O le a le mea na aoao atu e Moronae ia Iosefa Samita?

Mataupu Faavae ma Feagaiga 2; Iosefa Samita—Talafaasolopito 1:27–65

11–17 Ianuari

Na Ia Ta’u Mai A’u i Lo’u Igoa, saunia e Michael Malm

I le aso 21 o Setema, 1823, sa tatalo ai Iosefa Samita mo le faamagaloga o ana agasala ma ia iloa lona tulaga i luma o le Atua. A o tatalo Iosefa, sa faatumulia lona potu i se malamalama ma sa ia vaaia ai se agelu o tu i le ea.

Sa ia ta’u Iosefa i lona igoa ma faailoa atu o ia lava o Moronae. Sa ia tau atu ia Iosefa ua faamagaloina o ia, ma ua i ai se galuega a le Atua mo ia e fai.

Na tau atu e Moronae ia Iosefa o lona igoa o le a “tauleleia ma tauleagaina i totonu o atunuu uma, ituaiga, ma gagana” (Iosefa Samita—Talafaasolopito 1:33).
Sa aoao Iosefa e uiga i papatusi auro o loo tanumia i se mauga lata ane sa i ai “le atoatoaga o le Talalelei faavavau” (Iosefa Samita—Talafaasolopito 1:34). Sa tau atu foi e Moronae ia Iosefa e uiga i le Urima ma le Tumema lea na saunia e le Atua mo Iosefa e faaliliu ai papatusi (tagai i le Iosefa Samita—Talafaasolopito 1:35).
Na faasoa mai e Moronae ia Iosefa ni valoaga e tele o le a faataunuuina e uiga i le faatuina o lenei tisipenisione mulimuli ma faamanuiaga o le a aumaia i le lalolagi.
Na faaali faatolu atu Moronae ia Iosefa i lena po ma o le taeao na sosoo ai. Sa ia tuuina atu le savali lava lea e tasi ae na tuuina mai ai faamatalaga faaopoopo ma faatonuga ia Iosefa i taimi taitasi (tagai i le Iosefa Samita Talafaasolopito 1:44–46, 49).