O Le Mana o Faaaliga Faaletagata Lava Ia
E faapefea ona e maua ai faaaliga e lagolago ai le ola e fetaui ia te oe.
Ata na saunia e Allen Garns
“Tatalo atu i le suafa o Iesu Keriso e uiga i ou atugaluga, ou popolega, ou vaivaiga—ioe, o faanaunauga tonu o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A e faia pea lenei faagasologa i lea aso ma lea aso, masina ma lea masina, tausaga ma lea tausaga, o le a e ‘ola ai i le mataupu faavae o faaaliga.’
“O finagalo moni ea le Atua e fetalai atu ia te oe? Ioe!
Peresitene Russell M. Nelson, Peresitene O Le Ekalesia a Iesu Keriso o le Au Paia o Aso e Gata Ai, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95.
“E mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa ia te oe. Ua ia te oe ni misiona tulagaese ma ni matafaioi e faatino i le olaga ma o le a tuuina atu le taitaiga tulagaese e faataunuuina ai.
“O Nifae, le uso o Iareto, e oo lava ia Mose sa i ai uma se vaega tele o vai e sopoia—ma sa eseese uma auala na faia ai. Na galue Nifae e ‘ta laau i gaosiga uiga eseese.’ Na fausia e le uso o Iareto ni vaa na ‘malu lelei e pei o se ipu.’ Ma sa ‘savali [Mose] i le iliti tai matutu i totonu o le sami.’
Na tofu maua e i latou taitoatasi faatonuga patino, na faapitoa mo i latou, ma sa faatuatuaina ma galulue i latou taitoatasi.
Michelle Craig, Fesoasoani Fuamua i le Au Peresitene Aoao o Tamaitai Talavou, “Malosi Faaleagaga,” Liahona, Nov. 2019, 21.
“O le taumafa fiafia moni e sili atu i lo le olioli i se taumafataga manogi. O se aafiaga o le olioli, faafailelega, faafiafiaga, fetufaaiga, faailoaina o le alofa i aiga ma ē pele, tuuina atu o a tatou faafetai i le Atua, ma le fausiaina o sootaga a o olioli i le anoano o meaai ua matua sasala le manogi. Ou te talitonu a tatou taumamafa fiafia i afioga a Keriso, e tatau ona tatou mafaufau i lea lava aafiaga e tasi. …
“… O le taumamafa fiafia i afioga a Keriso o le a aumaia ai faaaliga e lagolagoina le olaga, toefaamautu lo tatou faasinomaga moni ma le taua i luma o le Atua i le avea ai ma Ana fanau, ma taitai atu a tatou uo ia Keriso ma le ola e faavavau.”
Elder Takashi Wada o le Au Fitugafulu , “Fiafia i le Afioga a Keriso,” Liahona, Me 2019, 38–39, 40.
O le faamanatuga o se taimi foi mo le Tama Faalelagi e aoao ai i tatou e uiga i le Togiola a Lona Alo Pele—lo tatou Faaola, o Iesu Keriso—ma mo i tatou ina ia mauaina faaaliga e uiga i ai. O se taimi lea e ‘tu’itu’i atu, ona tatalaina mai ai lea ia te outou,’ e talosaga ma ia mauaina lenei malamalama. O le taimi mo i tatou e ole atu ai ma le migao i le Atua mo lenei malamalama. Ma a tatou faia, e leai so’u masalosalo o le a tatou maua lenei malamalama, lea o le a faamanuiaina ai o tatou olaga le mafuatiaina.
Elder Claudio R. M. Costa o le Au Fitugafulu, “Latou Te Manatua Pea o Ia,” Liahona, Nov. 2015, 103.
“Ia usiusitai, manatua taimi na outou lagona ai le Agaga i le taimi ua tuanai, ma ole atu i le faatuatua. O le a o’o mai lau tali, ma o le a e lagonaina le alofa ma le filemu o le Faaola. Atonu e le oo mai i le vave po o i le auala e te manao ai, ae o le a oo mai le tali. Aua le fiu gofie! Aua lava nei fiu gofie!
Elder James B. Martino o le Au Fitugafulu, “Liliu Atu ia te Ia Ma o le a E Mauaina Tali,” Liahona, Nov. 2015, 59.
“Ua faatele ona ta’u mai e le Alii ia i tatou ia “saili i le aoao e faapea foi i le suesue ma le faatuatua.’ E mafai ona tatou maua le malamalama ma le malamalamaaga e le gata i manatu talafeagai o o tatou mafaufau, ae faapea foi i le taitaiga ma musumusuga a le Agaga Paia. …
“A tuufaatasia nei vaaiga e lua i o tatou agaga, e faaali mai e se ata atoa e tasi le moni o mea e pei ona i ai moni lava.”
Saunia e Elder Mathias Held o le Fitugafulu, “Saili le Malamalama e ala i le Agaga,” Liahona, Me 2019, 31, 33.