Te mo’ara’a ’e te fa’anahora’a nō te ’oa’oa

E au mau taea’e, e au mau tuahine, ’ua pure au nō te mana nō te tauturu ia ’outou i roto i tā ’outou iho ’imira’a i te ’oa’oa. Tē vai ra paha tei nava’i a’ena te ’oa’oa, e mea pāpū rā ’aita e ta’ata e pāto’i i te ’oa’oa rahi atu ā ’ia pūpūhia mai. E hina’aro iho ā te ta’ata e fāri’i i te ’oa’oa vai maoro tei pūpū-pāpū-hia mai.

’O tā te Metua i te Ao ra ïa ; tāna Tamā’iti here, ’o Iesu Mesia ; ’e te Vārua Maita’i ho’i i pūpū i te mau tamari’i vārua ato’a a te Metua i te Ao ra e ora ra i roto i teie nei ao ’e ’o tē ora mai ’e ’o tei ora na. I te tahi taime e pi’ihia te reira pūpūra’a te fa’anahora’a nō te ’oa’oa. Nā te peropheta Alama i pi’i i te reira i’oa ’a ha’api’i ai ’oia i tāna tamaiti tei rapu roa i roto i te ’oto nō te hara. ’Ua ’ite Alama ē e’ita roa atu te ’ino i te ’oa’oa nō tāna tamaiti—’e nō te mau tamari’i ato’a a te Metua i te Ao ra.¹

’Ua ha’api’i ’oia i tāna tamaiti ē, ’o te fa’arahira’a i te mo’ara’a te ’ē’a hō’ē roa nō te ’oa’oa. ’Ua parau pāpū atu ’oia ē, e rahi atu ā te mo’ara’a nā roto i te tāra’ehara a Iesu Mesia ’o tē tāmā ’e ’o tē ha’amaita’i roa ia tātou.² E mea nā roto ana’e i te fa’aro’o ia Iesu Mesia ’e te tātarahapara’a tāmau ’e te ha’apa’ora’a i te mau fafaura’a e ti’a ai ia tātou ’ia tītau i te ’oa’oa vai maoro tā tātou pā’āto’a e hina’aro roa nei ’ia ’ite ’e ’ia tāpe’a mai.

Tā’u pure i teie mahana, ’oia ho’i, ’ia ti’a iā’u ’ia tauturu ia ’outou ’ia māramarama ē, e tae mai te ’oa’oa rahi a’e nā roto mai i tō ’outou iho mo’ara’a rahi a’e, ’ia ’ohipa ho’i ’outou i ni’a i terā ti’aturira’a. I muri iho vau e fa’a’ite atu ai i tā’u iho i ’ite nō ni’a i te mea e ti’a ia tātou ’ia rave ’ia noa’a ia tātou terā hōro’a nō te mo’ara’a rahi atu ā ’e te rahi atu ā.

Tē ha’api’i nei te mau pāpa’ira’a mo’a ē, ta’a ’ē noa atu te tahi atu mau mea, e nehenehe tātou e ha’amo’ahia ’aore rā e rahi atu ā te mo’ara’a, i te taime e fa’a’ohipa tātou i te fa’aro’o i te Mesia,³ e fa’a’ite i tō tātou ha’apa’o,⁴ e tātarahapa,⁵ e fa’atusia nōna,⁶ e fāri’i i te mau ’ōro’a mo’a ’e e ha’apa’o i tā tātou mau fafaura’a iāna.⁷ Te tītaura’a nō te hōro’a o te mo’ara’a, ’o te ha’eha’a ïa,⁸ te marū,⁹ ’e te fa’aoroma’i.¹⁰

Hō’ē taime tō’u hina’aro-rahi-atu-ā-ra’a i te mo’ara’a, tei roto ïa i te hiero nō Roto Miti. ’Ua tomo vau i roto i te hiero nō te taime mātāmua, ’aore re’a mea tei parauhia mai e aha tō roto. ’Ua ’ite tō’u mata i terā mau parau i ni’a i te fare : « Ha’amo’ahia i te Fatu » ’e « Te Fare o te Fatu ». E mana’o ’ana’anatae rahi roa tō’u. ’Ua uiui ra te mana’o ē, ’ua ineine ānei au nō te tomo atu i roto.

