I teie ānei vāhi tā’u e hina’aro e ti’a ?

I te 17ra’a o tō’u matahiti, ’ua tere mātou vetahi o tō’u mau fēti’i mai Oakland (California) i Portland (Oregon) nō te mā’imi ’e nō te fa’aho’i mai i te hō’ē pere’o’o tei eiāhia […] ’e hō’ē tamāhine iramutu [niece] iti tei mo’e.

E tere ri’ari’a mau ’e te pe’ape’a, ’ua ’ī rā mātou i te ti’aturi ’e i te pure. Nā roto e rave rahi hāmani maita’i a te hō’ē Metua i te ao ra here, ’ua nehenehe ia mātou ’ia fa’aho’i mai i terā pere’o’o ’e tā’u iramutu iti, ’e ma te temeio, e mea maita’i ’oia.

Tē tere ra te pere’o’o, e mea repo maita’i rā. E hina’aro rahi tō’u e tāmā maita’i i te reira, nō te fa’aineine nō tō mātou ho’ira’a, ’ua tae mai rā te mana’o nō te feiā i rave ’ino i tō mātou pere’o’o—’e te huru orara’a huehue tā rātou e ora nei—’e ’ua tupu te ’ino’ino ’e te roimata. E mea fifi roa nō’u ’ia hāro’aro’a e nāhea pa’i te hō’ē ta’ata e nehenehe ai e rave i teie mau ’ohipa ma’ama’a i tōna orara’a ’e i te mau tauiha’a a vetahi ’ē. ’Ua fa’a’oto te reira iā’u.

E hia’ai rahi tō’u e ho’i i California. I ’ite au ē, e tere roa teie tā mātou.

I te ineinera’a mātou nō te tere, ’ua pō roa… ’ua pōiri. ’A tere ai mātou nā ni’a i te purūmu, ’ua ’ī tō’u vārua i te mau mana’o nō ni’a i tō mātou tere ē tae roa mai i teie taime. ’Ua feruri au i te mau rāve’a ato’a tā tō tātou Metua i te ao ra i tauturu ia mātou. ’Ua feruri au i tā mātou mau tāparura’a iāna i ni’a i te purūmu nō Portland ’e i te mau parau ha’amāuruuru nō tō mātou tere ho’ira’a.

’A feruri ai au i teie mau ’ohipa, ’ua ’ite au i te hō’ē māramarama ’ana’ana, e ti’a ra i ni’a i te pōuri o te mau tumu rā’au, i te hō’ē vāhi ātea ri’i i te purūmu rahi tei reira vau. ’Ua ha’amata tō’u ’ā’au i te ’ōtu’itu’i i te ferurira’a vau e aha ho’i teie māramarama. I muri a’e te tahi tau minuti, ’a fātata ri’i atu ai mātou, ’ua ’ite atu ra vau ’e e’ita e nehenehe e hape, ’o te hiero nō Portland (Oregon, Marite) !

Nō tō’u ’oa’oa rahi ’ua parau vau i tō’u ’utuāfare e fa’aru’e mātou i te purūmu rahi—nō te ’imi mai i teie hiero. E mea ti’a roa ’ia hi’o tō’u mata i te reira ! ’Ua hina’aro tō’u vārua ’ia tae i ni’a i te fenua o te hiero, ’ia hi’o māite i tō te reira nehenehe ’e ’ia ’ite ato’a tō’u ’utuāfare.

’A ’imi ai au i te ’ē’a nā roto i te mau tumu rā’au, e nehenehe iā’u e ’ite i te māramarama mai te mea ra ē tei te hōpe’a o te hō’ē arapao roa ’e te pōiri. ’Ua pe’e tō’u ’ā’au ma te ’oa’oa ’e te tīa’ira’a.

’A fātata ai mātou i te hiero, ’ua ’ite atu mātou i te hō’ē purūmu mute i mua noa mai i te mau ’ōpani o te ’āua hiero, tē vai ra te mau pere’o’o tei tāpe’a ha’amenemene i reira. Ma te ’oa’oa, ’ua ’imi au i te rāve’a nō te tomo i roto i te ’āua o te hiero.

I reira noa, ’ua ’oto tō’u ’ā’au i te ’itera’a ē ’aita te mau ’ūputa o te ’āua hiero i ’ōpani-noa-hia… ’ua pōnaohia rā.

’Ua ’ite-’oi’oi-hia mai ’iā’u te hō’ē vāhi tāpe’ara’a i rotopū i te tahi mau pere’o’o, ’e i te minuti i muri iho, tei mua vau i te ’āua ’āuri—e tāpe’a ra i te reira ma te ta’i—’a hi’o noa ai au i te nehenehe o teie fare rahi ’e te mo’a.

Te mana’o pōnaora’a i rāpae mai i te mau ’ūputa o te ra’i, ’ua riro ïa ’ei vaira’a pāpū mau nō’u i te reira taime.

’Ua mani’i mai te mau uira’a i roto i tō’u ferurira’a ’a ti’a noa ai au i reira i taua pō ra :

• I te reira ānei vāhi tā’u e hina’aro e ti’a ’ia haere au i te ra’i ?

• ’Ua hina’aro ānei au ’ia pōnaohia vau i rāpae ?

• Ma te ta’i nō te mea ’aita vau e nehenehe e tomo i roto ?

• E ’ite mai ānei te tahi ta’ata iā’u i te ta’ira’a, ’e e putapū ’oia ’e e vaiiho mai iā’u ’ia tomo atu ?

• E aha tē rave nō te ha’apāpū ē ’eita te reira e tupu i ni’a iā’u i te ’ūputa o te ra’i ?

’Ua ta’i noa vau ē tae roa i ni’a i te purūmu, ’e i muri iho ’ua ta’i fa’ahou ā.

E ’ohipa pūai mau tei tupu i te reira pō. ’A tāmau noa ai au i te fa’ahoro i te pere’o’o, ’ua feruri au, fa’ahou ’e fa’ahou ā, i te mani’ira’a mana’o o te ’ā’au i taua pō ra. ’Ua ha’apūai te reira i tō’u hina’aro ’ia rave maita’i a’e—’ia ha’amaita’i a’e iā’u—’ia hōro’a iāna i tō’u ’ā’au ’e ’ia ha’a itoito nō te pe’e i te hi’ora’a maita’i o tō’u Fa’aora ’o Iesu Mesia.

’Ua ha’amata vau i te hīmene ’a fa’ahoro noa ai. ’A hīmene noa ai au, ’ua ha’amata tō’u ’ā’au i te ’ī i te hau ’e i te tāmāhanahana. I ’ite au ē e hīmene ’āpī tā’u i teie ’ohipa i tupu… e hīmene tā’u i fa’aoti i te roara’a o teie tere. E hīmene ’o tē fa’ateitei ’e ’o te fa’auru. E hīmene nō ni’a i te hiero. Tā’u hīmene nō te hiero.

Teie taua hīmene ra :