Moan Rikin Bwaai ao te O Tetemanti

Tamnei

Jesus Christ with stars in background

Kristo ao te Karikibwai, iroun Robert T. Barrett

Bon te moan waaki n te ririki ae boou, are e tara n ai aron te tai ae riai n iangoa taekan moan rikin bwaai.

Te ririki aei, te O Tetemanti ao te Bwaeao ae Bati Boona a na kairiira iaon mwanangara n neweabai tabeua moan rikin bwaai aika moan te tamaroa man rianako ake ataaki irouia aomata nako.

Tina kona riki ni matata n ataakin Iesu Kristo, are raon te Tama “n te moantai” (Aberaam 4:1). Ti kona ni wareka taekan Karikan te Aonaaba ao moanakin te maiu ae mamate. Ti kona n reiakina taekan moan te rairannano, utu, tuua, ao te taromauri n te tembora ikai iaon te aba. Ti kona ni kamatebwaia te moan waaki ni berita aika a tabu are e reitinako ni kateiraoa maiura ni boong aikai.

Ao ngkana ti tuai n tangira te O Tetemanti, te bong aei e kona ni mwakena te moan waaki ae boou n te tai ni kamatebwai ao te neweaba ae boou. Iaon iteraniba 20, I tibwai tabeua koaua ake a buokai n anganai te kakukureiai iaon te boki ae tabu aei ao n noori reirei ake iai ma te korakora ao te kantaninga ae boou. Iaon iteraniba 26, Beretitenti Mark L. Pace, Te Beretitenti ni Kabuta n te Reirei n Tabati, e kabwarabwara te kakabwaia ae korakora are ti kona ni karekea ngkana ti tauraoi ni wareware “ma te iangomwaaka ao te tataro mwaaka.”

Ae kakaawaki riki iaon aikai, tina uringnga bwa te tai ni maiu n te moan waaki ae boou e riki bwa bon ibukin Iesu Kristo. N ana rongorongo Unimwaane Quentin L. Cook iaon iteraniba 6,e kakoaua bwa “bwai ni kabane aki bua” ibukina bwa ara Tia Kamaiu e tataninga ma baina aika tangaina. Rinanon Ana nanoanga, ti a kona n reitinako n te mwananga n tamnei are a kaman waaki inanona ara bakatibu n ririki aika a nako.

Au kantaninga bwa te ririki aei e kaonaki ni bwaai aika kamimi ni moanakin bwai ibukira!

Marissa Widdison

Te Tia Ibuobuoki ni Manatia n Eteta, Gospel Living App