’O tō’u metua vahine ’e tō’u metua tāne i mua iā’u, ’a tomo ai mātou i roto i te hiero. ’Ua anihia mai ’ia fa’a’ite i tā mātou parau fa’ati’a hiero, ha’apāpūra’a nō tō mātou ti’amāra’a.

’Ua mātau tō’u nā metua i te ta’ata i te vāhi hi’opo’ara’a parau fa’ati’a. ’Ua fa’aea ri’i rāua nō te paraparau iāna. ’Ua haere atu ’o vau ana’e i roto i te hō’ē piha rahi e mea ’ana’ana te mau mea ato’a ’e te ’uo’uo. ’Ua hi’o vau i te aroaro e mea teitei roa e au ra mai te ra’i vētea. I terā taime, ’ua puta mai te mana’o pāpū ē, ’ua haere a’ena mai au i’ō nei.

I muri a’e rā, ’ua fa’aro’o vau i te hō’ē reo māru mau—e ’ere tō’u reo. Teie taua mau parau marū ra : « ’Aita roa atu ’oe i tae a’ena mai i’ō nei. Tē ha’amana’o ra ’oe i te hō’ē taime hou tō ’oe fānaura’a. ’Ua vai na ’oe i roto i te hō’ē vāhi mo’a mai teie. ’Ua puta mai te mana’o ia ’oe tē haere mai ra te Fa’aora i te vāhi i reira ’oe i te ti’ara’a. ’E ’ua fāri’i ’oe i te ’oa’oa nō tō ’oe hina’aro rahi e hi’o iāna ».

E taime poto roa te tupura’a teie ’ohipa i roto i te hiero nō Roto Miti. Terā rā, tē fa’atupu noa nei ā taua ha’amana’ora’a ra i te hau ’e te ’oa’oa ’e te pōpou marū.

E rave rahi ha’api’ira’a tā’u i ’apo mai i terā mahana. Te hō’ē, ’oia ho’i, e parauparau te Vārua Maita’i ma te reo ha’iha’i ’e te marū. E nehenehe tā’u e fa’aro’o iāna i te taime e hau pae vārua i tō’u ’ā’au. E fa’atae mai ’oia i te mana’o ’oa’oa ’e te pāpū ē, tē rahi noa atu ra tō’u mo’ara’a. ’E ’ua fa’atae noa mai te reira i te ’oa’oa mai tā’u i putapū i terā taime mātāmua i roto i te hiero o te Atua.

’Ua ’ite ’outou i roto i tō ’outou iho orara’a ’e te orara’a o te ta’ata, i te temeio nō te ’oa’oa tei tae mai nā roto i te mo’ara’a tē rahi noa atu ra, te riro-rahi-atu-ā-ra’a mai te Fa’aora te huru. I te mau hepetoma i ma’iri a’enei, tei te hiti ro’i au o te tahi mau ta’ata tei fa’aruru i te pohe ma te fa’aro’o hope i te Fa’aora ’e ma te hōho’a mata ’oa’oa.

Hō’ē, ’o te hō’ē ïa ta’ata tei ha’atihia e tōna ’utuāfare. Tē paraparau marū noa ra rāua tāna vahine i te tomora’a atu māua tā’u tamaiti. E rave rahi matahiti mātou i te mātaura’a. ’Ua ’ite au i te tāra’ehara a Iesu Mesia i te ’ohipara’a i roto i tō rāua orara’a ’e i roto i te orara’a o te mau melo o tō rāua ’utuāfare.

