Te Kakabwaia man Kamatebwaian te O Tetemanti

I tangiria n tibwaua te karaki bwa e kanga te kibu ae ti teuana man te O Tetemanti n ana nanou rinanon maiu.

Inanon 1974, 17 au ririki. I kukurei n te maiu ngke I riki bwa ataein te kauarinan n reirei. E rang n ingainga nanou nakon au mition. N te Okitobwa 1974 Ensign maekatiin, I wareka te rongorongo ae rangi n anainano mairoun Beretitenti Spencer W. Kimball (1895–1985) ae atunaki “When the World Will Be Converted (Ngkana E na Rairaki Nakon te Koaua te Aonaaba).”¹ I a tia ni warekia n taai aika mwaiti. E kaungaai ni karokoa te bong aei.

Beretitenti Kimball e kabwarabwara te taratara ae tabangaki iaon rikiraken Ana Ekaretia Iesu Kristo ibukiia Aika Itiaki ni Boong aika Kaitira n te bong aei. E reirei iaon reken ara tai ao tabera n tataekina te euangkerio nakon te aonaaba. Beretitenti Kimball e taekina te kibu man te boki ae Karikani Bwai. E kaungaai ao e reitinako ni kaungaai rinanon maiu: “Iai te bwai teuana ae aki kokonaki iroun te Uea?” (Karikani Bwai 18:14, te boki ae tabu aei e na kanakoaki ibukin te kamatebwai inanon Beberuare).

Tamnei

Abraham praying

Aberaam iaon Marenauan Mamre, iroun Grant Romney Clawson; tamneia mitinare iroun Alicia Cerva; tamnein te aonaaba iroun Getty Images

Beretitenti Kimball e rinanon karakinaia Aberaam ao Taara. Taara e ngareakina ana berita te Uea are ngaia ma Aberaam e na riki natiia te mwaane. A tuai kakabwaiakaki n reken natiia. A koro ngkai, 90 ao 100 aia ririki ni maiu. A bon riaon ririki aika tau ibukin karikan te ataei.

“Ao e taku te Uea nakon Aberaam, e aera Taara ngke e ngarengare …?”

“Iai te bwai teuana ae aki kokonaki iroun te Uea? I a manga okiriko n te tai ae e motikaki bukina, ao e na reke natin Taara” (Karikani Bwai 18:13–14).

Aberaam ao Taara a kamwakura aia onimakih. E kawakina Ana berita Te Uea. E bungiaki Itaaka. Aberaam e riki bwa tamaia kaain aonaaba.

“Iai te bwai teuana ae aki kokonaki iroun te Uea?” Te kibu man te O Tetemanti aei e a tia ni kakorakoraai ngke I a tia ni kaitara ma kakaewenakon ke raraoma n te maiu aei:

• Ngke te mitinare ngai ae boou ngke I namakina te rawawata. “Iai te bwai teuana ae aki kokonaki iroun te Uea?”

• Imwiin au mition, ngke Anne Marie ao ngai ti iangoa te mare ao n raraoma bwa ti na kanga ni kabooa te amwarake, boon te auti, ao te roo n te kaoreti. “Iai te bwai teuana ae aki kokonaki iroun te Uea?”

• Ngkai taanga aika boou, butimwaeaia ataei ao namakinan kangaangan te maiu ma te mwane. “Iai te bwai teuana ae aki kokonaki iroun te Uea?”

• Kaitaraan kakaewenako n te reirei, rikiraken te utu, ao moanakin te mwakuri. “Iai te bwai teuana ae aki kokonaki iroun te Uea?”

• Ngke I beretitenti n te Spain Barcelona Mition, Anne Marie ao ngai tiaki toki n tara te kibu aei ngkana ti reireiniia mitinare. “Iai te bwai teuana ae aki kokonaki iroun te Uea?” Reeta nakoia ara mitinare tiaki toki ni karina te titiraki “Iai te bwai teuana ae aki kokonaki iroun te Uea?”

Tamnei

reproduction of stone tablets with Ten Commandments

Moses Parting the Red Sea [Mote Ngke e Bwena Taari ae Uraura], iroun Robert T. Barrett; Atam ao Ewa inanon te Onaroka, iroun Lowell Bruce Bennett; manga karaoakin te baba te atibu man te Getty Images; tamnein San Diego California Tembora iroun Monica Georgina Alvarado Zarate

Te kibu aei bon teuana mai ibuakon katotoon kiibu aika mwaiti ae e anai nano aika kuneaki inanon te O Tetemanti. I kakoaua bwa a mwaiti aika a tia ni kakorakoraa nanom. Ngkana ti teimatoa ao n tataro mwaaka ni wareka te O Tetemanti n te ririki aei, te Tamnei ae Raoiroi e na kaoti nakoira kiibu riki tabeua aika ana kakorakorai rairakira nakon Iesu Kristo ao Ana euangkerio.

Iai inanon te O Tetemanti tuua ao reirei ni bwaai aika kakawaki aika akea tiaia. Iai inanona taetae ni buirabeti aika a na kakoroaki bukiia. E reireiniira bwa ti roko mai iaa. Ao e reireiniira taekan ana berita Aberaam, ae teimatoa ni waaki n te bong aei.

