E mafai faapefea ona ou iloa mo au lava ia?

(4–10 Ianuari)

Ata na tusia e Ben Simonsen

Sa manao le alii talavou o Iosefa ia iloa mo ia lava po o le fea o lotu e moni. Sa ole atu o ia i le Atua i le tatalo ma maua ai se tali tuusao mai le Atua ma Iesu Keriso. Sa ia toe foi atu i le fale ma tau i lona tina, “ua ou iloa ai mo au lava ia” (Iosefa Samita—Talafaasolopito 1:20).

O le a se mea ua tatou aoaoina mai le faataitaiga a Iosefa? E mafai faapefea ona tatou “iloa mo i tatou lava” le a le mea moni?

Sa faaalu e Iosefa le tele o taimi e faitau ai le Tusi Paia. Sa ia faitauina i le Iakopo 1:5 e mafai ona ia tuuina atu lana fesili i le Atua i le tatalo.
E lei faapea na o le nofo lava Iosefa i le fale e faatalitali mo se tali e oo mai. Sa ia auai i lotu eseese. A o ia talanoa atu i taitai ma tagata o lotu eseese, sa lagona e Iosefa ua i ai se mea o loo misi, lea na oo atu ai i lana faaiuga e ole atu i le Atua. O le aoaoina o mea uma e mafai ona fesoasoani ia i tatou ina ia faamanuiaina i musumusuga mai le Tama Faalelagi.¹
I le Uluai Faaaliga, na tau atu ai e le Faaola ia Iosefa e leai se tasi o lotu o i ai nei e sao. Sa ia fai mai foi o le a toefuataiina Lana Ekalesia i se aso. Sa faatalitali Iosefa ina ia aoao atili. O nisi taimi e tatau ona tatou faatali foi mo ni tali.