Fa’aro’o i tōna reo nā ni’a a’e i te māniania

I te mau matahiti ato’a, e fa’aitoito noa tātou i te tai’o i te Buka a Moromona mai te ’api mātāmua i te ’api hope’a. Maoti te tai’o-fa’ahou-ra’a, e rave rahi taime, i te ’ōmuara’a, ’ua ti’a ia tātou ’ia ha’api’i rahi mai ā nō ni’a ia Nephi ’e tōna ’utuāfare. Nā mua a’e i te Nephi pene va’u, e ’ite mai tātou i te raura’a o te huru o te mau melo tāta’itahi o te ’utuāfare. E metua tāne ’e te hō’ē metua vahine parauti’a tei parauhia mai ē e mau metua maita’i,¹ ’e tā rāua mau tamari’i, e fa’aruru nei i te mau ’ohipa fifi, i roto ā i tō rātou ’āpīra’a. Tē ’ite nei tātou ē, e mea ta’a ’ē te mau mā’itira’a a te mau tamari’i, noa atu ē tē fa’aruru nei rātou i te hō’ē ā ’ohipa.

’Ua hau atu teie fa’ati’ara’a i te hō’ē noa ’ā’amu ’aore rā i te hō’ē noa parau i roto i te hō’ē buka ’ā’amu tei pāpa’ihia e te hō’ē tamaiti nō ni’a i tōna nā metua ’e tōna mau taea’e ’e mau tuahine. E peropheta ’o Lehi, ’e i muri iho ’o Nephi. E rahi atu ā tō tātou ’ite ’e te māramarama i te mau ’ohipa i tupu i roto i te mau pāpa’ira’a mo’a ’ia fāri’i ana’e tātou i te ’itera’a a te Vārua Maita’i ’o tē fa’a’ite pāpū nei i te parau mau nō te reira ’e te huru o tō te reira fa’aho’i-fa’ahou-ra’a-hia mai i tō tātou nei ’anotau. ’Ua hau atu te reira i te hō’ē ’ā’amu ’e te mau ta’ata i ferurihia. E nehenehe tātou e putapū ’e e fa’aro’o i te reo o te Atua nā roto i te mau parau a teie mau peropheta tahito.

Te fa’aro’o o Nephi nō te haere e rave i te mau ’ohipa tā te Fatu i fa’aue,² ’ua ha’apūai ïa ia tātou ’ia fa’ananea i tō tātou ti’aturi ’e tō tātou fa’aro’o i te Fatu ia Iesu Mesia. I roto i te moemoeā o Lehi, ’ua ’ite Lehi iāna iho i mua i te tumu rā’au nō te ora. Te hotu o te tumu rā’au, ’ua fa’aau-ato’a-hia ïa i te here o te Atua.³ I muri a’e i te ’amura’a i te hotu, ’ua fa’ata’a Lehi i te reira mai te ’īra’a tōna vairua i te ’oa’oa rahi ’e ’ua ’ite ’oia e hotu hina’aro-roa-hia a’e.⁴ I te tahi taime, e riro tō tātou orara’a i te mea pāpū ’ore ’aore rā i te mea au ’ore. ’Aua’a te ’evanelia a Iesu Mesia tei fa’aho’i-fa’ahou-hia mai, e roa’a te tīa’ira’a. ’Ua parau Elder David A. Bednar ē : « Te ’amura’a i te hotu nō te rā’au e fa’ahōho’ara’a ïa i te fāri’ira’a i te mau ’ōro’a ’e te mau fafaura’a e nehenehe ai te Tāra’ehara e ’ohipa hope roa i roto i tō tātou mau orara’a. ’Ua fa’a’itehia te hotu ’ei ‘mea hina’arohia… nō te fa’a’oa’oa i te ta’ata’ ’o tē fa’atupu i te ’oa’oa rahi ’e te hina’aro ’ia ’ōpere i taua ’oa’oa ra ia vetahi ’ē ».⁵

