Deneto Forde
Sana Katerina, Jamaica
Ata na pueina e Christina Smith
E le’i lelei tele ni a’u aoga, o lea sa le mafai ai ona ou faitau pe tusitusi lelei. Na pau lava le mea na mafai ona ou faia o le tusi o lou igoa. Sa ma faigaluega ma sau uo sa ia aumai ia te a’u lana numera telefoni ma fai mai e tatau ona ou telefoni atu. Sa ou valaau atu i ai ma o se tamaitai sa avea ma faiaoga i le aoga maualuga. Sa ia valaauliaina au i se vasega e faitau tusi. E lei leva, ae ia valaaulia au i le lotu ma gaoioiga.
Sa ou alu i le lotu i le isi aso ma feiloai ai i faifeautalai. Sa latou fai mai e mananao e aoao mai ia te au le talalelei. O le mea e tasi na ua’i atu iai lou mafaufau o le ata o le faaolataga. Sa i ai lenei lagona gaogao i totonu ia te au ona o taimi uma lava ou te fai ifo ai ia te au lava, e i ai ni mea e sili atu le ola nai lo mea ua ou vaaia.
Sa tele ni au fesili sa i ai. “O fea na amata ai nei mea uma?” O fea na ou sau ai? Sa fai mai faifeautalai ia te au, “Sa e i ai muamua ae le’i iai le olaga nei. Sa e mau faatasi ma lou Tama Faalelagi. Na e sau iinei o se suega e fai le mea e manaomia mo oe e toe foi atu ai e mau faatasi ma Ia.” O le tali lea o au fesili!
Sa aoaoina foi au e faifeautalai e faapea na toefuatai mai le talalelei a Iesu Keriso. Sa ou le iloa se mea e uiga i lena mea. Na pau lava le mea na ou iloaina, o Iesu Keriso na maliu mo au. Ina ua mavae se masina, na papatisoina au i le 25 o ou tausaga.
Sa ou mana’o e auauna atu i se misiona. Ina ua mavae le tausaga talu ona ou papatiso, sa ou alu atu i le Ripapelika Tominika ina ia maua faaeega paia i le malumalu o Santo Domingo Dominican Republic aua e leai se malumalu i Jamaica. Afai e lata mai se malumalu ia te au i Jamaica, o le a ou alu i aso uma pe a ou mafaia.
Sa ou auai i le nofoaga autu mo le aoaoina o faifeautalai i le Ripapelika Tominika ma aoao ai le mea e fai ina ia avea ai ma se faifeautalai e sili atu ona lelei. Na ou toe foi mai i Jamaica ma auauna atu mo le lua tausaga. Afai e mafai ona ou toe alu i le misiona, ou te toe auauna atu aua e matagofie. E i ai mea e lelei, e iai fo’i mea faaletonu o se misiona, ma e tele mea e aoao iai, ae sa ou fiafia i ai.
Ina ua ou alu i le misiona, sa seasea ona ou faitauina le Tusi a Mamona po o le Tusi Paia. I le taimi o le suesuega faale-soa, ou te talosagaina ai lau soa e fesoasoani mai ia te au e faitau se mau ou te lei malamalama i ai. O le a ia fesoasoani mai ia te a’u e aoao le uiga. I le aluga o taimi, sa faateleina lo’u aoaoina. E oo atu i le faaiuga o lau misiona, ua ou faitau i le Tusi a Mamona, le Feagaiga Fou, ma nisi o le Feagaiga Tuai ma le Talai Lau Talalelei. O le taimi nei ua mafai ona ou faitau i soo se mea e aumaia ia te au. E mafai ona ou fesoasoani ia te au lava ma faaauau pea ona aoao atili e uiga i le talalelei. Ou te iloa o se faamanuiaga lena mo au mo le auauna atu i se misiona.
Ua aumaia e le talalelei ia te au se mafuaaga e faaauau ai pea ma vaai mo ni aso e sili atu.
E ese le matagofie o le faasoa atu o lena. O nisi taimi ou te feiloai ai i se tagata ua i ai se aso leaga po o se tasi e popole i le olaga. Atonu o lo latou tinamatua, lo latou tama, po o se tasi o tagata na latalata atu ia i latou na maliliu. E mafai ona ou talanoa ia i latou e uiga i le Toefuataiga ma faailoa atu le ata o le faaolataga ia i latou. Ona o le Toefuataiga ua tatou iloa ai le ata o le faaolataga.