’Ua mā’iti ’āmui rāua e fa’aea i te mau tauto’ora’a rapa’aura’a e tāpe’a i tōna ora. E mana’o hau tei tupu ’a paraparau ai ’oia ia māua. E mata ’ata’ata tōna ’a fa’a’ite ai ’oia i tōna māuruuru nō te ’evanelia ’e nō te maita’i tāmā o te reira i ni’a iāna ’e i ni’a i tōna ’utuāfare here. ’Ua parau mai ’oia nō te mau matahiti ’oa’oa tōna tāvinira’a i te hiero. I tāna anira’a, ’ua fa’atāhinu tā’u tamaiti i tōna upo’o i te hinu tei ha’amo’ahia. Nā’u i ha’amau i te fa’atāhinura’a. ’A nā reira ai au, e mana’o pāpū tei tae mai iā’u e parau iāna ē, ’ua fātata ’oia i te ’ite i tōna Fa’aora, mata ’e mata.

’Ua parau atu vau iāna ē, e putapū ’oia i te ’oa’oa ’e te here ’e te mana’o fāri’i o te Fa’aora. E mata ’oa’oa ’e te hau tōna ’a fa’aru’e ai māua i te piha. Tāna mau parau hope’a iā’u, ’oia ho’i, « E parau ia Kathy ’ua here au iāna ». E rave rahi matahiti tō tā’u vahine ’o Kathleen fa’aitoito-noa-ra’a i te mau u’i o tōna ’utuāfare ’ia fāri’i i te anira’a a te Fa’aora ’ia haere mai iāna ra, ’ia rave ’e ’ia ha’apa’o i te mau fafaura’a mo’a ’e ’ia fa’aineine ia rātou nō te ’oa’oa e tae mai nā roto i te reira mo’ara’a rahi a’e.

Tau hora i muri mai, ’ua fa’aru’e mai ’oia. Te mau hepetoma i muri iho i tōna pohera’a, ’ua ’āfa’i mai tāna vahine ’ivi i te tahi tao’a hōro’a nā māua tā’u vahine. E mata ’ata’ata tōna ’a paraparau ai mātou. ’Ua au ’oia i te paraura’a ē : « ’Ua mana’o vau ē, e ’oto roa vau ’e e vai mo’emo’e. E ’oa’oa rahi rā tō’u. E mea tano ānei i tō ’oe mana’o ? »

Nō te mea ’ua ’ite au i tōna here i tāna tāne fa’aipoipo ’e tō rāua to’opiti ’ite, te here ’e te tāvinira’a i te Fatu, ’ua nā ’ō atu vau iāna ē, tōna mau mana’o ’oa’oa, e hōro’a ïa tei parauhia iāna, i te mea ē, maoti tāna tāvinira’a ha’apa’o maita’i, ’ua fa’arahihia tōna mo’ara’a. Maoti tōna mo’ara’a i noa’a ai iāna te reira ’oa’oa.

Tē vai ra paha vetahi e fa’aro’o mai nei ’e tē uiui ra tō rātou mana’o : « Nō te aha pa’i ’aita tā’u terā mana’o hau ’e te ’oa’oa tei parauhia nō te feiā ha’apa’o maita’i ? ’Ua vai ha’apa’o maita’i noa vau i roto i te ’ati hāhano, ’aita rā terā mana’o ’oa’oa ».

’Ua fa’aruru ato’a te peropheta Iosepha Semita i te reira tāmatara’a. ’Ua pure ’oia nō te tāmarūra’a i te maura’a ’oia i te fare tāpe’ara’a nō Liberty i Missouri. ’Ua ha’apa’o maita’i noa ’oia i te parau a te Fatu. ’Ua rahi mai tōna mo’ara’a. Noa atu rā, e au ē, ’aita te ’oa’oa i fa’ati’ahia mai nāna.

