tupu, mai tō aroha ia ’oe iho na. »⁴

Te aura’a ra, te fa’auehia nei tātou ’ia here i te mau ta’ata ato’a, inaha tē ha’api’i nei te parabole a Iesu nō te ta’ata samaria ē, e ta’ata tupu te mau ta’ata ato’a nō tātou.⁵ Terā rā, ’eiaha tō tātou ha’apa’o i teie fa’auera’a piti ’ia fa’aha’amo’e ia tātou i te ture mātāmua, ’ia hina’aro i te Atua ma tō tātou ’ā’au, te vārua ’e te mana’o ato’a. E fa’a’ite tātou i te reira here nā roto i te « ha’apa’o[ra’a] i [tāna] mau fa’auera’a. »⁶ Tē tītau nei te Atua ia tātou ’ia ha’apa’o i tāna mau fa’auera’a nō te mea, nā roto ana’e i te reira ha’apa’o, ’e tae noa atu i te tātarahapa, e ti’a ai ia tātou ’ia ho’i e ora i mua i tōna aro ’e ’ia maita’i roa mai iāna ra.

I roto i tāna a’ora’a i te feia ’āpī pa’ari o te ’Ēkālesia ’aita i maoro a’enei, ’ua paraparau te peresideni Russell M. Nelson i te mea tāna i parau ra ē, te « natira’a pa’ari i rotopū i te here o te Atua ’e tāna mau ture. »⁷ Te mau ture e tano maita’i i ni’a i te mau fifi o te mau ta’ata e parau nei ē, e māhū vahine, e māhū tāne, e petea rātou, ’o te ture ïa a te Atua nō ni’a i te fa’aipoipora’a ’e tōna ’āpiti, te vi’ivi’i ’ore. E mea faufa’a nā mea e piti i roto i te fa’anahora’a nō te fa’aorara’a a tō tātou Metua i te ao ra nō tāna mau tamari’i. Mai tā peresideni Nelson i ha’api’i : «Te tumu o te mau ture a te Atua ’o tōna ïa here fāito ’ore nō tātou ’e tōna hina’aro ’ia riro mai tātou mai tāna e hina’aro. »⁸

’Ua ha’api’i te peresideni Nelson : « E rave rahi fenua tei ha’amana i te fa’aipoipora’a i te feiā hō’ē ā ’āpeni. ’Ei melo nō te ’Ēkālesia, tē fa’atura nei tātou i te mau ture o te fenua, tae noa atu i te fa’aipoipora’a tīvira. ’Āre’a rā te parau mau, i te ’ōmuara’a ra… ’ua fa’ata’ahia te fa’aipoipora’a nā te Atua ! ’E tae mai i teie mahana ’ua fa’ata’a mai ’oia i te reira, ’ia ravehia i rotopū i te hō’ē tāne ’e te hō’ē vahine. ’Aita te Atua i taui i tāna tātarara’a i te parau nō te fa’aipoipora’a ».

Tē parau fa’ahou nei te peresideni Nelson : « ’Aita ato’a te Atua i taui i tāna ture nō te vi’ivi’i ’ore. ’Aita te mau tītaura’a nō te tomo i roto i te hiero i taui. »⁹

’Ua fa’aha’amana’o mai te peresideni Nelson ia mātou pā’āto’a ē, « tā mātou misiōni ’ei mau ’āpōsetolo, ’o te ha’api’ira’a ïa i te parau mau ana’e. ’Aita te reira misiōni e hōro’a [i te mau ’āpōsetolo] i te mana nō te fa’ahuru ’ē i te ture a te Atua. »¹⁰ Nō reira, e au mau tuahine, tītauhia i te feiā fa’atere o te ’Ēkālesia ’ia ha’api’i i te mau taime ato’a i te faufa’a hō’ē roa o te fa’aipoipora’a i rotopū i te hō’ē tāne ’e te hō’ē vahine ’e tōna ’āpiti, te ture nō te vi’ivi’i ’ore.

Te ’ohipa a Te ’Ēkālesia a Iesu Mesia i te Feiā Mo’a i te mau Mahana Hope’a nei i te hope’a roa, ’o te fa’aineinera’a ïa i te mau tamari’i a te Atua nō te bāsileia tiretiera, nō tōna hanahana teitei roa a’e, te fa’ateiteira’a ’aore rā te ora mure ’ore. Hō’ē noa iho rāve’a e roa’a ai tāua hope’ara’a teitei roa a’e, nā roto ïa i te fa’aipoipora’a mure ’ore.¹¹ Tei roto i te ora mure ’ore te mau mana poiete tei roto i te te tāhō’ēra’a te tāne ’e te vahine¹²—tā te heheura’a nō teie anotau e fa’ata’a nei ’ei « fa’atupu-noa-ra’a o te hua’ai ē a muri ē a muri noa atu ».¹³

