Te taime ti’a o te mau huira

I te hope’a o te matahiti 2020, ’ua fifi roa vau ’ia fāri’i i te vārua noela, nō reira ’ua fa’aro’o vau i te buka a John Bytheway, Born This Happy Morning¹ (Fanauhia i teie po’ipo’i ’oa’oa) nō te ’imi i te mau mana’o. I roto i te hō’ē pene, te fa’a’ite ra ’oia i te hō’ē ’ohipa i tupu, ’a ho’o ai ’oia i te mau huira nō te hō’ē vahine a tahi ra ’oia ’a fareirei ai iāna.

Tē parau nei te taea’e Bytheway ē, ’ua ’ite ’oia ē, e ’ere paha ’oia i te tahi mau ha’amaita’ira’a nō te fa’a’itera’a mai ia tātou i tāna ’ohipa i rave, terā rā ’ua fa’aruru ’oia i te reira nō te fa’a’ite mai i te ’oa’oa rahi ’e te māuruuru tāna e fāri’i nei ā, ’ia ha’amana’o ana’e ’oia i tāua fifi iti ra. E fa’aha’amana’ora’a te reira ē, e rahi a’e te ha’amaita’ira’a ’ia hōro’a atu, i te rave mai.

Terā mau te ’oa’oa ’e te māuruuru tei mo’e ’ē i tō’u orara’a. I taua Noela ra, ’ua ti’aturi au ē, e tauturu taua mana’o ra iā’u ’ia fa’atumu rahi atu ā i ni’a i tō’u Fa’aora, nō reira, i te ’āva’e Tītema, ’ua ha’apae au i te mā’a ’ia riro vau ’ei mauha’a i roto i te rima o tō tātou Metua i te ao ra. ’Ua hina’aro vau e tauturu i te hō’ē ta’ata—ma te ’ā’au tae ’aore rā te mana’o-’ore-hia—’ia ’ite ho’i ’oia ē, e ’atu’atu ’oia ia rātou, ’e ’ia ’ite ato’a vau i te hau ’e te ’oa’oa o te reira tau. ’A tāmata ai au i te fa’ata’a i te Metua i te ao ra nō te aha vau i ha’apae ai i te mā’a, i te pae hope’a, fa’ahiti a’era vau i te mau parau : « ’Ua ’ite ’oe, mai ia John Bytheway, ’e te mau huira ».

I te mau mahana i muri iho ’ua ’imi itoito noa vau i te mau rāve’a nō te tāvini, ’e, i te hō’ē pō, tei pīha’i iho vau i te hō’ē tamāhine hoa rahi māua, fa’ahiti poto noa maira ’oia ē, tē hina’aro ra ’oia i te mau huira ’āpī !

’Ua hāmama a’era tō’u vaha ’e ’ua ’oru tō’u māfatu i tō’u fa’aro’ora’a i te Vārua i te parau-pāpū-ra’a mai iā’u : « Sarah, teie tā ’oe mau huira ’e te pāhonora’a i tā ’oe ha’apaera’a mā’a ».

’Ua fa’aho’i mai au i te paraparaura’a i ni’a i te mau huira, ’e ’ua ’ite a’era vau ē, noa atu ē, ’ua ’ite tō’u hoa ’e tāna tāne ē, ’ua tītauhia ’ia taui ’oi’oi i tō rāua mau huira, i te mau mahana i ma’iri iho nei, ’ua ’ite a’era rāua ē, e hina’aro rū tō rāua i te mau huira ’āpī.

’Ua parau atura vau iāna nō ni’a i tā’u ha’apaera’a mā’a ’e ’ua mana’o vau ē, teie te pāhonora’a a te Metua i te ao ra i tā’u mau pure. I reira, ’ua ani atura vau ē, e nehenehe ānei iā’u ’ia ’aufau i tā rāua mau huira.

’Ua fa’aea muhu ’ore noa tō’u hoa nō te tahi ma’a taime, ’e i muri iho, ’ua tu’au a’era i te upo’o. I muri a’e i te tahi atu ā mau taime putapū, ’ua fa’ata’a mai ra ’oia ē, e’ita tā rāua e nehenehe e ho’o mai i te mau huira i teie taime, terā rā ’ua ha’apa’o rāua i te mau muhumuhu tā rāua to’opiti i fāri’i ’e ’ua fa’anaho nō te mau huira ’āpī. Te parau mau, ’oia ho’i, i te mahana mau a ha’apae ai au nō te fāri’i i te hō’ē ’itera’a, ‘’ua ’ite ’outou, mai ia John Bytheway, ’e te mau huira’, tē ha’apae ato’a ra rāua nō te fāri’i i te hō’ē rāve’a nō te ’aufau i tā raua mau huira.

