Ron̄ Ainikien E Ilōn̄in Ainikien eo Ekowaron̄ron̄

Ilo iiō ko rellōn̄, kijejeto ko ad n̄an riiti Bok in Mormon jān m̧aan n̄an lik emaron̄ juon en̄jake eo me jooj aolep meļeļe kake. Kōn bar riiti jān jinoin jejjo kōttan, ekar kōtļo̧k bwe jen ekkatak eļapļo̧k kōn Nipai im baam̧le eo an. Ad tōpar ralitōk jebta in Nipai em̧ōj ad lo m̧wil ilo oktak ko an kajjojo ro uwaan baam̧le eo. Juon jemān ak jinen eo ejim̧we ekar kōmeļeļeik āinwōt ro jemān im jinen rem̧m̧an,¹ kōn ajri ro nejier rej jelm̧ae en̄jake ko reppen ilo aer jodikdik wōt. Jej lo wāween an oktak kālet ko an ajri rein, men̄e rekar jim̧ōr jelm̧āe juon wōt men.

Bwebwenato in eļapļo̧k jān wōt juon bwebwenato bajjōk ak juon men ekar jeiki jān juon ļaddik kōn ro jinen im jemān im jein im jatin Liai, innem Nipai, rekar jim̧ōr rikanaan. Ad jeļā im meļeļe kōn iien ko rej bōk jikier ilo jeje ko rekwojarjar ej ļapļo̧k n̄e jej bōk kam̧ool jān Jetōb Kwojarjar, eo ej kam̧ool kōn m̧ool in im ekōjkan an kar jepļaaktok ilo raan kein ad. Eļapļo̧k wōt jān juon bwebwenato bajjōk eo ewōr ie armej ro rej kōm̧m̧an bwe en āinwōt em̧ool. Jemaron̄ ron̄ ainikien Anij ilo naan ko an rikanaan ro etto.

Tomak eo an Nipai, n̄an etal im kōm̧m̧ane men ko Irooj eaar kean̄² ekar kōkajoorļo̧k kōj n̄an ejaake lōke im tōmak eo ad ilo Irooj Jisōs Kraist. Ilo ettōņk eo an Liai, Liai ej lo e make im̧aanin wōjke in mour eo. Le ko leen rej barāinwōt kakkōļļeen iakwe eo an Anij.³ Ālikin an kar m̧ōn̄ā leen wōjke eo, Liai ekar kōmeļeļeiki an kobrak an kōn eļap otem ļap lan̄lōn̄ im ekar jeļā bwe enno̧ļo̧k jān jabdewōt leen otemjeļo̧k⁴. Ilo iien ko mour ko ad remaron̄ en̄jake jab jeļā ak inepata. Kōn gospel eo an Jisōs Kraist em̧ōj an jepļaaktok, jemaron̄ lo kōjatdikdik. Elder David A. Bednar ekar ba, “bōk m̧ōttan leen wōjke eo ej jutak kōn bōk kain̄i ko im bujen ko bwe Pinmuur eo en maron̄ lukkuun bōk jikin ilo mour ko ad. Leen eo kar kōmeļeļeik āinwōt “kaijōļjōļ n̄an kam̧ōņōņō jabdewōt” im ej kwaļo̧k eļap lan̄lōn̄ im ikdelel n̄an kwaļo̧k lan̄lōn̄ in ippān ro jet.”⁵

Ettōņak eo eobrak kōn kōkaļļe ko im ej jipan̄ kōj keidi bwebwenato eo ippān mour ko ad. Aolep ro rej etetal ilo iaļ in rej bōk jipan̄ jān aen in dāpdep eo, eo ej kakōļļeen naan an Anij⁶. Jokne ejjab waļo̧k jān wōt ad epaake aen in dāpdep eo, bōtaab ilo ad dim in dāpiji enaaj letok jipan̄ ekajoor im kōm̧m̧an bwe jen koņ. Baam̧le eo an Liai ej jutak kōn aolep ajri ro nejin Anij me rej ilo̧k ilo iaļ an mour wabanban in. Mekarta jedik ak rūtto, m̧are ak ejjeļo̧k rejtan, dāpdep n̄an m̧ool n̄an naan eo an Anij ej letok n̄an kōj kōjparok im bar kam̧ool bwe aolep men renaaj em̧m̧an, jekdo̧o̧n n̄e ewōr juon kapan̄pan̄ im̧aan.