I roto i tāna a’ora’a i te feiā ’āpī pa’ari, ’ua ha’api’i te peresideni Nelson : « ’Ia ha’apa’o ’outou i te mau ture a te Atua, e pāruru te reira ia ’outou ’a haere ai ’outou i mua ’e, penei a’e, tae noa atu i te fa’ateiteira’a ».¹⁴—’oia ho’i, e riro mai te Atua te huru, ma te orara’a fa’ateiteihia ’e te fāito pūai o tō tātou nā metua i te ra’i. Terā te hope’ara’a tā tātou e hina’aro nō te feiā ato’a tā tātou e here nei. Nō taua here nei, e’ita tā tātou e nehenehe e vaiiho i te reira here ’ia nā ni’a a’e i te mau fa’auera’a ’e i te fa’anahora’a ’e te ’ohipa a te Atua, tā tātou i ’ite ē, e hōpoi mai te reira i te ’oa’oa rahi i te feiā tā tātou i here.

Terā rā, e rave rahi tā tātou e here nei, ’e tae noa atu i te feiā tei fāri’i i te ’evanelia i fa’aho’ihia mai, tei ’ore e ti’aturi ’aore rā tei mā’iti ’eiaha e pe’e i te mau fa’auera’a a te Atua nō ni’a i te fa’aipoipora’a ’e te ture nō te vi’ivi’i ’ore. E aha ïa tō rātou parau ?

Tē fa’a’ite nei te ha’api’ira’a tumu a te Atua ē, e mau tamari’i ana’e tātou nāna ’e ’ua hāmani ’oia ia tātou ’ia noa’a tō tātou ’oa’oa.¹⁵ Tē ha’api’i nei te mau heheura’a nō teie anotau ē, ’ua hōro’a mai te Atua i te hō’ē fa’anahora’a nō te tāmatara’a tāhuti nei i reira te mau ta’ata ato’a e nehenehe ai e mā’iti i te ha’apa’o nō te ’imi i tāna mau ha’amaita’ira’a teitei, ’aore rā e rave i te mau fa’aotira’a ’o tē arata’i atu i te hō’ē o te mau bāsileia hanahana iti a’e.¹⁶ Nō te here rahi o te Atua i tāna mau tamari’i pā’āto’a, taua mau bāsileia iti a’e, e mau bāsileia fa’ahiahia ā, ’o te ’ore e hāro’aro’ahia e tō te tāhuti nei.¹⁷ ’Aua’a a’e te tāra’ehara a Iesu Mesia ’e tupu ai teie mau mea ato’a, « ’o tē fa’ahanahana nei i te Metua, ’e ’o tē fa’aora nei i te mau ’ohipa ato’a a tōna nā rima. »¹⁸

’Ua paraparau atu na vau nō te fa’auera’a mātāmua, e aha te parau nō te fa’auera’a piti ? Nāhea tātou i te ha’apa’o i te fa’auera’a ’ia here i tō tātou ta’ata tupu ? Tê tītau nei mātou i tō tātou mau melo ē, ’o rātou ’o tē pe’e i te mau ha’api’ira’a ’e te mau ’ohipa a te māhū vahine, te māhū tāne, tē ta’oto i te tāne ’e i te vahine ’aore rā ’o tē taui i te ’āpeni, ’ia ha’apa’ohia rātou ma te here tā tō tātou Fa’aora i fa’aue mai ’ia fa’a’ite i tō tātou mau ta’ata tupu ato’a. Nō reira, i te ha’amanara’ahia te fa’aipoipora’a i te feiā hō’ē ā ’āpeni i te Fenua Marite, ’ua parau te Peresidenira’a Mātāmua ’e te pupu nō te Tino ’Ahuru Ma Piti : « Tē ha’api’i mai nei te ’evanelia a Iesu Mesia ia tātou ’ia here ’e ia hāmani maita’i i te mau ta’ata ato’a—noa atu ē, ’aita tō tātou mana’o e tū ra. Tē ha’apāpū nei mātou ē, mai te peu noa atu e ti’a mai te tahi ta’ata ma te ture ’e ’aore rā te fa’aotira’a a te fare ha’avāra’a e ha’amana ra i te fa’aipoipora’a i te feiā hō’ē ā ’āpeni, ’eiaha roa atu ’oia ’ia hi’o-’ē-hia ».¹⁹

’Eiaha roa ato’a tātou e hāmani ’ino i te feiā ’aita e fāri’i i tō tātou mau ti’aturira’a ’e te mau fafaura’a.²⁰ Te vāhi pe’ape’a, te mau ta’ata e vai nei i roto i terā vaira’a, tē vai noa ra ā tō rātou mana’o ē, tē tu’uhia nei rātou i te hiti ’e te tāu’a-’ore-hia nei rātou nā te tahi mau melo ’e te mau feiā fa’atere i roto i tō rātou ’utuāfare, te pāroita ’e te titi. Tītauhia ia tātou pā’āto’a ’ia tūtava ’ia hāmani maita’i a’e ’e ’ia fa’atura a’e.

