Kairake n Ikawai
Te Konabwai ni Kaitarai Bwaai aika Roota te Namakin
E maeka te tia korokaraki i Seville, Spain.
I tuai n rinanon te nakonnano ni karokoa I okira mweengau man au mition, ngaia are I aki rang koaua raoi bwa N na kanga ni waaki nako.
Tamnei a kaotaki man katotongan tamneia maotoo (model)
Te maiu e nakoraoi nakon are e baireaki.
E nang bon bane au tai ni mitinare. Inanon 18 namwakaina mai imwaina, au koaua e a tia ni kakorakoraaki, ao au taaratara iaon te babaire ni kamaiu e a rababa nako. I tuai namakian te kaniiaki riki nakon au Tia Kamaiu ao Tamau are i Karawa mai imwaina. Te maiu e a bon taraa n nakoraoi.
Eng, au utu ao ngai ti rinanon kakaewenako, ma iaoia ni kabane, I rang ingainga ao iai au babaire ae bubura ibukin taai aika a na roko. Ma imwiina I a okira mweengau. Te bitaki ae korakora e bon rangi ni kakamaku. I korakai ni kataneiaai nakon te maiu ni katoabong. I raraoma n tainako ibukin karaoan rinerine aika raraoi ao ni kororaoi n te ongotaeka. I katokaa te rawawata iaou bwa maiun tamneiu e na tiku ni korakora n aron are I kakarekea rinanon au mition ibukina bwa I maaku bwa ngkana I aki, ao N na rang mamaara n te maiu n tamnei.
Ngke e a rikirake te rawawata are I katokaa iaou, I a moanna n namakina te nakonnano ao n roroko te maaku irou. A moanna n rang korakora n okioki, ao n tokina I namakinna ae kaanga I a inako inanona.
Te kananokawaki, I karabai au namakin mairouia au utu ao raraou. I ataia bwa te nakonnano ao te rawawata bon tiaki te bwai ni kamama, ma I namakinna bwa I aki kona ni katokia ao I a bua n te aro are I aki ataia bwa N na kanga ni kabwarabwara bwa I aonga ni karekea te ibuobuoki.
Ma I kakaitau, te Uea e mena ikekei n tainako ni kaiririira ngkana ti rairaki nakoina. Ao imwiin iangoakina ao te tataro, I namakina te kairaki bwa N na kaotii bwaai ni kabane nakon mwaneu ao buuna. A buokai n ataia bwa I aki rang “tabaua” n aron are I iangoia ao te korakai n te namakin e kona n riki nakoia aomata nako.
Titita Reyna I. Aburto, te Kauoman ni Kauntira n te Beretitentii ni Kabuta n te Bootaki n Aine, e taekina koauan te koaua aei: “Raou aika a tangiraki , e kona n riki nakon temanna mai ibuakora—riki ngkana, ngaira ake taan kakaoaua n te babaire ni kakukurei, ti katikui rawawata aika akea bonganaia iaora n iangoia bwa ti riai ni kororaoi ngkai. Iango aikai a kona ni karawawata ao ni kamamaara. Karekean te kororaoi bon te waaki ae ti na karaoia rinanon nako maiura ae mamate ao are iaona riki—ao bon tii rinanon ana akoi Iesu Kristo.”1
Te Kooti n Reirei ae Kairaki iroun te Tamnei
Ngke I tataro nakon Tamara are i Karawa ibukin te kairiiri, I kunea bwa I riiai n rinanon bwaai n ibuoboki are e a tia ni katauraoia ibukira bwa tina kabongna , ao I riai n reiakin ao ni bitaki nakon ae tamaroa riki. Ma te kakaitau, n te tai anne e reke au tai n ira te kooti n te Ekaretia iaon te konabwai ni kaitarai bwaai aika a roota te namakin. Te tibwanga aei e tara n roko raoi n te tai ae kainnanoaki, ao I aki kakoaua bwa te bwai ae manennanti.
N te boki n reirei, emotional resilience e kabwarabwaraaki n aron aikai:
-
“Te konabwai ni bitaki nakon kakaewenako n te namakin ma te ninikoria ao te onimaki are e boboto iaon Iesu Kristo.
-
“Buokakim ibon iroum ao tabeman nakon te kabanea n taamaroa are ko kona.
-
“Kakaenako ibukin te ibuobuoki ngkana e kainnanoaki.”2
N taekana teuana, te konabwai ni kaitarai bwaai ake a roota te namakin bon te bwai ae ti bane ni kainnanoia.