Ijeļā bwe ewōr ad jeļā kōn bwebwenato in ettōņak eo an Liai. Ilo ad lukkuun jar im ekkatak jeje ko rekwojarjar, Jetōb Kwojarjar eo emaron̄ letok im̧we ko ad make n̄an ad meļeļe. Ālikin an kar en̄jake iakwe eo an Anij, uwaak eo em̧ōkaj an Liai ekar n̄an kappukot baam̧le eo an im kūrtok er n̄an m̧ōņōņō jān aer make en̄jake men eo ekar en̄jake.⁷ Jokne eo an baam̧le eo ad indeeo ej aikuj juon men eo aorōktata ippād. Jab jeļā ia rej aikuj etal ie, Liai ekar ba n̄an er kōn juon ainikien eļļaaj n̄an kwaļo̧k n̄an er iaļ eo.⁸ Eļļaaj ejjab ekkeijel ippān ainikien juon jemān ak em̧ool ainikien juon rikanaan. Bōtaab, ainikien Liai kar aikuj ron̄ ilōn̄lo̧k ainikien ro ilo m̧weo ekilep im ļap me rej lam̧ōjtok enaan ko rebōd naan in kapo. Ilo ad ļoor tōl eo an rikanaan ro ad ilo raan kein āliktata, m̧oko im̧ōd rej erom̧ ioļapļap n̄an jikin ekkatak gospel eo im kareel ko an rikapo eo enaaj dikļo̧k.⁹

Rainin, Būreejtōn Russell M. Nelson ej ineek ejja wōt ainikien in em̧ōj kappeik kake. Āinwōt kar Liai, ej kōketak kōj aolep kōn aolep en̄jake an juon jemān eo ej iakwe nejin¹⁰ n̄an eo̧ron̄ ainikien Irooj.¹¹ Būreejtōn Nelson ekar ba, “Katak eo an Kraist ej jipan̄ kōj loe im pād wōt ilo iaļ in bujen eo. Pād wōt ilo iaļ in erarin ak iaļ in em̧ōj kōmeļeļeiki enaaj lukkuun kōkarbab e kōj n̄an ad bōk aolep men ko an Anij. Ejjeļo̧k juon men emaron̄ aorōkļo̧k jān aolep men ko ewōr ippān Anij!”¹²

Ilo ad kōpopo n̄an Kweilo̧k eo Eļap, ainikien rikanaan ro renaaj eļļaaj im alikkar. Ban jon̄e ainikier kōn wāween an ļap aer ekōnōnō, kōn menin jej aikuj pinejļo̧k ainikien kōm̧ad ko an laļ in ilo ad kōm̧m̧an iaļ n̄an tōl, kōjebwebwe, im kaenōm̧m̧an, im im̧we iien otemjej an Jetōb Kwojarjar.¹³ Būreejtōnji eo Kein Kajuon, Doulul eo an ro Jon̄oulruo Rijilōk ro, Ritōl ro Routiej im Opija ro Routiej an Kabun̄ in, renaaj ikkūrtok n̄an kōj āinwōt baam̧le ko ak kajjojo armej, n̄an itok im kwojkwoj ioon naan ko an Kraist.¹⁴ Kōnono, m̧ōņōņō im kwaļo̧k kōn Kraist,¹⁵ enaaj jipan̄ kōj en̄jake lan̄lōn̄ eo eļap otem ļap¹⁶ me ej itok jān im kōn E. Bwe E ej unin lalōn̄ otemjeļo̧k.¹⁷