Rerein te Mwakuri n Ibuobuoki
Karaoan te Mwakuri n Ibuobuoki ae Materaoi
Ngkana ko titiraki bwa am mwakuri n ibuobuoki e materaoi, iangoi iango aikai.
E beebete te titiraki ngkana ara mwakuri n ibuobuoki e karekea te bitaki, riki ngkana ti kaitarai oin ara kangaanga.
Inanon maiu imwaain kabonganaan aia kaintekateka mwauku, I tatangiria n noora te kiribiboote ni kabutaki n te Bootaki n Aine. I aki toki ni korea arau bwa N na anga te ibuobuoki. Bon te aro are I kaota iai au anganano “ni katoka iaomi rawawataia raomi” (Motiaea 18:8).
Tiaki ana kairua te kiribiboote are I aaki kona iai ni manga korea arau. Ni koauana, I a bon aki kona ni koreia naba teutana. Ibukin aki toamaun rabwatau, I aki naba kona n taua te kiribiboote. Akea ae e kantaningaai bwa N na korea arau. Ma, o anne bon nanou ae I tangiria! Te ibuobuoki e mwaneira inanoan ana tangira te Atua ao n reitiira ma tabeman. I rang kainnanoa te namakin n reitaki anne.
Ibukina bwa I kainnanoia aomata bwa a na tabe ibukiu, au ibuobuoki e aki tara n rang bongana e na kainnanoia tabeman bwa a na buokai. Te kiribiboote e a riki bwa te kauring n te bwai are I aki kona ni manga karaoia—e kakaawaki bwa aine ake taan ibuobuoki a noora kainnanou.
E titiraki neiei nakoiu bwa tera ae I tangiria ni karaoia bwa N na ibuobuoki, tiaki ti te bwai are I kainnanoia bwa e na karaoaki ibukiu. Imwiina e karina arau iaon te kiribiboote. E roko ni mweengau ao e buokai ni karaoa te amwarake are I anganano bwa N na katauraoia ibukiia tabeman. E aki kona n taekinna bwa I kainnanoa ae mwaiti riki bon ibukiu n te aro are I riai n aki kataia ni buokiia tabeman. E rangi ni kukurei ni kabanea ana tai ma ngai.
N tokina, I ataia bwa au konabwai e bon boongana. N raonaki n ana mwakuri n ibuobuoki te titita n ibuobuoki, I a kona ni karaoa te bwai teuana. Iai nanon anne ke tao akea nakon temanna, ma e karaoa te bitaki nakoiu. E ngae ngke e aki buokiia au utu ke ni kamarurunga rabwatau, e buokai ni kamaoa nanou.
EmRee Pugmire
Utah, USA
N Raonaki n Ana Ibuobuoki, Ko A Boongana Riki Nakon Te Aki Tau
Te Kaawa are Tion e Uotakirake, iroun Del Parson; tamnein te kiraati ni kabubura mairoun Getty Images
E bon rereke te namakin n aki tau ni karaoan ana mwakuri te Uea. Te burabeti are Enoka e namakina naba anne. Ngke e tua nakoina te Uea bwa e na tuangiia aomata bwa a na rairi nanoia, e raraoma ibukina bwa “ngai bon te teinimwaane, ao a bane aomata n riribaai; bwa I aki kona n taetae raoi” (Mote 6:31).
Ma e berita te Uea bwa E na mena iroun Enoka ao Tamneina e na mena irouna, ai “ngaia are … am taeka ni kabane N na kariaia,” E kaoa, “nakonako ma ngai” (Mote 6:34).
Enoka e ongotaeka nakon ana taeka te Uea, ao e a moanna ni korakora ni bitiia aomata, tiaki ibukin oin mwaakana ma bon ibukin ae “moan te korakora mwaakan te taetae are e anganna te Atua.” (Mote 7:13).
Reirei aika a na Iangoaki
Ngkana ko kan ataia ngkana am mwakuri n ibuobuoki e materaoi, iangoi reirei aikai:
-
Ataakin te mwakuri n ibuobuoki ao boonganana e na buokiira ni bairei ara mwakuri nakon raoi are e kainnanoaki.
-
Te Mwakuri n ibuobuoki bon katean te reitaki ae korakora riki; bon taekan buokakiia tabeman ni kakorakora aia reitaki ma te Tia Kamaiu.1
-
Te Mwakuri n Ibuobuoki tiaki ti te mwakuri ae e na karaoaki; bon aron maiuakinan ara berita aika tabu ni beku Ibukina man tabeakinara imarenara.
-
Te mwakuri n ibuobuoki tiaki irakin tein te ibuobuoki ae e a kaman baireaki. E anganiira te kona n roota are i aona ngkai ti karekea te kona ni kaitarai aro ao n ukoukori kairi ibukin ibuobuoki n aron are e karaoia te Tia Kamaiu.
-
-
Ataakin ana nonori te Atua n ara mwakuri n ibuobuoki e kona ni bita ara taratara.
-
Te Atua e aki taubwiia mwiin te mwakuri n ibuobuoki ae korakora te bitaki iai ke ngkana ara mwakuri a rang kakaitauaki (tara te katoto iroun Oliver Granger n Reirei ao Berita aika Tabu 117:12–13).2
-
Ngkana e tamaroa nanora ao ti karaoa te mwakuri raoi, ara mwakuri n ibuobuoki e nano riki irouna (taraa Reirei ao Berita aika Tabu 4:2, 5).
-
Te Atua e tauraoi ni karakai riki ara “ibuobuoki aika uarereke ke aika aki kona n nooraki”3 (taraa Reirei ao Berita aika Tabu 123:17).
-
Tera Ae Ti kona ni Karaoia?
N onean mwiin te raraoma ibukin te bwai are ko iangoia bwa ko aki kona ni karaoia, tataro mwaaka n iangoia bwa tera ae ko kona ni karaoia. Imwiina karaoia. Ngkai ko mwakuri n aran te Uea, E kona ni karakai am mwakuri ao ni kabonganai ni kakabwaiako ao ni kakabwaia tabeman (taraa 2 Nibwaai 32:9).