Irou, te kooti ae kairaki mai iroun te tamnei aei bon te kanikina ae kaotia raoi bwa Tamara are i Karawa e atai karawawata aika ti kaitarai ni boong aikai ngkai kain ana Ekaretia Iesu Kristo. E tangiria bwa E na kona ni buokiira bwa tina teimatoa ni wakinako iaon te kawai n oki nakoIna. Noorakin tamaroan bwaai ake a rinanoaki n te kooti aei e buokai n ataia bwa ngaia Tamara are i Karawa e kinaira ao E atai kainnanora n tatabemaniira nako, ao I waekoa n namakina te rau ngkai I waakina au kamatebwai. Te kooti e reirei koaua ae akea tokiia ma mwaaka ake a kona ni kabonganaaki inanon maiura ngkai ti kaitara ma kangaanga ni marurungin te iango, ngkana ti rinanona bon ngaira ke temanna are ti tangiria.
Teuana te reirei are e roota nanou e reke ni mwakoro 9, “Karekean te Korakora nakoia Tabeman.” Te mwakoro aei bon ngia are e buokai ni kakae nako ni karekea riki te ibuobuoki. E reirei te tua iaon te uaia n ibuobuoki imarenara. I reiakina aron kakaawakin buokakiia tabeman man boutokaan te bwai are a rinanona, aia namakin, ao bwaai ake a kona ni karaoi ao n nanoangaiia ao ni mataata n aroia. I ataia naba bwa I riai n onimakiniia tabeman bwa a na buokai n au tai n rinanoni kangaanga.
Ngke I a kona ni karaoi nanon iango aikai ao ni kaoti bwaai ni kabane nakoia au utu ao raraou iaon korakaiu ni kaineti ma marurungin au iango, I bon mimi bwa a rang n nanoanga ao aki tauraoi ni motikitaeka. I karekea te boutoka ae mwaiti mai irouia.
I namakinna bwa nakonanou e na bon tia n roko ni korakorana ngke arona bwa I aki tibwa au kangaanga ma raou aika I tangiriia. Ao te bwai are I rinanona aei e buokai ni karoko irouia ao n namakina te nanokawaki ma tabeman iaon aia raraoma ao aia kangaanga naba.
Ti Kona ni Kaitarai Taai aika A na Roko ma te Kantaninga
I kunea bwa e kakamanga aron okiu man au mition, I rang n raraoma bwa e na aki bua “marurungin maiu n tamnei” are I a tia ni karekea n tain au mition, ibukina ngkai I a ataia bwa okiran te mweenga bon moanakin te mwakoro are I kona ni karekei iai kawai aika a boou ni katamaroa riki au onimaki.
Aron reitakiu ma Tamara are i Karawa ao Iesu Kristo a tia n rikirake ao n nano riki ngke I okira mweengau, riki ibukina bwa reirei ake I reiakin inanon te kooti aei iaon te konabwai ni kaitarai aroaro aika a na rota au namakim ao arou ni katan iaon Tamara are i Karawa ao te Tia Kamaiu ibukin te ibuobuoki. A bon koaua aron namakinaia ao a bon riki inanon maiu ni katoabong.
I a tia n reiakinna ao ni butimwaia bwa ngkai natin te Atua, tina reitinako ni bitaki, reiakinaki, ao n rikirake. Ao riki rinanon nako bitaki ni maiura, Tamara are i Karawa e aki bibitaki. E aki kantaningaia bwa N nakororaoi iaon au mition, ao E bon aki kantaninga anne n te tai aei. E bon ti tangirai ao E tangiria bwa N na reitinako ni kekeiaki nakoina ao ni karaoa au kabanea n tamaroa are I kona iaon kawaiu n oki nakoina.
N te tai aei, tao ibukina ngaki I karaoa te kooti iaon te konabwai ni kaitarai bwaai aika roota te namakin, anne e aki nanonaki bwa ai akea te nakonnano ke te maaku ke taai ae na rang rootaki iai n te maaku ibukin taai aika a na roko. I bon namakinna naba n taai tabetai. Ma n te tai aei I ataia bwa baeten aikai ao n reiakin bwaai n ibuobuoki ni buoka kaitarakiia n te aro ae nakoraoi riki, ni katamaroai anuau ni katoa bong.
N tokina, te kooti aei e reireinai kawai ake a na kanakoraoa nanou ao tarakiu n taai ake I namakina iai te nakonnano ao taian kakaewenako. E reireinai bwa N na karekea te taotanakinnano ao te nanoanga ibukiu ao arou n aki kororaoi. Ao I reiakinna n ataia bwa e kanga te Atua n noorai ao n aki maakui bwaai aika aki ataaki n taai aika a na roko.
Rinanon te rabakau ao te ibuobuoki mai karawa, I a ataia bwa iai bwaai ni mwakuri ae a reireiniira arora ni “mwakuri … ao n aki kairiiraki” (2 Nibwaa 2:26) man aroarora ao ara namakina ngkai ti reitinako ni waaki nakon Kristo.