Na’o Tusiga Faatekinolosi
O Se Tusi ma se Aloiafi i Lo’u Agaga
E ala mai i se tasi ou te lei feiloai lava i ai, sa amata ona liliu mea uma moau.
E alala le tusitala i Idaho, ISA.
I la’u misiona, sa ou i ai i se faalavelave tau taavale lea na tuua ai a’u ma se tua tiga ma le galogalo o mea. O le taimi lava na ou toe foi ai i le fale, sa ou lesitala i le aoga, ae sa faigata. Sa le mafai ona ou manatuaina ni mea faigofie, ma sa le mafai ona ou aveina se isi mea nai lo se tama’i api ma se peni i lau ato faafafa ona o le tiga.
Sa ou ita. Sa ou faaaluina le 18 masina e auauna atu ai i le Atua ma tuuina atu ia te Ia a’u mea uma. Aisea na Ia le faamaloloina ai au? O fea sa i ai o Ia?
A o faaauau pea le tiga ogaoga, sa amata ona ou lagona e le mafai ona ou liliu atu i le Atua. Sa amata ona ou masalosalo o le a Ia faia—pe mafai foi—ona fesoasoani ia te au. Ma afai e le mafai ona Ia fesoasoani mai ia te au, ona ou manatu lea ua le fesoasoani foi le suesueina o tusitusiga paia ma le auai i le malumalu. Sa ou liliu ese mai le Atua ona sa faigata tele le olaga, ma sa le mafai ona ou iloa atu se ala i fafo.
I se tasi aso faigata tele, sa le pasi ai foi se isi suega ae na ou suesue mo le tele o itula, ma sa sili atu le tiga o lou tua nai lo se isi lava taimi. Sa ou laa atu i fafo, nofo i lalo, ma tagi.
O ni nai minute mulimuli ane, na sau ai se teineitiiti ma ataata mai ia te au. Sa ia tuuina mai ia te au se faamatalaga sa faitauina faapea, “‘Aua tou te popole i le aso a taeao: aua e mafaufau le aso a taeao i mea mo ia lava’ [Mataio 6:34]. O loo leoleo lo tatou Tama Faalelagi ia te oe. Sa ou fesili atu ai ia te Ia. E alofa o Ia ia te oe.”
Sa ufitia a’u e le Agaga. Ou te lei lagonaina se alofa o le Atua mo a’u i se taimi umi lava. Ae o le teine lea na aumaia ia te aʻu le tusi na mafua ai ona pei o se aloiafi o’u lagona i loʻu agaga, na toe aumaia au i le amataga o lou faatuatua, ma faamanatu mai ia te au le tele o o’u aafiaga na i ai muamua i le Agaga.
Na amata ona ou liliu soo i le Tama Faalelagi i le tatalo. E tusa lava pe le mafai ona ou iloa atu le iuga o lou tiga, sa ou talosagaina o Ia e faamama ou tiga, pe tuu mai ia te au le malosi e ausia ai se aso atoa. Sa tele ina ou taula’i atu i le suesueina o tusitusiga paia ma le auai atu i le malumalu.
E ui e lei faamaloloina atoatoa lo’u mafaufau ma o’u tiga, ae sa ou aoao e tumau lou latalata i le Alii. E tusa lava pe le mafai ona ou vaai i mea uma o loo taoto mai i luma atu, ou te iloa o loo i ai o Ia iina. E mafai ona ou tulimatai atu i le lumanai ma le faatuatua ia te Ia.