Ijo in Ke Ikōņaan Pād Ie?

Ke ikar 17 aō iiō, jet uwaan baam̧le eo aō im n̄a kar aikuj ettōr jān Oakland, California n̄an Portland, n̄an kappukot im lo̧mo̧o̧ren juon wa em̧ōj ko̧o̧te . . . im juon naaj nejū nin̄nin̄ ekar jako.

Tūreep in ekar kaamijak im kaenepatata, ak kōm kar ļap am kōjatdikdik im ļap am jar. Kōn elōn̄ tūriam̧o ko jān juon Jemedwōj Ilan̄ eo eļap iakwe ippān, kōm kar maron̄ lo̧mo̧o̧re jim̧or minivan wa eo im nin̄nin̄ leddik eo nej nejū, eo, kōn juon kabwilōn̄lōn̄, ekar ejjeļo̧k menin jorrāān n̄ane.

Minivan wa eo ekar jerbal wōt, bōtaab ekar ļap an jorrāān. Ikar lukkuun kijooror n̄an karreoiki, kōpooje n̄an bar kattōre, ak ļōmņak ko kōn ro rekar ko̧kkure wa eo waam—im kain mour eo epok rej mour—kar boktok eō n̄an dānin kōm̧jaļaļ in matōrtōr. Ekar pen n̄an aō meļeļe wāween an jabdewōt armej kōm̧m̧ane men ko rōbwebwe ilo mour ko aer im kōn m̧weiūk ko an armej. Ekar kabūrom̧ōj eō.

Ikar kijooror in bar ro̧o̧l n̄an California. Ikar jeļā bwe ej bojen juon iien ettōr aitok.

Ilo iien eo kōm kar pojak n̄an iien ettōr eo, ekar bon̄ . . . im marok. Ilo am kar jepļaak n̄an ioon iaļ eo, kōlmenļo̧kijeņ eo aō ekar obrak kōn ļōmņak ko kōn tūreep eo am. Ikar ļōmņak kōn aolepān jekjek ko Jemedwōj Ilan̄ ekar jipan̄ kōm. Ikar ļōmņak kōn aolep akweļap ko am Ippān ioon iaļ eo n̄an Portland im aolep en̄jake in kam̧m̧oolol ko kōn iaļ eo am bar tok.

Ke ikar kejōkļo̧kjeņ kōn men kein, ikar lo juon meram eromaakļo̧k, jutak aitok ilōn̄ in marok eo an wōjke ko, ettoļo̧kļo̧k jidik jān freeway eo ikar pād ioon. Būruō ekar jino obrak kōn m̧ōņōņō ke ikar ļōmņak kōn ta eo meram in emaron̄ in kar. Ālkin jejjo minit ko, ke kōm kar epaakļo̧k jidik, imaron̄ kar lo bwe ekar ejjeļo̧k wāween emaron̄ in kar bar juon men ak Portland Oregon Tampeļ!

Ikar kanooj in lo̧udin̄din̄ jon̄an ikar jiron̄ baam̧le eo aō kōmin kar diwōj jān freeway eo—n̄an pukōt tampeļ eo. Ikar aikuj in loe! Jetōb eo aō ekar jan̄uwade bwe in pād ilo meļan ko an tampeļ ko, n̄an bōk aiboojoj eo an im n̄an kwaļo̧k en̄jake jab eo ippān baam̧le eo aō.

Ke ikar ilo̧k ilo iaļ eo aō ilo wōjke ko, ikar maron̄ lo meram eo āinwōt n̄e ekar jem̧ļo̧k in juon tanōļ aitoktok an marok. Būruō ekar peļļo̧k kōn lan̄lōn̄ im kōtmene.

Epaakeļo̧k tampeļ eo, kōm kar kile jem̧ļo̧k in iaļ eo im̧aan in wōt oror ko an tampeļ eo, ijo elōn̄ wa ko rekar baak. Kōn itok limo, ikar reitok reitak n̄an pukōt juon iaļ n̄an ettōrļo̧k ie, n̄an meļaaj ko an tampeļ eo.

Ilo jidimkij, ikar en̄jake an menono eo aō bōjrak ke ikar kile oror ko an tampeļ eo rekar jab kilōk wōt . . . raar ļak.

Ekar m̧ōkaj aō pukōt juon jikin n̄an baak ibwilijin wa ko jet, im ilo minit ko tok, ikar jutak ilo oror aaen ko—jibwi im jan̄—ke ikar kabūrōrō kōn aiboojoj eo an m̧weo ekabwilōn̄lōn̄ im ekwojarjar.

Ļōmņak eo kōn aō ļak inam̧ōj in oror ko an Lan̄ ekar jino an lukkuun juon men em̧ool n̄an eō ilo iien eo.

Kajjitōk ko raar kobrak ļōmņak eo aō ke ikar jutak ijo bon̄ōn eo:

• Ej ke ijo in ikōņaan pād ie n̄e ij etal n̄an lan̄?

• Ij ke kōņaan bwe in ļak n̄ai inam̧ōj?

• Jan̄ kōnke ijjab maron̄ deļo̧n̄?

• Enaaj ke wōr juon eo ej lo aō jan̄ im enana an mour n̄an kadeļo̧k eō?

• Ta eo inaaj kōm̧m̧ane n̄an kanooj lale bwe menin ejjamin naaj waļo̧k n̄an n̄a ilo oror eo ilo lan̄?

Iļakkar jan̄ m̧ae iien eo kōm kar aikuj in bar etal n̄an iaļ eo, innām ikar bar jan̄ jidik.

Jekjek eo an bon̄ōn eo ekar kanooj in kajoor. Ke ikar ettōrļo̧k wōt, ikar kejōkļo̧kjeņ im bar kejōkļo̧kjeņ kōn lōn̄ in en̄jake ko ikar en̄jaki bon̄ōn jab eo. Ekar kōkajoorļo̧k ikdeelel eo aō n̄an kōm̧m̧an em̧m̧anļo̧k—n̄an erom em̧m̧anļo̧k—n̄an leļo̧k būruō n̄an E im buuļ jerbal n̄an ļoor waanjon̄ak eo an aō Rilo̧mo̧o̧r, Jisōs Kraist.

Ikar jino al ilo aō kattōr. Ke ikar al, būruō ekar jino obrak kōn aenōm̧m̧an im kaenōm̧m̧an. Ikar jeļā bwe en̄jake eo aō enaaj kar letok n̄an eō juon al kāāl . . . juon al ikar kadedeļo̧k ilo iien kattōr jab eo. Juon al me enaaj kar ļōn̄aj im im̧we. Juon al kōn juon tampeļ. Al in tampeļ eo aō.

En̄in ej al eo: