ʻEletā Brent H. Nielson

Ko e taha ʻo e ngaahi meʻa mahuʻinga naʻe ako ʻe ʻEletā Brent H. Nielson hili ha mavahe ha mēmipa ʻo e fāmilí mei he Siasí ʻi ha ngaahi taʻu lahi, ko e fiemaʻu ko ia ʻe he fānau kotoa pē ʻa e ʻOtuá e ʻofa ʻa e Fakamoʻuí mo e mālohi faifakamoʻui ʻo ʻEne Fakaleleí.

Lolotonga hono ako ʻe ʻEletā Nielson mo hono fāmilí ʻa e Luke 15 he taimi ko ʻení, naʻá ne fanongo ai ki he talanoa fakatātā ʻo e foha maumau koloá ʻi ha tūkunga foʻou.

Naʻá ne pehē, “Ko hono ʻuhingá, he naʻá ku faʻa fehokotaki pē mo e foha naʻe nofo ʻi ʻapí. … Naʻá ne pehē, ne u fakatokangaʻi ʻi ha founga kehe ʻi he pongipongi ko iá, ko au ʻa e foha maumau koloá. “ʻOku tau tō nounou kotoa pē mei he nāunau ʻo e Tamaí (vakai, Loma 3:23). ʻOku tau fie maʻu kotoa e Fakalelei ʻa e Fakamoʻuí ke ne fakamoʻui kitautolu. Ko e kau ʻāuhē kotoa pē kitautolu pea ʻoku fie maʻu ke ʻilo kitautolu.”¹

Na‘e hikinimaʻi ʻa ʻEletā Brent Hatch Nielson ko ha mēmipa ʻo e Kau Palesitenisī ʻo e Kau Fitungofulú ʻi he ʻaho 3 ʻo ʻOkatopa 2020, hili hono tukuange ʻo ʻEletā L. Whitney Clayton, ʻa ia naʻe fokotuʻu ki he tuʻunga mālōlō fakalāngilangí.

Na‘e fanauʻi ʻa ʻEletā Nielson ʻi Pealī, ʻAitahō, USA ʻi he ʻaho 8 ʻo Tīsema 1954. Naʻe ngāue fakafaifekau taimi kakato ʻi heʻene kei talavoú ʻi Finilani. Na‘á ne mali mo Māsia ʻAna Peletifoti ʻi Sune ʻo e 1978 ʻi he Temipale Sōlekí. Ko ha ongomātuʻa kinaua ki ha fānau ʻe toko ono.

Na‘e maʻu ʻe ʻEletā Nielson hono mataʻitohi BA ʻi he lea faka-Pilitāniá mei he ʻUnivēsiti Pilikihami ʻIongí ʻi he 1978. Naʻe maʻu hono mataʻitohi toketā lao ʻi he 1981 mei he ʻUnivēsiti ʻo ʻIutaá. Na‘á ne ngāue leva ko ha loea mo e hoa pisinisi ʻi ha pisinisi lao ʻi Twin Falls, Idaho, USA ʻi ha meimei taʻu ʻe 30.

Kuo hoko ‘a ʻEletā Nielson ko ha tokoni ʻi he ʻĒlia Pasifikí mo e ʻĒlia Filipainí pea hoko ko e Palesiteni Fakaʻēlia ʻi Filipainí. Mei he 2015 ki he 2020, naʻá ne hoko ko e Talēkita Pule ʻo e Potungāue Ngāue Fakafaifekaú.

Kimu‘a pea uiuiʻi ia ko ha Fitungofulu Taki Māʻolunga ʻi ʻEpeleli 2009, naʻá ne hoko ko ha palesiteni ʻo e Kau Talavoú he uōtí, pīsope, aleaʻanga māʻolunga, tokoni ʻi ha kau palesitenisī fakasiteiki, palesiteni fakasiteiki, mo e Fitungofulu Fakaʻēlia ʻi he ʻĒlia ʻAitahoó.