Na Rai “Lesu” 2020

Au a sucu ka susugi mai Aferika maivei tamaqu kai Vavalagi ka tinaqu mai Rhodesia/Itali, ka sa sega na kequ isema cava ga kivei ira na painia e liu ni Lotu e Amerika. Na ka dina, au raica na iTukutuku Makawa ni Lotu me ‘kedra itukutuku makawa’ ka ‘kedra itukutuku’ . . . sega ni noqu!

Ia, mo vakasamataka mada noqu kurabui ni sa cariba mai e dua na itukutuku mai na FamilySearch ki na noqu tabana ena iVolamata ka tukuna tiko mai ni tiko e dua na noqu qase e liu painia! E vakasauri ga noqu sa vakila niu sa semati kivei ira na lewenilotu e liu ni Lotu kau sa raica niu sa tu ena dua na italanoa vou taucoko.

Na yacana o Margaret Rebecca Bird; ni a se qai goneyalewa lailai yabaki 13 a biubiu mai Kanesville, Indiana vata kei na kabani ni qiqi nei Wilford Woodruff ena ilakolako ki na Great Salt Lake Valley. O ira na painia oqo era a sotava vosota mai e dua na 120 na siga rarawa ni taubale takosova mai na Great Plains ki Utah.

Ia oqo au vakila niu sa tiki vakalevu ni parofisai nei Malakai, ni na vagolei na lomadra na gone vei ira na nodra qase¹—vei ira talega na tamaqu ena dua na vanua vakayawa.

Ka ra sa yaco tiko ga mai na veivakalougatataki. Au sa rawa ni wilika ena gauna oqo e vuqa na veika era a sotava na painia qaqa ena Yalododonu, e dua na ivola e va na kena wase, sa italanoa ni Lotu i Jisu Karisito ni Yalododonu Edaidai. Na voliumu 1 kei na 2 sa tabaki oti.

A kaya kina o Elder Dale G. Renlund ena Kuoramu ni iApositolo Le Tinikarua: “na itukutuku makawa ni Lotu sa ka vakamareqeti vei ira na lewe ni Lotu ka vakakina vua na Turaga.”² Ena Epereli ni 1830, a kaya kina na Turaga: “Raica me dua na ivolatukutuku mo dou maroroya tiko”³ ka a qai maroroya tiko o Oliver Cowdery na ivolatukutuku o ya me dua na yabaki. Sa qai kacivi John Whitmer na Turaga me “na dau vola na itukutukuvolai ni Lotu kei na itukutuku makawa”⁴ ka a ciqoma kina e dua na yalayala ni na solia vua o koya na Dauveivakacegui “me vola na veika oqo”⁵ me vaka ni sa yalodina o koya. A vulica kina o John Whitmer ni “itukutuku makawa ena vinaka kina na Lotu ka vakabibi vei ira na itabatamata era tubu cake tiko mai.”⁶

Sa vakamatatataka sara na Turaga na ivalavala mena maroroi kina na ivolatukutuku, o ya ena veidusimaki ni Yalo Tabu.

Na veitabana ena Yalododonu era sa vakasinaiti tu ena veika dina a yaco mai na nodra italanoa yadua na lewenilotu yalodina era a tauyavutaka na ivakarau sa Vakarisito ena gauna era sotava kina na veika dredre ni ra bulataka tiko na kosipeli ena nodra vinaka duadua era rawata.

Kivei ira na lewenilotu era na via gadreva mera vakadikeva na itukutuku makawa vakatitobu sara, e sa volai tiko e drau na ivurevure ena daku ni ivola.

Na rai lesu sa dua na iyaragi veivukei dina; kau raica niu sa kurabui sara ena noqu sa semati kivei ira na wekaqu painia . . . ka sega walega vei Margaret Bird ia kivei ira kece! Ena loma ni yabaki oqo, 2020, au sa kunea rawa ena FamilySearch ni vuqa sara tiko na wekaqu painia.

E vakavulica o Elder Renlund: “Sa dau vakayagataka na Turaga na itukutuku makawa yadua me vakavulici keda kina ena sala meda toro voleka kina vua, meda veivutuni ka yaco meda vakataki koya cake. Oqori na keda inaki ni tiko ena Vuravura oqo, na inaki ni kosipeli, kei na inaki ni Lotu i Jisu Karisito ni Yalododonu Edaidai”.⁷

Au sa vakavinavinaka vakalevu ki na noqu matavuvale kei na isema keitou rawa ni cakava ena veitabagauna kei na maliwabula. Sa noqu inuinui, ni dua na siga, era na wilika na noqu kawa na kequ itukutuku kau vakila niu sa vola na veika sotavi e yaga sara me vukei ira mera lako maivei Karisito me vakataki au, niu sa saga tiko meu cakacaka ena veidusimaki ni Yalo Tabu.