Ren Kōm̧anm̧an Ankil Am̧

Jisōs ekar katakin kōj n̄an jar kōn tōmak eliko im lōke ilo Anij. Ekar katakin rikaļoor ro an jinoin, “En wāween de in ami jar . . . En itok Am̧ aelōn̄. Ren kōm̧anm̧an ankil Am̧ āinwōt i lan̄, barāinwōt ioon laļ” (Luk 11:2).

Naan ko kein ijin rej, “Kōm̧m̧ane Ankilaan.”

Āindein n̄an kōj bwe jej inepata kōn aikuj ko ad make, kōn menin ij ļōmņak ekkā ad meļo̧kļo̧k katak in. Ak jet iien, jej ba, “Kōm̧m̧ane Ankilaan,” āinwōt jet ļōmņak, ak ejjab aikuj rōt in.

Anij ejeļā aolep men im ekajoor. Jej ajeļo̧k n̄an Ankilan kōnke E eobrak kōn iakwe eo eļap im jeļā eo indeeo me emenin aikuj n̄an ņa mejļan aikuj ko ad ilo wāween eo ejejet. Lōke ilo Ankilan n̄an kōj ej juon pedped in jar ko ad retiljek.

Ad Rilo̧mo̧o̧r Jisōs Kraist ekar kwaļo̧k waanjon̄ak kōn katak in ke, ilo Getsemane, en̄taan kōn eddo elukkuun nana kōn jerawiwi ko an laļ, “O Jema, eļan̄n̄e e maron̄e en ilo̧k kab in jān Eō: a en jab ankil Aō, a ankil Am̧” (Matu 26:39).

Jar ko ad remaron̄ jab aolep iien uwaak ilo wāween eo jej kōjatdikdik kake, ak n̄e ej kōtļo̧k bwe Ankilaan en anjo̧, Jemedwōj Ilan̄ ekar kallim̧uri kōj kōn aenōm̧m̧an eo ilo iien ko reppen.

Juon jota ke jema ekar lukkuun nan̄inmej, ikar bukwelōlō ilo turin jikin kiki eo aō im jar kōn aolep aō kajoor ilo būruō im aō n̄an Irooj n̄an jipan̄ eō jeļā ta eo imaron̄ kōm̧m̧ane n̄an jipan̄ jema. Ikar jar kōn tōmak elikio im lōke ilo Jemedwōj Ilan̄. Inej jar im bōjrak jidik, im jar, innām bar bōjrak jidik, kar lukkuun kajjieon̄ bwe in katōt kōļmenļo̧kjeņ eo aō. Ikar lukkuun kajjieon̄ n̄an leļo̧k aō n̄an Jetōb Kwojarjar.

Innām juon im̧we ej jiktok ippa, im ikar ba n̄an n̄a make, im ikar ba n̄an eō make, “Kwolakkar kajjitōkin Irooj n̄an leļo̧k waj ta eo kwoj kōņaan. Ak kōn ta eo Ekōņaan?”

Naan ko jet rekar diwōjtok jān lon̄iin rekar, “Jemedwōj Ilan̄, ilukkuun kōņaan bwe jema en mour. Ilukkuun kōņaan bwe en pād ippām. Ak eļan̄n̄e ejjab an karōk n̄an e, innem im̧ōņōņō in kōtļo̧ke. Im̧ōņōņō in eo̧ron̄ ankilaan.”

Irooj ekar kōnono ilo būruō im ekar ba, “Nejin em̧ool, kōnke kwom̧ōņōņō in eo̧ron̄ Ankilaaō im jab am̧ make, kwonaaj en̄jake kaenōm̧m̧an im jeraam̧m̧an kōn aenōm̧m̧an.”

Jibbon̄ eo tok juon, jema eo ejouj ekar jepļaakļo̧k ippān Jemedwōj Ilan̄ . . . im ikar en̄jake juon lur aibojooj im aenōm̧m̧an in tūriam̧o ilo būruō. Ikar en̄jake iakwe eo an Anij n̄an eō.

Men̄e ikar būrom̧ōj, Irooj ekar kaenōm̧m̧an eō im kōm̧m̧an bwe metak eo ikar en̄jake en meraļo̧k. Ikar wōnm̧aanļo̧k n̄an en̄jake aenōm̧m̧an eo An ilo elōn̄ wāween ko rokkotaktak, im kōn elōn̄ ro m̧ōtta im jera. Ikar en̄jake kōjeraam̧m̧an, āinwōt an Anij kar kallim̧uri eō.

Ikar kōm̧m̧ane juon aō jar n̄an kam̧m̧olool E, im n̄an kwaļo̧k jon̄an aō iakwe E.

Eļap aō kam̧m̧olool kōn menin letok ko itok jān jar ko me raorōk im raibojooj. Kōnono ippān Jemedwōj Ilan̄ ej juon kōjeraam̧m̧an eļap. Emaron̄ wōr ad tōmak n̄an bōk Ankilaan ilo aolep men ko, im lōke bwe kwojarjar eo An enaaj en̄jake aolep apan̄ ko jej jelm̧aeiki ilo mour in.