’Ua ha’api’i te Fatu iāna i te ha’api’ira’a nō te fa’aoroma’i ’o tē tītauhia ia tātou pā’āto’a ’ia tae i te hō’ē taime, ’e penei a’e nō te hō’ē tau maoro, i roto i tā tātou mau tāmatara’a tāhuti nei. Teie te poro’i a te Fatu i tāna peropheta ha’apa’o maita’i ’e te māuiui :

« ’E mai te mea e hurihia atu ’oe i roto i te ’ārua, ’e ’aore rā i roto i te mau rima o te feiā taparahi ta’ata, ’e e tuuhia atu te utu’a pohe i ni’a ia ’oe na ; mai te mea e hurihia atu ’oe i roto i te moana ra ; mai te mea e tāpo’ipo’i mai te ’are tūpa’ipa’i ia ’oe na ; mai te mea e riro mai te mau vero pūai ’ei ’enemi nō ’oe na ; mai te mea e ha’aputuputu mai te mau ra’i i te pōuri, ’e e ’āmui mai te mau mea ri’i tumu nō te fa’aapiapi i te ’ē’a ; ’e tei hau roa atu ho’i, mai te mea e ha’amama mai ai nā ta’a nō hade iho i te vaha i ha’amama-roa-hia i te tītaura’a ia ’oe na, ’a ’ite mai ’oe, e ta’u tamaiti nei ē, e noa’a ia ’oe te ’ite i te ’ohipa nā roto i teie mau mea ato’a nei, ’e e riro ho’i ’ei maita’i nō ’oe na.

« ’Ua haere roa atu te Tamaiti a te Ta’ata i raro a’e i teie mau mea ato’a ra. ’Ua hau ānei ’oe iāna ra ?

« Nō reira, ’a tāpe’a noa na ’oe i tō haere’a, ’e e vai noa te autahu’ara’a ia ’oe na ; nō te mea ’ua fa’ata’a-roa-hia tō rātou ra mau ’ōti’a, e ’ore roa e nehenehe ia rātou ’ia mareva atu ā. ’Ua ’itea tō ’oe pu’e mahana, ’e e ’ore roa e ha’apotohia tō ’oe na mau matahiti ; nō reira, ’eiaha e mata’u i tā te ta’ata nei e rave, nō te mea e vai noa te Atua i pīha’i iho ia ’oe na ē a muri ē a muri noa atu ».¹¹

’O te ha’api’ira’a māramarama ato’a tā te Fatu i hōro’a ia Ioba, tei ’aufau i te ho’o teimaha, nō te fa’ati’a i te Tāra’ehara ’ia fa’ariro iāna ’ei mea mo’a atu ā. ’Ua ’ite tātou e mea mo’a Ioba, nā roto i te ’ōmuara’a nō ni’a iāna : « Tei te fenua ra o Uza te hō’ē ta’ata, ’o Ioba te i’oa ; e ta’ata parau ti’a ’e te paieti, i te mata’ura’a i te Atua, ’e te fa’aru’era’a i te ’ino ».¹²

’Ei reira, ’ua ’ere Ioba i tāna faufa’a, tōna ’utuāfare ’e tae noa atu i te ea maita’i. Tē ha’amana’o ra paha ’outou ē, ’ua fē’a’a Ioba ē e tae mai te ’oa’oa rahi a’e nā roto i te mo’ara’a rahi a’e tāna i ’āpī nā roto i te ’ati. Nō Ioba, e au ē, e ’oto tei tae mai i te mo’ara’a.

Nō reira ’ua hōro’a te Fatu i te hō’ē ā ha’api’ira’a fa’atītī’aifaro ia Ioba mai tāna i hōro’a ia Iosepha Semita. ’Ua fa’ahi’o ’oia ia Ioba i tōna vaira’a ’oto ma te mata pae vārua. ’Ua parau ’oia :

« ’A tātua na i tō tauupu mai tā te ta’ata ra ; e ui na vau ia ’oe, ’e nā ’oe e fa’a’ite mai iā’u.

