Haere nā muri i te Atua i ni’a i te ’ē’a nō te fafaura’a

I te ’ōmuara’a o te matahiti, ’ua fa’ahiahia vau i tā tātou mau tuatāpapara’a nō te Mai, pe’e mai tei fa’atumu i tō tātou ferurira’a i ni’a i te parau ra ‘Haere nā muri i te Atua’.

I roto i tō tātou orara’a rū, e nehenehe tātou e ta’a i te mana’o o Enoha i te taime ’a pi’i mai ai te Fatu iāna ’ia parau i tāna mau tamari’i ’ia tātarahapa¹. ’Ua parau atu ra Enoha, « Nō te aha ho’i i ’ite-au-hia mai ai au i mua ia ’oe na, ’e e tamaiti ’āpī ho’i au, ’e ’ua au ’ore mai ho’i te mau ta’ata iā’u ; e ta’ata reo maumau vau ; ’e nō te aha e riro ai au ’ei tāvini nō ’oe ? »²

Mai te mea ē, ’ua tupu te reira mana’o i roto ia tātou, tei rotopū ïa tātou i te mau hoa maita’i. ’Aua’a a’e rā, ’eiaha tātou e ha’aparuparu te mana’o nō te mea, mai teie tā te Fatu pāhonora’a atu i te uira’a a Enoha :

« ’A haere atu ’e ’a rave i tā’u i fa’aue ia ’oe, ’e ’aita te hō’ē ta’ata e pātia noa atu ia ’oe. ’A hāmama i tō vaha, ’e e fa’a’īhia ïa, ’e nā’u e hōro’a atu i te parau i tō vaha na, tei tō’u nei rima ho’i te mau ta’ata ora ato’a, ’e e rave au i tei au iā’u nei. […]

« ’e ’ei roto ’oe iā’u nei pārahi ai, ’e ’ei roto vau ia ’oe ; nō reira, ’a haere mai nā muri iā’u ».³

I roto i te arata’i nō te mau tumu parau o te mau buka pāpa’ira’a mo’a, e ’itehia ia tātou hau atu i te 100 fa’ahorora’a nō te parau ra, Haere nā muri i te Atua. ’Ua haere Adamu nā muri i te Atua i roto i te ’ō i Edene⁴ ; ’Ua haere Enoha nā muri i te Atua⁵ ; ’Ua haere ’o Noa nā muri i te Atua⁶ ; ’Ua haere Aberahama ’e Isa’aka nā muri i te Atua⁷.

Tē vai noa ra i teie mahana te anira’a ’ia haere nā muri i te Atua, ’oia mau, « ’ua anihia rātou ato’a e ana ’ia haere mai iāna ra, ’e ’ia rave i tōna ra maita’i »,⁸ ’oia ho’i, e haere nā muri iāna.

Nō te haere nā muri i tō tātou Metua i te ao ra ’e tāna Tamaiti ’o Iesu Mesia, tītauhia ia tātou nā mua roa ’ia ’ite ē, ’o vai rāua. E ’ite tātou ia rāua ’ia tāvini ana’e tātou ia rāua⁹ ’e ’ia ha’apa’o ana’e i tā rāua mau fa’auera’a.

E haere tātou nā muri i te Atua ’ia here ana’e tātou i te Atua ’e i tō tātou ta’ata tupu¹⁰ ’e ’ia aupuru ma te ‘teitei a’e ’e te mo’a a’e’. E haere tātou nā muri i te Atua ’ia vai ana’e tōna hōho’a i roto i tō tātou hōho’a mata ’e ’ia tupu ana’e te tauira’a rahi o te ’ā’au.¹¹ Tē haere ra tātou nā muri i te Atua ’ia ti’a ana’e tātou ’ei ’ite nōna, ’ia fa’ati’a i ni’a i te tahi ’e te tahi, ’ia ’atu’atu ana’e i te feiā nava’i ’ore, ’e ’ia hi’o ana’e ē, ’aita e ta’ata veve i rotopū ia tātou.¹²

