E Sili Atu Pe A Tatou Faatasi

O le mea e lelei ai, e mafai ona avea le lotu ma se nofoaga o le sulufaiga mo i tatou pe a tatou tauivi ma manaomia le lagolago ma le faaaumea a tagata o e tutusa o tatou tulaga faatauaina. Peitai, o lena lagona o le saogalemu ma le lagolago e mafai ona aveesea pe afai e te lagona le faaesea ona o ou eseesega. O le ese ai e mafai ona faigata, ma e faigata ona faamatala pe faapei i se tasi e lei oo i ai.

E ui ina valaau atu taitai o le Ekalesia i “tagata uma e lafoai uiga faaalia ma faatinoga o le faailoga tagata i soo se vaega po o se tagata taitoatasi,”¹ e i ai nisi e lei aoaoina lava pe faapefea ona faia. Sa ou vaaia lena mea i le avea ai ma se talavou nofofua matua ina ua tuua au e mafaufau pe o le mafuaaga lena sa leai ai se tasi o tama na manao e tafao faamasani ma au ma pe o le a ou maua le avanoa e faaipoipo ai i le malumalu ona o lena mea. Ua ou vaai i ai i le taimi nei pe a faia e se tasi i le lotu se faamatalaga sese e uiga i ituaiga tagata lea ou te lagona ai le tuuatoatasi, e pei o lo‘u agavaa o loo iloiloina i luma o tagata uma. Ma afai e leai se tasi e tautala mai e faasa‘o lenei aoaoga faavae sese, ua tuua a’u e faia na o a‘u.

E le logolelei le sioa atu i ai, le pa‘i mai o tagata i lou lauulu e aunoa ma se faatagaga, po o le le amanaiaina. Ma pe a ou taumafai e talanoa e uiga i nei mea, e matua tiga lava pe a ta‘u mai ia te au e tagata ou te alofa i ai ma faatuatuaina o loo ou faatupuina na tala, maaleale tele, po o le faafoliga e pei o se tagata ua afaina.

Aisea ua matou faasoa atu ai ma isi nei aafiaga tiga? Ona ou te manao e avea ma se vaega o lo’u aiga faaleuarota. Ona ou te vaai i le tele o mea e mafai ona ou faasoa atu pe a tuuina mai se avanoa. Ae ou te lagona e pei o loo ou i ai i le tausiusiuga o le olaga i le Ekalesia—ae le o malutia atoatoa i le sulufaiga tatou te manaomia uma. Ona o le malamalama atili i le fefaaaloaloai, e mafai ai ona sili atu lo tatou lelei faatasi.

“E le faailogaina tagata e le Atua.” (Galuega 10:34). E alofa o Ia i Ana fanau uma (tagai Ioane 3:16) ma e finagalo e tosina atu i tatou uma ia te Ia (tagai i le 2 Nifae 26:24).

Ua faamanatu mai e Peresitene Russell M. Nelson ia i tatou e faapea “e le sili atu le alofa o le Atua i le tasi tagata nai lo le isi.”²

O o tatou eseesega e le o se mea e tatau ona tatou le ano i ai. O ni vaega taua ia o le fuafuaga a le Atua. Sa aoao mai Paulo:

“A o lenei, ua tuuina e le Atua itu tino e taitasi ma lana tu i le tino, pei ona finagalo i ai o ia. …

“E le mafai foi i le mata ona fai ane i le lima, E leai sou aoga ia te au” (tagai 1 Korinito 12:17–21).

O i tatou taitoatasi o le taunuuga o filifiliga ma aafiaga e le mafaitaulia ua mamanuina ai la tatou vaaiga faapitoa i le lalolagi, ma o loo i ai le matagofie ma le malosi e maua mai i o tatou eseesega.

O lo tatou eseesega e faaleleia atili ai i tatou, e le faapea ona e eseese uma o tatou malosiaga ae ona e tatau ona tatou galulue faatasi i le lotogatasi ina ia faamanuiaina i na malosiaga. O le mea moni, o o tatou eseesega e fesoasoani ia i tatou e aoao ma tuputupu ae ai a o tatou agai faatasi i luma, saunia mo Keriso e toe afio mai.

A o tatou galulue faatasi e maua le lotogatasi sili atu, o le a le faigofie i taimi uma. E manaomia ai ona lava lo tatou lotomaualalo e faailoa atu ai manatu eseese, aoao mai ia i latou e ese mai ia i tatou, ma suia pe afai tatou te iloa ua sese i tatou.

E mafai ona tatou faia lenei mea e ala i le faalauteleina o la tatou li‘o o uo ma e ala i le sailia o manatu faaopoopo e ala i punaoa faatuatuaina. E manaomia ona tatou faalogo ia i latou tatou te vaai i ai e ese mai ia i tatou ma faailoa atu o latou aafiaga e aoga. Ina ia malamalama le tasi i le isi, e manaomia ona tatou faalogo le tasi i le isi. I se tusiga mo le Ekalesia, na saunoa ai Darius Gray, “Afai o la tatou taulaiga faamaoni o le tuu atu lea ia i latou e faasoa mai i o latou olaga, a latou talafaasolopito, o latou aiga, o latou faamoemoega, ma o latou tiga, e le gata o le a tatou maua ai se malamalama sili atu, ae o lenei aoaoga o le a umi se ala e agai atu ai i le faamaloloina o manu‘a o le faailoga lanu.”³

Ou te fia tuuina atu i tagata se avanoa e faamasani ai ia te au, o lea ou te taumafai ai ia tatala ma faamaoni ma agalelei i tagata uma ou te feiloai i ai. Ou te taumafai e amatalia ni faauoga e ala i le valaauliaina o tagata i taumafataga o le aoauli ma amata ai ni talanoaga. Ou te taumafai e fatu ni avanoa saogalemu mo le faamaoni, vaivai, ma le alofa, ma faaavanoa se taimi mo isi tagata i le ala ou te faamoemoe o le a latou faaavanoa ai se taimi mo au. Ou te taumafai e avea ma uo ou te manao ia ou maua—lea e aofia ai le taumafai ia malamalama i aafiaga na oo i isi lea ou te le faasoaina atu.

Ua ou lagonaina le vaaia ma le faaaofiaina i ni faatinoga faigofie o le agalelei ma le aapa atu. Ou te lagona le faaaofia ai pe a faia e tagata se taumafaiga ia faia se talanoaga moni ma a‘u, faaavanoa se taimi mo a’u, pe valaaulia a‘u e faaalu se taimi ma i latou. E ese le manaia o lagona pe a faaalia e tagata latou te mananao e faatasi ma oe.

Na saunoa Elder Quentin L. Cook o le Korama a Aposetolo e Toasefululua: “O le lotogatasi ma le eseesega e le faafeagai. E mafai ona tatou ausia le lotogatasi sili atu pe a tatou faafaileleina se siosiomaga o le faaaofia uma ma le faaaloalo mo le eseesega o tagata ma aganuu.”⁴

Pe a tatou filifili e faaalu se taimi e malamalama ai i aafiaga o le olaga o le tasi ma le isi—e tusa lava pe le faigofie mo i tatou ona faia—ma filifili e galulue faatasi e faaaoga mea ua tuuina mai ia i tatou e auauna atu ai i le Alii ma le tasi ma le isi, e sili atu i tatou nai lo le aofaiga o tatou vaega.