« I hea ’oe iā’u i ha’amau i te tumu o te fenua nei ? ’a fa’a’ite mai na, penei a’e tē ’ite ra ’oe.

« Nā vai i tu’u i te fāitora’a, ’ua ’ite ho’i ’oe na ? ’e nā vai i tata’i i te taura nā ni’a iho ?

« I ha’amauhia tōna niu i ni’a i te aha ? ’e nā vai i tu’u i te ’ōfa’i tihi ;

« ’A fatu ato’a ai te mau feti’a po’ipo’i i te hīmene, ’e ’ua pi’i noa te mau tamari’i ato’a a te Atua i te ’oa’oa ? »¹³

I muri iho, i te tātarahapara’a Ioba nō te paraura’a e ’ohipa ti’a ’ore tā te Atua, ’ua ti’a ia Ioba ’ia ’ite i tāna mau tāmatara’a ma te hi’ora’a teitei a’e ’e te mo’a a’e. ’Ua tātarahapa ’oia.

« ’Ua parau atu ra Ioba ia Iehova, nā ’ō atu ra :

« ’Ua ’ite au ē, e pūai hope tō ’oe, ’e e ’ore tā ’oe i ’ōpua ra e ti’a ’ia fa’a’ore.

« ’O vai teie e ha’amo’e i te parau e ’ore e taea ’e te ’ite ra ? ’Ua parau vau i tei ’ore i ’itea e au ra ; e parau ta’a ’ē, e ’ore e taea, e ’ore e ’itea e au.

« E fa’aro’o mai ’oe, i tenāna, ’e nā’u e parau atu ; e ui noa na vau ia ’oe, ’e nā ’oe e fa’a’ite mai iā’u.

« ’Ite a’enei au ia ’oe i te ’ite tari’a nei, teie nei rā, tē hi’o nei ta’u mata ia ’oe.

« E teie nei, tē fa’afaufau nei au iā’u iho. ’E tē tātarahapa nei au i raro i te repo ’e te rehu auahi ».¹⁴

I muri iho tō Ioba tātarahapara’a ’e te rahi-atu-ā-ra’a tōna mo’ara’a nā roto i te reira, ’ua ha’amaita’i te Fatu iāna i te mea hau atu i tāna i pau. Penei a’e rā te ha’amaita’ira’a rahi roa a’e nō Ioba, ’o te rahi-atu-ā-ra’a ïa tōna mo’ara’a nā roto i te ’ati ’e te tātarahapara’a. ’Ua noa’a iāna te ’oa’oa rahi atu ā i te toe’a o tōna mau mahana orara’a.

E’ita te mo’ara’a rahi atu ā e tae mai nā roto noa i te anira’a. E tae mai rā nā roto i te ravera’a i te mea e tītauhia, ’ia taui te Atua ia tātou.

’Ua hōro’a te peresideni Russell M. Nelson i te parau a’o maita’i roa a’e, i tō’u hi’ora’a, nō ni’a i te haerera’a i mua i ni’a i te ’ē’a nō te fafaura’a ē tae atu ai i te mo’ara’a rahi atu ā. ’Ua fa’a’ite mai ’oia i te ’avei’a ’a parau ai ’oia ē :

« ’A tāmata i te mana ha’apūai o te tātarahapa tāmahana—i te ha’amaita’i-atu-ā-ra’a i tā tātou ’ohipa ’e ia tātou iho nei, i te mahana tāta’itahi.

