Ena Nomu Vakasama vakakina Ena Lomamu

Sa dau muria ga o Nia na lomana. Ena veivakatulewa yadua ni bula, ni masulaka oti na veika me digitaka, sa dau nuitaka ga na nona nanuma me dusimaki koya ki na digidigi dodonu.

“Ko kila na vuna e bibi kina mo vakarorogo ga ki na lomamu?” A vakamacalataka, “baleta o ya na sala sa dau vosa kina vei keda na Kalou, mai vua na Yalo Tabu.”

A tubu cake o Etina Nunia Ete’aki (yacana taumada o Palu) ena Free Wesleyan Church mai Tonga, ka iliuliu kilailevu tiko e kea o tamana, ia e vuqa sara na nodratou itokani kei na wekadratou era a lewe ni Lotu i Jisu Karisito ni Yalododonu Edaidai.

E dua na itokani vinaka a dau sikova tiko mai na nodratou itikotiko mai Houma, e Tongatapu, me mai ia na kana vata kei na veitalanoa balavu, ka veivakauqeti vata kei tamai Nia. Na itokani oqo o Eric B. Shumway, ena gauna o ya a veiqaravi tiko vaka-peresitedi ni Tabana ni Kaulotu e Tonga Nuku’alofa ni Lotu i Jisu Karisito ni Yalododonu Edaidai. A se qai taura walega oqo o Elder Shumway e dua na itutu vakatui ni vanua o Tonga, ka a mai vukei koya tiko o tamai Nia me kila vinaka na itutu o ya.

E dina ga ni yalodina tu ga o tamana ena nona lotu, a sega vakadua ni vakasuka e dua na veisureti me laki sikova na lotu nei Elder Shumway. E nanuma tiko o Nia na nona dau laki tiko vata kei koya ena soqoni ni sakaramede ka rokova toka na nodra sokalou na Yalododonu Edaidai. A vakauqeti koya sara na veika oqo ka muataka sara na dusimaki ni nona bula.

Ni oti na nona vuli, a laki qasenivuli sara o Nia ena Queen Salote College, a cicivaka tiko na Free Wesleyan Church. E a se qai yabaki ruasagavulu toka ga ka sa tekivu me vakasamataka vakabibi sara me sa vakamau, ia e dua na ka a vakataotaki koya tiko.

“Au sa vakasamataka ni o koya me watiqu e sega ni dodonu me daugunu se kana tavako,” a kaya o Nia, “ia ena vuku ni noqu cakacaka, au nanuma ni kevaka me gadrevi meu cakacaka, o watiqu e dodonu me gadreva me qaravi iratou na luvequ.”

Sa tarabi sara na nona vakasamataka tiko na vakamau o Nia. Ena dua na siga a uqeti sara vakaukauwa o koya: me sa dua na nona cakacaka vou.

“Au sa kila tu ga e yaloqu meu na laki qasenivuli e Liahona,” a kaya, ka sa kila tu ni koronivuli torocake o ya e cicivaka tiko na Lotu i Jisu Karisito ni Yalododonu Edaidai.

Kena ivakarau, o ira na lewe ni Lotu kilikili era na dau vakacakacakataki mera qasenivuli e Liahona, ia sa kaukauwa sara na veivakauqeti sa sega ni yalolailai kina o Nia. A laki tarogi nona momo sara, e lewe ni Lotu kilai levu e Tonga, me vukea na nona kerecuru, ka vakalailai ga sa vakau sara, ka sa rawata na cakacaka o ya o Nia.

Ni oti o ya ni voleka toka ni dua na vula, sa lewena sara o koya na Lotu i Jisu Karisito ni Yalododonu Edaidai ka sotava totolo e kea na nona itokani tawamudu; ka rau a qai veiqaravi vakaveiwatini me matataka na isoqosoqo ni iTabagone Qase Cake ni iTeki o Nuku’alofa Tonga Ha’akame.

Sa oti oqo e sivia na 25 na yabaki mai na gauna a muria kina na lomana ki Liahona. Ni salavata kei na cakacaka cecere, na vakatulewa a muataki koya ki na Lotu, na vakamau ni veilomani kei na va na gone—e tolu vei iratou sa kaulotu oti ka dua sa vakavakarau tiko me laki vakamau e valetabu.

“Na valetabu sa veivakalougatataki digitaki ni Lotu oqo,” a kaya oqo o Nia ni oti nona mai takali walega tikoga oqo o watina daulomani. “Sa vauci oti na neitou matavuvale me baleta na gauna oqo kei na veigauna tawamudu.” Na vakacegu ni sa kila tiko ni na duavata tale kei watina sa dua tale na veivakalougatataki ena Lotu oqo. “Au kila ni a gole e liu o watiqu me laki vakarautaka na neitou itikotiko,” a matadredredre sara.

Sa vaqaqacotaki na nona uqeti tiko o Nia mai na veidusimaki ni nona veivakalougatataki vakapeteriaki. Na nona vakalougatataki sa kacivi koya ki na nodra sokomuni na Isireli, ka sa raica o Nia na kena sa yaco na yalayala ni sa mai iliuliu tiko ni nona vuvale kei na itikotiko raraba.

Ena gauna oqo, sa vakalevutaka o Nia na nona veikacivi me veiqaravi—ka veivakani—vei ira na lewe ni valetabu mai Niu Siladi era sikova mai na Valetabu e Nuku’alofa Tonga ena gauna e vakavinakataki tiko kina na nodra valetabu. “Au sa cakava oqo baleta niu kila ni ra solibula ena nodra gauna kei na ilavo mera gole mai Tonga mera sokalou ena Vale ni Turaga. Na ka dina,” a kuria, “kevaka e dua e via gole mai ki na valetabu e Tonga, kakua ni lomaleqa ke o sega ni kila e dua eke se sega ni macala na vanua mo tiko kina, ni gole ga mai. Na noqu matavuvale sa nomuni matavuvale. Keitou na mai maroroi kemuni.”

Sa cakava talega oqo o koya, baleta, “ni gauna o vakila kina na Yalo e lomamu,” a kaya, “o sa kila kina ni sa tiko e dua na cakacaka mo cakava, ka sega e dua na ka me tarovi iko rawa.”