Pukot Iaļan kōn Kam̧m̧olool im Tōmak

Ium̧win 30 iiō ko, Afulua Tuivaiti, jān Pesega 6th Ward ilo Pesega Samoa Stake, ekar ettōņake juon raan an bar ro̧o̧l ļo̧k n̄an high jikuuļ, n̄an kadedeikļo̧k an ekkatak ta ko me ekar jab bōki ilo jikuuļ . . . im bōlen wōnm̧aanļo̧k wōt n̄an university. Ekar jab jeļā ta eo en kōm̧m̧ane.

Kōn an lale baam̧le eo an kiiō, ejjab ļap kōļļā im eļap eddo ko an ilo Kabun̄ in im jukjukin pād eo, Afulua ekar jino en̄jake āinwōt eban kar tōprak, bwe an jibadōk jeļāļo̧kjeņ emaron̄ jab tōprak. Ak, juon mijenede ripālele rerūtto ilo ward eo an ekar ba n̄an e kōn būrokūraam̧ eo an PathwayConnect me an Kabun̄ eo an Jisōs Kraist im Armej ro Rekwojarjar ilo Raan Ko Āliktata.

PathwayConnect ej juon jikuuļ eo edik wōneen, 4-semester jikuuļ e me ej kōpooj rikattak ro n̄an jino juon university degree, eo me remaron̄ kōm̧m̧ane online ippān Brigham Young University (BYU). Būrokūraam̧ eo epojak n̄an aolepān laļ im kar wōnm̧aanļo̧k wōt kōn Kabun̄ in ippānļo̧k kūlaaj in un̄n̄are peid make.

Ke Afulua ekar ekkatak kōn PathwayConnect, ekar jino ļap an kōjatdikdik, ekar baj ļōmņak eļan̄n̄e ettōņak eo an n̄an bar jino jikuuļ en kar lukkuun kūrm̧ool, innem mijenede ripālele ro rerūtto rej jipan̄. “Elder im Sister Abbot ekar ba n̄an n̄a kōn Pathways,” Afulua ej kōmeļeļeiki, “im bar jet mijenede ripālele rejouj rekar m̧ōņōņō in jipan̄ kōļļā [wōņāān aō jikuuļ. Ej juon kōjeraam̧m̧an!

“Wāween an Jemedwōj Ilan̄ [kar] uwaak]e jar ko aō, n̄an n̄a ej juon menin kabwilōn̄lōn̄.”

Afulua ekar kajju kadeļon̄ etan im ejjab to ekar pād ilo kūlaaj eo an jinointata, eo me kar kaamijak jidik.

“Semester eo Aō jinointata, ikar lukkuun ikūmkūm im mijak kōnke ikar jab jeļā kajin Pālle,” ej ba, ak kiiō ilo semester in aō kein kajilu, em̧ōj aō joliktak būrabļōm eo n̄an likū. “[Kajin Pālle eo Aō] em̧m̧anļo̧k im ejako aō mijak. Ekoba, ejjan̄in kar make iaaō. Ikar bōk naan in rōjan̄ jān ritōl ro aō ilo kabun̄ in, rūkaki ro, im ro m̧ōttan ilo kūlaaj eo,” Afulua ej ba.

Ekar lukkuun ļap an kam̧m̧olool Sister Ho Chin, kōrā eo pāleen mijen būreejtōn eo an Apia Samoa, im mijenede ro ilo stake opiij eo ro rekar jipan̄ e, eļaptata kōn aikuj ko an ikkijeen technology, im n̄an bisop eo an, Lautua Fa’aofo im kōrā eo pāleen Apu, eo ej wōnm̧aanļo̧k wōt im jipan̄ e.

“Barāinwōt, Ij epaakeļo̧k wōt Irooj,” ej ba. “[En̄jake in] ekar lukkun kōkajoorļo̧k naan in kam̧ool eo aō.”

Ej juon naan in kam̧ool me ekar dāpij e im kōketak ilo aolep mour eo an n̄an kiiō, me ejjan̄in kar pidodo. Afulua ej lale jinen eo me 85 an iiō im ļaddik eo jibun me 5 an allōn̄, eo me—ej m̧ōttan jerbal ko jet an ilo m̧weo m̧ōn—kōm̧m̧an bwe en lukkuun boub aolep raan. “Imaron̄ ekkatak wōt ilo bon̄,” ej ba, im ekkā an kōm̧m̧an m̧ae iien ekiki.

Ak ej kate.

M̧ōttan bar juon semester ilo PathwayConnect, Afulua ej kāālet n̄an wōnm̧aanļo̧k wōt kōn būrokūraam̧ in degree an BYU im ej ļōmņak kōn jet kālet ko n̄an bun̄tōn eo tok juon.

“Eitok limo ilo Hospitality im Tourism Management,” ej ba. “Ij tōmak emaron̄ nej lukkuun juon pejnej eo em̧m̧an juon raan.” Ilo m̧ool, Afulua em̧ōj an jino kakkoņ jāān n̄an, “ak Ij bar ļōmņak in bōk Applied Health.”

Ej wōr wōt an iien n̄an kālet juon an major, ak Afulua em̧ōj an jeļā kadede kōn juon men. “Ewōr aō tōmak ilo Irooj Jisōs Kraist. Ej uwaake jar ko aō im ej tōl eō n̄an iaļ eo ejim̧we.”

Tōmak eo an Afulua ilo Anij, im an kar kallim̧ur n̄an kōttōpar ko an, ekar barāinwōt im̧we tōmak eo ilo e make. “Enaaj aolep iien apan̄ m̧aanļo̧k,” ekar ba, “ak inaaj aolep iien kajjieon̄ n̄an eļļā ioer im rōjan̄e n̄an likūt eļapļo̧k kijejeto bwe in maron̄ tōpar karōk eo aō.”