« ’Ia mā’iti tātou ’ia tātarahapa, tē mā’iti nei ïa tātou ’ia taui ! Tē fa’ati’a nei tātou i te Fa’aora ’ia taui i tō tātou hōho’a ’ei hōho’a maita’i roa a’e. Tē mā’iti nei tātou e tupu i te rahi i te pae vārua ’e e fāri’i i te ’oa’oa—te ’oa’oa nō te tāra’ehara i roto iāna. ’Ia mā’iti tātou ’ia tātarahapa, tē mā’iti nei ïa tātou ’ia riro rahi atu ā mai ia Iesu Mesia te huru ! »

’Ua nā ’ō fa’ahou te peresideni Nelson ’ei fa’aitoitora’a nā tātou i roto i tā tātou mau tauto’ora’a e ha’amo’a atu ā ia tātou : « ’Aita te Fatu e tītau nei i te fāito maita’i roa ia tātou i teie taime… Tē tītau nei rā ’oia ia tātou ’ia rahi atu ā tō tātou vi’ivi’i ’ore. ’O te tātarahapa tāmahana te ’ē’a i te vi’ivi’i ’ore ».¹⁵

’Ua tauturu ato’a mai te peresideni Dallin H. Oaks iā’u, i roto i te hō’ē ’āmuira’a nā mua a’e, ’ia ’ite pāpū a’e nāhea tō tātou mo’ara’a i te rahi atu ā ’e nāhea tātou ’ia ’ite ē, tē haere ra tātou i mua. ’Ua nā ’ō ’oia : « Nāhea tātou i te manuia i te pae vārua ? Nāhea tātou i te tae i terā fāito mo’ara’a e ti’a ai i te Vārua Maita’i ’ia pārahi tāmau noa ia tātou nei ? E aha atu ra ïa tā tātou hi’ora’a ’e tā tātou hi’opo’ara’a i te mau mea o teie nei ao ma te hi’ora’a o te tau mure ’ore ? »¹⁶

E ha’amata te pāhonora’a a te peresideni Oaks nā roto i te fa’aro’o rahi a’e ia Iesu Mesia ’ei Fa’aora here nō tātou. E arata’i te reira ia tātou ’ia ’imi i te fa’a’orera’a hara i te mau mahana ato’a ’e ’ia ha’amana’o iāna i te mau mahana ato’a nā roto i te ha’apa’ora’a i tāna mau fa’auera’a. E rahi roa atu ā te fa’aro’o ia Iesu Mesia ’ia rave tāmahana tātou i te fa’a’amua i tāna parau.

Tē hōro’a nei te hīmene « E te Fatu here » i te hō’ē huru pure nō te ani i te tauturu ’ia rahi atu ā tō tātou mo’ara’a. Tē parau nei te ta’ata pāpa’i ē, terā mo’ara’a tā tātou e tītau nei, e hōro’a ïa nō ’ō mai i te Atua here, tei hō-mai-hia i terā taime ’e terā taime, hope noa atu tō tātou itoito ato’a. Tē ha’amana’o ra ’outou i te ’īrava hope’a :

Ta’a ’ē noa atu tō tātou iho vaira’a, ta’a ’ē noa atu te vāhi tei reira tātou i ni’a i te ’ē’a nō te fafaura’a i te fare, tē ani nei ’ia pāhonohia tā tātou mau pure nō te mo’ara’a rahi a’e. ’Ua ’ite au ē, ’a fāri’i-noa-hia ai tā tātou mau tāparura’a, e rahi noa ato’a atu tō tātou ’oa’oa. E tae marū mai paha te reira, e tae mai rā. E mana’o pāpū tō’u nō te reira, mai roto mai i te hō’ē Metua here i te Ao ra ’e tāna Tamaiti here, ’o Iesu Mesia.

Tē fa’a’ite pāpū nei au ē, e peropheta ’o Iosepha Semita nā te Atua, ’o te peresideni Russell M. Nelson tō tātou peropheta ora i teie mahana. Tē ora nei te Atua te Metua, ’e ’ua here ’oia ia tātou. Tē hina’aro nei ’oia ’ia ho’i atu tātou i te fare iāna ra ’ei ’utuāfare. Tē ani nei tō tātou Fa’aora here ia tātou ’ia pe’e iāna i roto i tō tātou tere i’ō nei. ’Ua fa’aineine rāua i te ’ē’a. Nā roto i te i’oa mo’a o Iesu Mesia, ’āmene.