Iroun Neiei, E Namakinna Bwa Ai Aron Mweengana

E kabwakaaki Tehani Burgess iroun tamana n te tieminari n te moaningabong anne. Ngke e nakonako nakon te tiaebo, e takarua tamana nakoina, “I kamoamoa iroum”.

Tehani bon 14 ana ririki n te tai anne ao e uringa namakinan te kukurei ao te kakaitau ae korakora n te tai anne. “I taku nakoiu, n te bong teuana, I tangira Tamau are i Karawa bwa e na tuangai te aeka naba anne.”

Bon inanon te tai aei ngke e karaoa ana motinnano: e na maiuakina te maiu ae na kukurei iai te Atua, nakon kakukureiaia aomata. Tehani e tangiria ni mena n te aonaaba ma n aki nako mai iai. “Ngkai I aki kororaoi,” e taku, “I aki toki n titirakinai, ‘Tera ae e na karaoia Iesu ngkana e mena n au kaangaanga, ao tera ae n na karaoia ngkana e mena ikekei Iesu n tarataraai?’”

E a tia Tehani n reirei taekan kakawakin te utu ae akea tokina ngke e bwabetitoaki tabeua ririki n nako ngke 10 ana ririki. E aki maan imwiina, e kabaeaki inanon te tembora nakoia ana karo ao tarina ma mwanena, ao e ataia bwa ngkana e roko te tai ni moana ana katei utu, e na akea te bwai ae e na iangoia, ma ti te mare n te tembora.

Iango aikai, ake ea kaman iangoi ni moan rikirakena, e kakorakorai ana rinerine aika uarereke riki, ni katoabong. E tangiria ni kakukureia Tamana are i Karawa ao n tau n rin n Ana Auti te Uea, bwa e aonga ni kaan riki Nakoina rinanon te tataro ao te kamatebwai man booki aika tabu. E kakaonimaki n iri bootaki n taromauri, e kararoa man waaki aika e na kona ni bwaka iai, ao e teimatoa ni ukoukora ana kairiiri te Tamnei ae Raoiroi.

Irakin nanom ao te Tamnei, e kona, n tabetai ni kairiko nakon katei aika aki kantaningaaki. Tehani e kakubanakoia ana utu ao raoraona ngke e mare ma Heiari’i Picard, te mitinare ae tibwa oki naba, imwiin teuana te namwakaina imwiin kaitiboia. Te bwai ae riki aei e kakubanakoa Tehani, bon irouna! Ma te namakin anne e aki kona ni kakeaaki.

Tehani ao Heiari’i a moan kaitibo n te bowi ni kauntira Moarara riki ibukiia Kairake, ngke e bon mena n te Tahiti Faaa Titeiki. Ngke a wakinako ni mamarooro, ni kataia ni kinaia imarenaia—ao ngke a uaia n tataro ibukin aia iraorao—Tehani e taonaki n namakinan te rau ao te kamanoaki—iangoan te ‘mweenga’. Aio te mwaane ae na kona ni kairia nakon te tembora, te aomata are e na buokia ni katea te utu ae akea tokina are e a kaman iaiangoia.

“Ti aki ‘tangira’ n te tai naba anne,” e kabwarabwara Tehani, “ma te bong teuana imwiin te bong teuana, ti uaia n namakinna, ae ti kona ni kaan riki nakon te Atua ao ni katea ara utu ae boboto iaon Kristo.” E mataata ae bain Tamara are i Karawa e mena inanon te reitaki aei—Ngaia are, n raonaki riki te kakabwaia ao te kaunganano iroun taman Tehani, taanga aikai aki kona ni manga iangoa kabwabwakan riki aia kabaebae.

Ni moan 2020, Tehani ao Heiari’i a bukamarua koron aia ka 10-n ririki ni mare. Tiaki te mwananga ae bebete n tainako—te mare bon te bwai ae kakawaki ae ti na taneiai inanona—ma imwiin 10 te ririki ao aman ara ataei aika tikiraoi, Tehani e a rikirake n tangira riki ma kaainabana ao ni maiuna nakon are e aki kantaningaia n aron ae reke ngkai.

Ibukiia kairake n aomata aika kaitara ma iango aika mwaiti ni boong aikai, e ataia Tehani bwa e kona te aonaaba aei n riki bwa te tabo ae kakamaaku. “Ngaia anne bukina ngkai e rangin ni kakawaki bwa kam na teimatoa ni kororaoi ni karerekei kairi mairoun Tamara are i Karawa,” e taku, “ao n irii ana kaantaninga te Atua ibukira—e ngae ngke tiaki ara kaantaninga. E kinaira riki nakon are ti ataia, ao E na buokiira n tainako ni karaoi rinerine aika moan tamaroa.”

Bon te reirei ae reireiniia natina, te kainibaire are e kekeiaki n irii Tehani ni kabanea maiuna.