I te mau matahiti i ma’iri a’e nei, ’ua fa’ata’a maita’i te peresideni Russell M. Nelson mai te aha te huru ‘te haerera’a nā muri i te Atua’ ’a parau ai ’oia :

« I teienei, i te melo tāta’itahi o te ’Ēkālesia tē parau nei au, e tāmau noa i ni’a i te ’ē’a nō te fafaura’a. Tō ’outou pūpūra’a ia ’outou ’ia pe’e i te Fa’aora nā roto i te ravera’a i te mau fafaura’a i mua iāna ’e te ha’apa’ora’a i te reira mau fafaura’a, nā te reira e ’īriti i te ’ōpani nō te mau ha’amaita’ira’a pae vārua ato’a ’e te faufa’a e vai ra nō te mau tāne, te mau vahine ’e te mau tamari’i i te mau vāhi ato’a.

« ’Ei peresidenira’a ’āpī, ’ua hina’aro mātou e ha’amata ma te hope’a i roto i te feurira’a. Nō reira mātou e paraparau atu ai ia ’outou mai roto atu i te hō’ē hiero. Te hope’a tā tātou tāta’itahi e tūtava nei, ’o te fāri’ira’a ïa i te mana i roto i te hō’ē fare o te Fatu, ma te tā’atihia ’ei ’utuāfare, ma te ha’apa’o maita’i i te mau fafaura’a i ravehia i roto i te hiero ’o tē fa’aineine ia tātou nō te hōro’a rahi roa a’e a te Atua—’oia te ora mure ’ore. E mea faufa’a roa ’ino te mau ’ōro’a o te hiero ’e te mau fafaura’a tā ’outou e rave i reira nō te ha’apūai i tō ’outou orara’a, tō ’outou fa’aipoipora’a ’e te ’utuāfare ’e te ’aravihi ’ia pāto’i i te ’arora’a a te ’enemi. E riro tā ’outou ha’amorira’a i roto i te hiero ’e tā ’outou tāvinira’a i reira nō tō ’outou hui tupuna i te ha’amaita’i ia ’outou ma te heheura’a rahi a’e nō ’outou iho ’e ma te hau ’e e ha’apūai te reira i tā ’outou pūpūra’a ia ’outou nō te fa’aea i ni’a i te ’ē’a nō te fafaura’a.

« I teienei, mai te peu ’ua haere ’outou i rāpae i te ’ē’a, tē ani nei au ma te pūai ato’a o tō’u ’ā’au ’ia ho’i mai. Ta’a ’ē noa atu te māna’ona’ora’a ’e te fifi, tē vai nei te pārahira’a nō ’outou i roto i teie ’Ēkālesia, te ’Ēkālesia a te Fatu. Nā tā ’outou mau ’ohipa i teie taime, e ha’amaita’i ia ’outou ’e te mau u’i i muri mai, nō te ho’i i ni’a i te ’ē’a nō te fafaura’a. E mea poihere tō tātou Metua i te Ra’i i tāna mau tamari’i, ’ua hina’aro ’oia ia rātou tāta’itahi ’ia ho’i iāna ra. ’O te hō’ē teie fā rahi a Te ’Ēkālesia a Iesu Mesia i te Feiā Mo’a i te mau Mahana Hope’a nei—te tauturura’a ia tātou tāta’itahi ’ia ho’i i te fare ».¹³

’Ei melo nō te ’Ēkālesia a Iesu Mesia i te Feiā Mo’a i te mau Mahana Hope’a nei, e ’imi tātou i te mau rāve’a ato’a nō te pe’e i te mau hi’ora’a o tō tātou mau peropheta fa’ahiahia nā roto i te haerera’a nā muri i te Atua i ni’a i te ’ē’a nō te fafaura’a ’ia ti’a i te Fatu, i te mau mahana i muri nei, ’ia pi’i ia tātou ’o Ziona ’e ’ia fāri’i mai ia tātou¹⁴.