Ia Faatasi ma Faamalolosia e le Tasi le Isi

Ata

three South African women in front of meetinghouse

I lona tulaga sili, o le auauna atu e le o se auala e tasi le ala e agai i ai. Pe a tatou auauna atu i se tasi, e faamanuiaina uma lava i latou o aofia ai—o i tatou lava, o a tatou soa, ma i latou tatou te auauna i ai. Ua faamanuiaina i tatou e le tasi i le malosi o le isi. E faamanuiaina i tatou a o tatou lagolago ma fesoasoani i le tasi ma le isi i o tatou luitau. Ua faamanuiaina i tatou i sootaga ua foafoaina.

Pe a faamalamalama atu le uiga o le auauna atu i isi, na aoaoina i tatou e Elder Jeffrey R. Holland o le Korama a Aposetolo e Toasefululua, ina ia “faatasi ma i latou ma faamalolosia i latou” (Mataupu Faavae ma Feagaiga 20:53).¹ I lenei mau, e lua ni elemene taua o le a fesoasoani ia i tatou e auauna atu ai ia i latou tatou te alolofa i ai:

• Muamua, ina ia “faatasi ma” ua fautua mai ai e taua le faamasani ia i latou o e ua lava lo tatou auauna atu i ai e fausia ai se mafutaga anoa ma fausia ai se sootaga o le faatuatuaina.

• Lona lua, o le taimi lava latou te iloa ai tatou te alolofa moni ma popole mo i latou, e mafai ona tatou talanoa i auala e mafai ona tatou lagolagoina ma “faamalosia ai i latou.” I le isi itu, o le a faamalolosia foi i tatou.

O tagata e le o ni galuega faatino; o i latou o o tatou uso ma tuafafine-e malaga faatasi ma e faimalaga i le faigamalaga o le olaga. Tatou te fia savavali i le olaga faatasi, ma fesoasoani i le tasi ma le isi e saili le malosi e faatoilalo ai papupuni ma poloka tausuai i luga o le ala (tagai Eperu 12:10–13).

O le upu “faamalosi” e faaalia ai mea tatou te mananao moni i ai—e tuuina mai e la tatou fesoasoani le fesoasoani ma meafaigaluega ina ia mafai ai e tagata taitoatasi ona maua ia punaoa ma le malosi e agai ai i luma ma faatoilalo ai luitau o le olaga.

O le toatele o i tatou e lagona le le agavaa e fesoasoani i o tatou uso ma tuafafine i o latou atugaluga tulaga ese. Na faamalosiau mai Elder Holland e faapea, “E ui i mea tatou te lagonaina uma o o tatou tapulaa ma ni le atoatoa—ma e tofu uma i tatou ma luitau—ae ui i lea, tau ina ia tatou galulue faatasi ma le Alii o le tovine, ma tuu atu i le Atua ma le Tama o i tatou uma se lima fesoasoani i Lana galuega taua o le taliina o tatalo, tuuina atu o le faamafanafanaga, soloia o loimata, ma le faamalosia o tulivae vaivai.”²

O le tausaga lenei, o le a maua ai e nei Mataupu Faavae o le Auaunaga ni manatu ma punaoa e mafai ona fesoasoani e te malamalama ai i le auala e faatasi ai ma faamalolosia ai isi a o latou feagai ma luitau o le olaga.