E nehenehe tā’u e fa’a’ite pāpū atu ia ’outou ē, ’aita vau e tīa’i ra i te pāhonora’a pāpū mai teie i tā’u ha’apaera’a mā’a ! Terā rā, e mea pāpū mau ’e te ta’a ’ē te pāhonora’a a te Fatu i tā tātou mau pure tāta’itahi.

’Āhiri teie temeio e hope i ’ō nei, e riro ïa ’ei taime au roa a’e ’ia « fa’aro’o iāna » i roto i tō’u orara’a. Terā rā, e piti noa mahana i muri mai i tō teie ’utuāfare nehenehe fāri’ira’a i te mau huira ’āpī, ’ua niuniu mai tō’u hoa. ’Aita i ti’a iā’u ’ia pāhono i tāna niuniu, e mea au ato’a ïa nā’u nō te mea, te aura’a ra, e vai noa ïa tāna poro’i i roto i tā’u niuniu, i te fa’ata’ara’a mai ē, i taua mahana ra, te fa’ahoro ra ’oia i te pere’o’o ’e tāna mau tamari’i i roto, e mea pūai te ua, tē tere ra hō’ē pere’o’o i mua atu iāna ’aita e mōrī fereni, ’e ’ua huti pa’ari ’oia i tōna fereni. ’Ua tāpe’a a’era rātou ma te hau, ’e ’ua ta’a ’oi’oi a’era ’oia ē, ’āhiri ē, e huira tahito noa ā tōna, pāpū roa ē, ’ua ū ïa ’oia i ni’a i te pere’o’o i mua atu iāna. ’Ua parau mai ’oia ē, e temeio teie, ’e ’ua ’ōpani i te poro’i niuniu ma te parau ē, « Nō reira, māuruuru ».

Nō te fa’ahiti fa’ahou i te parau a te tuahine Joy D. Jones, « E’ita roa atu vau e parau ē, maoti au i tae mai ai te here marū ’e te maita’i roa o te Atua, e parau rā vau ē, ’auē tō’u māuruuru i te fa’ati’ara’a ’oia ’ia riro vau ’ei tuha’a iti ha’iha’i nō tāna ha’uti piriapu ! »²

’Ua parau te taea’e Bytheway, « I teie mahana, te vai ra hō’ē ta’ata i ’ō, hō’ē ta’ata tāpiri mai, hō’ē hoa, hō’ē melo nō te pāroita, tē tāmata ra i te haere i mua ma te huira ’ino roa. E nehenehe tā rātou huira e pararī i te taime mana’o-ore-hia. E mau huira mana’o ’āehuehu paha tō rātou, e mau huira pae vārua ’aore rā pae tino, ’aore rā [mai tei ’ite-ato’a-hia e au] e nehenehe ē, e mau huira iho ā ».³

Nō te ’imi ’e nō te tauturu i te tahi ’e te tahi, e nehenehe tātou e ha’apa’o i te fa’aha’amana’ora’a a te peresideni Dallin H. Oaks ē, « Tō tātou rima, tōna ïa rima ’ia fa’aro’o ana’e tātou ’e ’ia ’ite ana’e tātou ē, tē tūra’ihia ra tātou ’ia tauturu i te hō’ē o tāna mau tamari’i. ’Ua parau mai ’oia ia tātou ē : « ’Ia fāri’i ana’e ’outou i te hō’ē mana’o, ’a rave, noa atu te huru mātaro ’ore o te reira, ’aore rā noa atu tō ’outou ta’a’ore ’ia pe’e i te reira. ’A rave i te reira. Tē vai ra hō’ē tumu nō te reira. E’ita paha ’outou e ’ite i te tumu nō te reira, terā rā e tae mai te mau ha’amaita’ira’a i ni’a iho ia ’outou ’e i ni’a iho ia vetahi ’ē mai te mea e fa’aro’o ’e e pe’e ’outou i te mau arata’ira’a ».⁴