Te O Tetemanti e katauraoa aan booki aika tabu ake tabeua. Rikiraken otara iaon te O Tetemanti, bon rikiraken naba otara ni waorium ni booki aika tabu ake tabeua, ibukina bwa reirei man te O Tetemanti a kaoti inanon booki aika tabu ake tabeua:

• N Ana mwakuri, te Tia Kamaiu e reirei man kabongakin booki aika tabu man te O Tetemanti.

• Riaai ao ana utu a uoti bwatua buraati, aika iai inanona booki aika tabu man te O Tetemanti.

• Nibwaai e reireina Iakobwa man taekinan reirei mairoun Itaia inanon te O Tetemanti.

• N tain Kaotina nakoia Nibwaaite imwiin Mangautina, Iesu Kristo e taekin reirei mairoun Itaia ao Maraki inanon te O Tetemanti.

Tamnei

beings appearing to Joseph Smith and Oliver Cowdery in Kirtland Temple

Vision in the Kirtland Temple [Mii ni burabeti inanon te Kirtland Tembora], iroun Gary Smith; The Second Coming [Te Kauaoki], iroun Harry Anderson

Burabeti ao reirei n te O Tetemanti a bon kakawaki naba nakon rongorongon Kaokan te euangkerio n ara bong:

• N ana moana kakawari nakon te Burabeti Iotebwa Timiti, Moroni e taekina ana taeka Maraki.

• Te Bwaeao ae Bati Bona iai inanona ana boki Aberaam ao Mote.

• Mote, Eriati, ao Eria anga aia kiing n te nakoanibonga nakon te Burabeti Iotebwa Timiti inanon te Kirtland Tembora.

Ngkana ti wareka te O Tetemanti, ti riai n iangoia bwa booki a rineaki, katuruturuaki, ao ni baireaki n te kawai ae onoti ibukin bukina man te aro. Ti kona ni katautau n titirakiniira, “Bukin tera e kaairaki te rongorongo aei ao tera te kaantaninga ae na reke mai iai?”

Ngkai mwakoron te O Tetemanti e kona n tabetai ni kangaanga te ota iai, ti riai n uringnga bwa iai inanona kaubwai aika aki riai ni katinanikuaki. Ngke e reirei Iotebwa Timiti, “Ti kakoaua te Baibara ae ana taeka te Atua ngkana e eti rairana” (Taekan te Onimaki 1:8). Ni koauana ti kakabwaiakaki ngkana ti kamatebwai ana taeka te Atua!

E kona n ibuobuoki n ara kamatebwai n te O Tetemanti n tarai boto n iango ao atatai aika nano. Ti riai n tarai kawai aika ti na ataia raoi iai bwa te Atua n te O Tetemanti bon te Atua naba n te Nu Tetemanti. Iehova bon Iesu Kristo. E kanga reiakinan te O Tetemanti ni buokiira n ata raoi ara Tia Kamaiu?

Boto n iango ake tabeua aika I kunei n te O Tetemanti e raonaki ma berita aika tabu, te mimitong, burabeti aika maiu, te angakarea ao te ongotaeka, te onimaki ao te rairannano, kamoamoaan te Uea, ao ana tautaeka te Atua.

Ngkana ti kamatebwai, ti riai n uringnga ae te kaotioti ni boong aika kaitira a katauraoa nakoira te ota n te O Tetemanti ae tabwanin. Te katooto, te kakaitau nakon te kaotioti n taai aikai, ti ataia bwa burabeti n te O Tetemanti iai irouia te Nakoanibonga ae te Merekitereka ao burabeti ni boong aika imwaina a ataa ao a reirei ana euangkerio Iesu Kristo.

N te mwioko n tararua ni boong aikai, ti a manga kakabwaiakaki riki n ataia ae burabeti ao abotoro a katauraoi reirei ao kauntira aika kairaki mai ieta.

Unimwaane Quentin L. Cook man te Kooram n Abotoro n te Tengaun ma Uoman e moan kaota Nakomai, Iriira—Ibukiia Aomata n Tatabemaniia ao Utu n te maungatabu ni kabuta n Okitobwa 2018.² E a tia te bwai n ibuobuoki aei n riki bwa te kakabwaia ibukira ni kabane. E a tia teniua te ririki n nako ni katauraoia ibukiu tabeua taneiai ni kamatebwaian koroboki aika a tabu aika kakawaki man uaana inanon maiu. I kakoaua ae kakabwaia aika ti tebo aikanne a tataningaira inanon 2022.

E taku Beretitenti Russell M. Nelson bwa ngkana ti biti mweengara bwa te tabo ibukin te onimaki ao taabo ni kamatebwai n te euangkerio, ti na karekei aua kakabwaia aika onoti:

1. “Inanon taina a na riki am Tabati bwa boong aika kakukurei.”

2. “Ami ataei a na rang n ingainga n reirei ao ni maiuakin ana reirei te Tia Kamaiu.”

3. “Ana kairoro te tia kakaitara ni maium ao ni mweengam a na kerikaaki.”

4. “Bitaki n am utu a na bane ni kakukurei ao n teimatoa n reitinako.”³

Ana berita Beretitenti Nelson a kakukurei, ao a bon koaua. A tia kakabwaia aikai n riki bwa bwaai aika koaua ao a na reitinako nakon 2022 ngkana ti kamatebwai ao n reirei man te O Tetemanti.