Na Teitei ni Vakatatabu ni Veitosoyaki a Vakalougatataka e Dua na Vuvale e Viti kei na So Tale

Na mate raraba e vuravura na COVID-19 kei na vakatatabu ni veitosoyaki sa mai yaco ena vuqa na vanua sa veisautaka na bula e veisiga ena vuqa na sala. Na kena vakadaroi e vuqa na soqo lelevu, vakalailaitaki ni veimaliwai vakatamata, kei na vakatikitikitaki sa dredre sara me ciqomi, ia e vuqa na tamata era sa kunea na sala mera vuli, tubu ka rawa-ka sara.

E veiqaravi tiko o Sulueti Kama vaka-sekeriteri ni Peresitedi ni Tabana ni Kaulotu ni Lotu i Jisu Karisito ni Yalododonu Edaidai ka sa vuqa oti na nona ilesilesi—Inisitute (vuli lotu) kena qasenivuli, dairekita ni veitaratara ena Lotu, dau guta na Zumba . . . ia e sega ni bau teitei.

Ni levu tu na gauna me vakayagataka ena gauna ni vakatatabu ni COVID-19, a teivaka na kakana draudrau.

Ena Me ni 2020, o koya kei na watina rau a draiva yani mai Suva ki Nadi me rau laki sikova eso na itokani era sa sega ni cakacaka. O ira na itokani oqo era vakateitei levu tu ka teivaka tu kina na kedra kakana. Rau a laki sikova sara e dua na vale ni itei e kea, ka raica kina o Sulueti na yatu ni itei. Sa malele sara kina. Sa tekivu e kea na nona sa taleitaka na teitei.

Na tere ni itei, tomata, kaveti, kei na baigani a kauta lesu i vale. Sa laki teivaki ira sara ena kedra koniteina ka sa 84 oqo na kena levu ena kakana draudrau, oka kina na kiukaba, bini leleka, retisi, kei na isaluwaki ni kakana me vaka na cilantro, dill, oregano kei na boro.

Sa vulica rawa o koya na qele vinaka ni teitei, dikeva rawa na ivakamate ni co ca ka veitalanoa kei ira na itokani era dauteitei. A qai tara sara o watina e dua na nona vale ni itei.

“Sa qai dua na ka vinaka duadua me qai yaco vei keirau, keirau sa kunea e dua na cakacaka talei kei na dua na kila-ka a sega ni tu vei keirau e liu ka keirau sa malele sara kina,” a kaya o Sulu.

Na itukutuku nei Sulu ena iVolamata e dau oka kina na itaba ni nona teitei kei na kena ivakamacala oka kina oqo: “Ni oti e dua na auwa ni Zumba ena 5 na kaloko ena mataka au sa sega tale ni wawa meu gole i vale meu laki raici ira na noqu itei ka tawana eso tale. Au a marau vakalevu niu sa raica na noqu kakana draudrau—ni ra sa buroro tu na oregano kei na dill vata kei ira na kiukaba...kau a se qai teivaki ira ga ena Vakarauwai.”

“Au sa dau namaka tu ga meu gole i vale e veisiga meu raici ira na noqu itei kei na nodra sa tubu vinaka sara dina ga niu qaravi ira tiko la ena veimataka.”

Na cava beka rau na cakava ki na kakana draudrau ni sa gauna ni tatamusuki? E kila tiko o Sulu. “Sai au ga kei watiqu ena gauna oqo ka keirau na teitei vakalevu cake mai na kena keirau na gadreva, keirau sa na tukutuku vei bisopi me kila. Sa neirau masu me vuavuai vinaka na neirau teitei me rawa vua me lolomataka na kakana vei ira era gadreva dina.”