Bwanaaia Aika Itiaki ni Boong aika Kaitira
Iai Ikai Ana Boki Moomon!
Ngke I taua ana Boki Moomon inanon baiu, I namakina rawawatau bwa a kaitiakaki n ana tangira te Tia Kamaiu.
Tamnei iroun Jacob A. Brown
N te Kaonobong teuana i nuukan tain te kamwaitoro, kainnabau ao ngai ti kabonganaa te bong ae riringa ma ni kamwaitoro ni kinaia riki kain rarikira. Ti a bon tibwa mwaing man mweengara tengaa te maire nakon te East Coast n te United States ibukin karekean te reirei ao te mwakuri.
Ti baireia bwa tina rianna nakon te iniwetiri ae ti tuai n roroko iai mai imwaina. N te tai aei ti kunea te tabo n tangoboki n te inuiwetiri. Ti kukurei ni wareware, ao kainnabau, ataein te reirei n ana kabanea n ririki, e kan ataia bwa tera booki aika e kona ni kunei ibukin ana kamatebwai. Ibukina bwa e kamatebwai iaon rongorongon te aro, ti rinanon rinanin booki n ana itera taekan te aro. Ngke ti matakuakin tabeua atuun rongorongo, te boki ae uarereke ma tinanikuna ae kinaaki e teke i matau.
“Iai naba ikai Ana Boki Moomon!” I wirikiriki ma te kukurei.
I anaa te boki man nen booki. Bon te boki ae e a mane, ao I titiraki bwa manra tikuna ikekei. Tera ae e katika riki matau bon te kanim ae uarereke ae kanimwaki inanoan te iteraniba mai moa.
Te karinrin bon taekan te koaua ae kimototo irouia taangan Balckfoot, Idaho, USA. N aia kakoaua, a kabwarabwara bwa teraa Ana Boki Moomon ao bukin tera e kakaawaki. A tibwa aia koaua ae kimototo man korakora iaon te boki, ao a kaoia taan wareware bwa a na tataro bwa a na ataia ngkana e koaua.
A beebete aia taeka, ma aia rongorongo e tiku inanou. Tao te taanga aei a nanonna bwa aia koaua e na warekaki irouia ake tiaki kain ara aro. Tao a angan temanna ae a kinaa te boki aei. Antai ae e ata mwaitin ana tai ni bwatinaki inanon bai ke iraua te maire ae e a tia n mwananga iai ao n toki n te tabo n tangoboki n te iuniwetiri?
Ngke I taua te boki inanon baiu, te tamnei e kaona nanou. N te tai ae uarereke, I namakina te rawawata bwa e kaitiakaki n abueen ana tangira te Tia Kamaiu.
Te bong anne n te tabo n tangoboki e reitinako ni kauringai te kakabwaia are I karekea man warekan ana Boki Moomon ao kakawakin tibwakin au koaua iaona. Ara koaua e kona ni bwaka “n tabo aika kiriatibu” ke “inanon tano aika raraoi” (taraa Mataio 13:3–9), ma e kakaawaki bwa tina tibwauai. Te Atua e na kakaoaua bwa a karokoaki iaon te tai ae riai, n tabo ake a kainnanoaki iai, ao nakoia aomata ake a kainnanoia.