’Aita tātou i ta’a e aha te tumu i ta’a ’ē ai tā tātou mau tāmatara’a i roto i tō tātou orara’a tāhuti nei. ’Ua ’ite rā tātou ē, e tauturu te Atua ia tātou tāta’itahi ’ia upo’oti’a i ni’a i te reira mau tāmatara’a mai te mea ē, e ’imi tātou i tāna tauturu ma te ’ā’au tae mau. I muri a’e i tō tātou mamaera’a ’e te tātarahapara’a i te mau ’ōfatira’a ture tei ha’api’ihia ia tātou, ’ua fa’ata’ahia tātou nō te hō’ē bāsileia hanahana. Nā te Fatu e rave i te ha’avāra’a rahi ’e te hope’a, ’o ’oia ana’e ho’i tei mau i te ’ite, te pa’ari ’e te aroha i tītauhia nō te ha’avā ia tātou tāta’itahi.

I roto i tāua ārea taime ra, tītauhia ia tātou ’ia tāmata i te ha’apa’o i nā ture rahi e piti. Nō te rave i te reira, e ha’amau tātou i te hō’ē rēni i rotopū i te ture ’e te here—te ha’apa’ora’a i te mau fa’auera’a ’e te haerera’a nā ni’a i te ’ē’a o te fafaura’a, ’a here noa ai i tō tātou ta’ata tupu i ni’a i te ’ē’a. E tītau tāua haerera’a ra ia tātou ’ia ’imi i te fa’aurura’a nō ni’a i te mea e pāturu ’e i te mea e pāto’i, ’e nāhea ’ia here ’e ’ia fa’aro’o ma te fa’atura ’e ’ia ha’api’i i terā vaira’a. E tītau terā haerera’a tā tātou ’eiaha tātou ’ia fati i ni’a i te mau fa’auera’a, e fa’a’ite rā i te hāro’aro’a ’e te here rahi. E tītau terā haere’a ’ia ha’apa’o maita’i i te mau tamari’i ’o tei ’ore ā i pāpū i tō rātou orara’a ’āpeni, ma te ’ore e topa ’oi’oi i te i’oa pi’i, inaha e iti mai teie huru nō te rahira’a o te mau tamari’i i muri iho.²¹ E pāto’i terā haere’a tā tātou i te tihepura’a i te ta’ata i rāpae i te ’ē’a nō te fafaura’a ma te fāri’i ’ore ato’a i te tahi noa atu ta’ata ’ia arata’i ’ē i te ta’ata i te Fatu. E ha’amana’o tātou i roto i teie mau mea ato’a ē, e fafau mai te Atua i te ti’aturira’a ’e i te ’oa’oa rahi ’e i te mau ha’amaita’ira’a i te feiā ato’a e ha’apa’o i tāna mau fa’auera’a.

E te mau metua vahine ’e te mau metua tāne ’e tātou pauroa, e hōpoi’a nā tātou ’ia ha’api’i i nā fa’auera’a rahi e piti. Nō te mau vahine o te ’Ēkālesia, ’ua fa’ahiti te peresideni Spencer W. Kimball i te reira hōpoi’a i roto i teie parau tohu rahi : « Hō’ē tuha’a rahi o te tupura’a o te ’Ēkālesia i te mau mahana hope’a nei, nō te mea ïa, e rave rahi vahine maita’i o te ao nei… e tomo rahi mai nei i roto i te ’Ēkālesia. E tupu te reira i te fāito e fa’a’ite atu ai te mau vahine o te ’Ēkālesia i te parau ti’a ’e i te pāpūra’a [i te parau] i roto i tō rātou orara’a ’e i te fāito e hi’ohia ai te mau vahine o te ’Ēkālesia ’ei mau vahine ta’a maita’i ’e te ta’a ’ē… i te mau vahine o te ao nei… Nō reira e riro ïa te mau vahine hi’ora’a maita’i nō te ’Ēkalesia ’ei pūai pāpū i roto i te tupura’a rahi ’e te tupura’a vārua o te ’Ēkalesia i te mau mahana hope’a nei. »²¹

Nō ni’a i taua parau tohu ra, ’ua parau te peresideni Russell M. Nelson ē, « Te mahana tā te peresideni Kimball i ’ite ātea, ’o teie ïa mahana. ’O ’outou te mau vahine tāna i ’ite ātea ».²² Tātou tei fa’aro’o i taua parau tohu ra ’a 40 matahiti i ma’iri, ’aita tātou i mana’o i tāua taime ra ē, i rotopū i te feiā tā te mau vahine nō teie nei ’Ēkālesia e fa’aora atu, ’o to rātou iho ïa mau hoa rahi ’e tō rātou ’utuāfare ’o tē ’umehia nei e te mau hina’aro rahi o teie nei ao, ’e tae noa atu te mau fa’ahuru-’ē-ra’a a te diabolo. Tā’u pure ’e tā’u ha’amaita’ira’a ’oia ho’i, ’ia ha’api’i ’outou ’e ’ia ha’a nō te fa’atupu i tāua parau tohu ra, nā roto i te i’oa o Iesu Mesia ra, ’āmene.