’Ua ’ī te moemoeā i te mau taipe ’o tē tauturu ia tātou ’ia fa’aau i te ’ā’amu i tō tātou orara’a. E tauturuhia te feiā ato’a e rātere nā ni’a i te ’ē’a ’e te ’āuri tāpe’ara’a, ’o tei fa’aauhia i te parau a te Atua⁶. ’Aita te pārurura’a e ’itehia nā roto i te vai-noa-ra’a i pīha’i iho i te ’āuri tāpe’ara’a, nā te tāpe’a-pāpū-ra’a rā i te reira e hōro’a mai i te turu pūai ’e te ’āueue ’ore mau. E fa’ahōho’ara’a te ’utuāfare o Lehi nō te mau tamari’i ato’a a te Atua e rātere nei nā roto i teie tere o te tāhuti nei. Noa atu e mea ’āpī ’aore rā e mea pa’ari tātou, ’ua fa’aipoipohia ’aore rā e ta’ata ta’a noa, nā te tāpe’a-pāpū-noa-ra’a i te parau a te Atua e hōro’a mai i te pārurura’a ’e te ha’apāpūra’a ē, e maita’i te mau mea ato’a noa atu e purūmu fifi i mua ia tātou.

’Ua pāpū iā’u ē ’ua ’ite maita’i tātou i te ’ā’amu o te moemoeā o Lehi. ’A tuatāpapa ai tātou i te mau pāpa’ira’a mo’a ma te pure, e nehenehe te Vārua Maita’i e hōro’a mai i te hāro’aro’ara’a i tō tātou māramarama. I muri a’e i te fāri’ira’a i te here o te Atua, te pāhonora’a ’oi’oi a Lehi ’o te ’imira’a ïa i tōna ’utuāfare ’e te anira’a ia rātou ’ia fāna’o ato’a ho’i i tāna e ’oa’oa nei.⁷ ’Ei ’ohipa mātāmua roa nō tātou te maita’i o tō tātou ’utuāfare mure ’ore. Ma te ’ite ’ore nā te hea vāhi e haere, ’ua tuō atu Lehi ia rātou ma te reo pūai nō te arata’i ia rātou.⁸ Te tanora’a mau, ’aita te tuōra’a e tū’ati i te reo o te hō’ē metua tāne ’aore rā i tō te peropheta ato’a ho’i. Tītauhia rā ’ia fa’aro’ohia te reo o Lehi nā ni’a a’e i tō te fare rahi ’e te ’ā’ano ra reo, ’o tē tuō ra i te mau poro’i hape nō te fa’ahemara’a. ’A pe’e ai tātou i te arata’ira’a a tō tātou mau peropheta o te mau mahana hope’a nei, e riro mai tō tātou mau nohora’a ’ei pū nō te ha’api’ira’a ’evanelia ’e e iti mai te ’ume’umera’a a te ’enemi.⁹

I teie mahana, tei te peresideni Russell M. Nelson taua reo ha’amanahia ra. Mai ia Lehi, tē a’o nei ’oia ia tātou ma te aroha o te hō’ē metua here¹⁰ ’ia fa’aro’o i te reo o te Fatu.¹¹ ’Ua parau te peresideni Nelson : « E tauturu te ha’api’ira’a tumu a te Mesia ia tātou ’ia ’ite ’e ’ia vai noa i ni’a i te ’ē’a o te fafaura’a. ’Ia fa’aea noa ana’e tātou i ni’a i te reira ’ē’a piriha’o ’e te pāpū o te fafaura’a, e fa’ati’a te reira ia tātou ’ia fāri’i i te mau mea ato’a a te Atua. ’Aore e mea faufa’a atu i te mau mea ato’a a tō tātou Metua ! »¹²

’A fa’aineine ai tātou nō te ’āmuira’a rahi i te ’āva’e i muri nei, e paraparau pūai mai ’e e paraparau pāpū mai te reo o te mau peropheta. ’Aita tō rātou reo e fāitohia i te pūai o tō rātou reo, nō reira, e mea ti’a ïa ia tātou e tāpe’a i te mau fa’anevanevara’a a tō te ao nei ’ia tae mai te arata’ira’a, te fa’aterera’a, te tāmahanahanara’a ’e te fa’aurura’a tāmau a te Vārua Maita’i.¹³ E pi’i mai te Peresidenira’a Mātāmua, te pupu nō te Tino ’Ahuru Ma Piti ’āpōsetolo, te huimana fa’atere rahi ’e te mau ti’a fa’atere rahi ia tātou te ’utuāfare ’e te ta’ata hō’ē, ’ia haere mai e rave i te fa’a’amu’a i te mau parau a te Mesia.¹⁴ E tauturu te paraparaura’a, te ’oa’oara’a ’e te porora’a i te Mesia,¹⁵ ia tātou ’ia fa’atupu i teie ’oa’oa rahi mau¹⁶ e tae mai nā roto iāna ’e nōna ho’i. Nō te mea ’o ’oia te tumu nō te ’oa’oa ato’a.¹⁷