Na Vakabauta mo Masu Me Yaco E Dua na Cakamana

O ira na oni era sa ka veivakurabuitaki vei Brother Joseph Price ena iTeki o Papatoetoe Okaladi Niu Siladi. A wilika ena ivolanikalou na veika baleti ira na oni – na sala era a kauta kina na Jeretaiti ni gauna makawa na bure ni oni (raica na Ica 2:3), kei na nodratou a kania o Liai kei na nona vuvale na oni ni veikau (raica na 1 Nifai 17:5).

E dau taleitaka talega o Joseph me lagati ira na oni ena dua na serenilotu talei me baleta na iMatai ni Raivotu ka vakasamataka vakatitobu na kedra inaki mana na oni e vuravura. “Ke sega na nodra polenitaki ira na kau,” e kaya o Joseph, “era na sega ni bula na noda iteitei.”

A tatadrataka ni dua na siga ena susugi ira na nona oni, ia ena 2018, a yaco vei Joseph—sa tukanigone tiko nikau—na nona madigi o ya. A volia e rua na bure ni oni ka maqusa sara me sa vakarautaka e daku ni nona vale ka vakakina e dua na kote ni oni me dara ena veigauna kece e sikovi ira kina na oni. A totolo sara na nona taleitaka na susu oni ni sa yalona kina.

“Sa dua na sala rekitaki me vakavinavinakataki kina na veika buli nei Tamada Vakalomalagi, ka ra sega ni vosa lesu mai vei au na oni,” a dredre ga. Ena nona sa yalodina sara vei ira na nona oni a dau taroga kina o luvenayalewa sa vakacava tiko o ira na “luvena, na oni” ni ra sa . . . vakataka ga era dau cakava na gone, era sa vakavulici koya na oni na lesoni bibi baleta na bula.

“Dua na siga au a laki sikova na bure ni oni kau a sega ni dara na kote ni oni,” e nanuma lesu o Joseph. “A vosa na noda parofita, o Russel M. Nelson, ena dua na ivavakoso ni iyasayasa mai Okaladi ena siga e tarava—kau a gole kina meu cakava na noqu veikacivi ena soqoni o ya ni vuce tu na mataqu ena ikati ni oni.”

Na ka a sotava o ya a vakavulici koya ni sa rui ka bibi me dau taqomaki koya, vakayago ka vakayalo.

Na lagilagi ni nona qaravi ira na oni o Joseph a yaco ni a rawata na nona bure ni oni e 60 na kilo na oni totoka ni veikau. A solia yani e vica vata na tavaya ka ciqoma kina eso na vosa ni vakacaucau. “O noqu itokani e cicivaka tiko e dua na bisinisi ni oni a kaya ni noqu oni e kana vinaka cake mai na nodratou oni,” e marau o Joseph. A sega ni via waraka me raica na sala era na gugumatua kina na nona oni ena tatamusuki e tarava.

Ia ena dua na mataka lailai, a raica ni dua taucoko na bure ni oni sa lala tu. Era sa biubiu na yavusa oni!

A vakasaqaqara o Joseph ena itikotiko raraba e kea, ia a kalouca. “Eso na gauna o ranadi ni [oni] sa lewa ga me sa biubiu ka kauta vata kei koya na nona yavusa,” a vakamacalataka. “Eso na gauna o na kunei ira tale, ka so na gauna ena sega.”

Sa kila tiko o Joseph ni gauna ga sa biuta kina na yavusa na nodra bure, sa na sega vakadua mera lesu tale mai. Sa vakakina, o ira na oni era na sega ni mai taura na nona bure e dua tale na yavusa. Ena vuku ni ka oqo, era na dau vakarautaka tu na daususu oni e levu na bure ni oni—ia a rua ga na nei Joseph.

A ka ni rarawa, ni oti toka ga e vica na vula, sa biu lala tu mai vakakina na ikarua ni nona bure ni oni.

A kavoro na yaloi Joseph: “Au a rarawa sara ga vakalevu. Au a vakila dina ni vaka au sa vakayalia e dua na ka.”

A vakaliliga na nona kote ni oni ka laki tukuna vei watina, o Atelaite, na itukutuku ca. “Era sa yali na nodaru oni,” a kaya vua o Joseph. A vakayaloqaqataki Joseph o koya me masu.

Tekivu mai na mataka o ya, rau sa masu vagumatua na veiwatini, ena veisiga, baleta na nodrau oni. Rau a vakavinavinakataka na Tamada Vakalomalagi ena madigi ni nodrau a susu oni, kei na veigauna rekitaki a kauta maivei rau, oti rau sa qai masulaka me yaco e dua na cakamana—mera na rawa ni lesu tale mai na oni.

Ni oti e voleka ni rua na macawa, sa tekivu yalolailai mai o Joseph. A kaya vei Atelaite ni sa tu vakarau me talaraka sobu na nona bure lala ni oni ka volia vou na oni ena yabaki e tarava. “Na veika vakaoqo e dau yaco,” a kaya vei Atelaite. “Me daru laiva ga me yaco na ivakarau ni bula.”

Ia sa sega ni via guce o Atelaite. Sa tu e lomana na vosa nei Amuleki:

Ia, mo ni vakayalomalumalumutaki kemuni, ka daumasu tiko ga vua . . . Mo ni tagi vua ena loga ni nomuni iteitei, mo ni vutuniyau cake kina . . . me levu mai (Alama 34:19–20, 24–25).

A sega ni mudu ena masu o koya.

Ena dua na mataka ni Vakarauwai, sa raica o Joseph ni ra sa veivukayaki tiko na oni ena dela ni veisenikau ena nona iteitei. Ni kila vinaka tu vakadaususu oni, a raica rawa ni vuqa na oni era sa kauta tiko na poleni, ka ra sa vuka tiko yani ki na nona bure ni oni.

A totolo sara o Joseph me dara na nona kote ni oni me laki dikeva. Era sa osota wavoki toka na oni e dua vei rau na nona bure ni oni, ni gauna sa dolava kina, sa vakasinaiti tu ena udolu na oni era osooso voli.

A tuturu na waini matai Joseph ka cavuta e dua na masu vakanomodi. A vakasaqara na ranadi ni oni ka vakavinavinakataki koya ni kauti ira lesu mai na nona yavusa ki na bure ni oni o ya. A qai cici yani i vale me laki tukuna vei Atelaite.

“Au a kaya, ‘Honey, kila na cava? Era sa lesu mai na oni!’” A mokota ka reguci watina, ka qai kaya vua, “E levu cake na nomu vakabauta maivei au.”

Me yacova mai na siga nikua, e se sega tu ga ni kila o Joseph ke ra se oni vata ga oqo era a biuta na nona bure ni oni, se sa mai taura e dua na yavusa vou na bure ni oni. Ni rairai sega ni dua vei rau, sa kila tu o koya ni a yaco e dua na caka mana, ka a yaco ena vuku ni vakabauta.

“Au a voleka ni vakatitiqataka ka ‘laiva ga me yaco na ivakarau ni bula,’” a kaya o Joseph, “ia a sega ni yaco vei watiqu. Au sa vulica meu kakua ni guce ena neirau masu ka nuitaka ga na Tamada Vakalomalagi. Ena sega ni dau yaco wasoma na caka mana, ia ni sa yaco, sa na kauta mai na reki e cecere.”