“Kāālet n̄an Mour kōn Jetōb,” Liaona, Jept. 2022.
Kāālet n̄an Mour kōn Jetōb
Kōkm̧anm̧anļo̧k ad eddōkļo̧k ilo jetōb ilo iaļan gospel in ej āinwōt juon batōļ in baajkōļ—
Kōmeļeļe ko jān Dilleen Marsh
Jerbali oktak in im jeļā ta eo n̄an kōm̧m̧ane ilo iien kein reppen ej juon iaan kōjeraam̧m̧an ko rejenoļo̧k n̄an erom̧ juon membōr in Kabun̄ eo an Irooj etiljek. Menin letok eo an Jetōb Kwojarjar ej juon men em̧m̧an n̄an bōk tōl im im̧we ilo ad tiljek.
Mour, Aenōm̧m̧an, Tōl, im Kōjparok
Rijilōk Paul ekar ba, “A ļōmņak an jetōb mour im aenōm̧m̧an” (Rom 8:6; bar lale eoon 5).
Kālet n̄an mour kōn Jetōb ilo am̧ mour erreo kōn im̧we an Jetōb Kwojarjar enaaj lewaj n̄an eok tōl ilo kālet ko am̧ im kōjparok jān kauwōtata an kanniōk im jetōb. Kōn Jetōb Kwojarjar, kwomaron̄ bōk menin letok ko an Jetōb n̄an em̧m̧an eo am̧ im em̧m̧an eo an ro kwoj iakwe im jerbal n̄an er. An kōnono n̄an jetōb eo am̧ eļapļo̧k an alikkar jān jabdewōt kōnono komaron̄ būki ilo ļōmņak eo am̧.
Elmen am̧ maron̄ mour kōn juon mour eo kōn jetōb n̄an bōk eļapļo̧k tōl jān Jetōb Kwojarjar?
1. Pād wōt ippān Jemedwōj Ilan̄ im Rilo̧mo̧o̧r.
N̄e jej juon wōt ippān Jemedwōj Ilan̄, jej bōk jemjerā eo An ilo Jetōb. Ilo ad kōm̧m̧an bwe inem̧m̧an en me eo jinointata ilo mour ko ad, jej epaakelok E im Nejin, “Jisōs Kraist, eo Eaar jilkintok” (Katak im Bujen Ko 132:24).
2. Iakwe Anij.
Iakwe Jemedwōj Ilan̄ im kalōk juon jemdo̧o̧n Ippān ilo jar enaaj dāpij wōt E ilo kōļmenļo̧kjeņ im buruwōd.
Rijilōk Jon, ilo naan in kam̧ool eo an kōn iakwe eo an Anij n̄an kōj im kam̧ool eo an make kōn Jisōs Kraist, ekar kariab katak ko rebōd ke lo̧mo̧o̧r maron̄ bōke kōn jeraam̧m̧an ko ijelo̧kkin kōn tōmak ilo Jisōs Kraist. Jon ekar karuwaineneik ririit ro an n̄an en̄jake lan̄lōn̄ in juon wōt ippān Jemedwōj Ilan̄ im Nejin (lale 1 Jon 1:3). Ekar ba:
“Kom̧win jab yokwe laļ, ak men ko ilo laļ. Eļan̄n̄e jabdewōt armej ej yokwe men ko an laļ, yokwe an Jemed e jab ilo e. …
“Im laļ e jakoļo̧k im m̧ōm̧ ko an; a eo ej kōm̧anm̧an anilaan Anij ej pād wōt indeeo” (1 Jon 2:15, 17).
Ilo mour in jemaron̄ en̄jake iakwe eo an Anij kōn jemjerā in Jetōb eo An. N̄e jej kōm̧anm̧an ankilaan Jemedwōj Ilan̄ im kajjieon̄ pād wōt ilo iaļ in me ej tōlļo̧k kōj n̄an E, Jetōb Kwojarjar enaaj tōl kōj.1
3. Keememej ta eo Rilo̧mo̧o̧r ekar kōm̧m̧ane n̄an kōj.
Kallim̧ur eo jim̧or ilo jar in kwojkwoj eo ej “bwe ren [ro rej bōk m̧ōttan] maron̄ … bwe Jetōb eo An en maron̄ pād ippāer” (Katak im Bujen Ko 20:77, 79). Jej bōk kwokwoj eo aolep wiik kōnke jej kōņaan kōjparok im naajdik mour in jetōb eo ad.
Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar kwaļo̧k: “Ilo ad pād ettoļo̧k jān men ko an laļin, jej en̄jake ad epaakeļo̧k Jemedwōj Ilan̄ im maron̄ bōk eļapļo̧k tōl jān Jetōb eo An. Jej ņaetan karbab in ilo mour in jetōb.” Būreejtōn Oaks ekar ba: “Elmen ad ukōt men ko jej iooni lo mour ko ad rej barāinwōt jerbal n̄an kalikkar jon̄an kajoor in mour in jetōb eo ad. … Kōj ro ewōr juon ad naan in kam̧ool kōn gospel eo an Jisōs Kraist jej aikuj ukōt en̄jake ko ad ilo jeļāļo̧kjeņ eo ad kōn jibadbad eo an mour in, mijen eo an ad Rilo̧mo̧o̧r, im mejān kajjik eo an ajri ro nejin Anij.”2
4. Kile men ko an jetōb.
Ij kam̧ool bwe im̧we an jetōb ej juon kōjeraam̧m̧an kōn kijejeto ko ilo jerbal ko ad. Ilo ad kappukot n̄an ekkatak im ļoor im̧we ko an Jetōb, emaron̄ pidodoļo̧k ad lo men ko an Anij jān men ko an laļin.
Elder Quentin L. Cook jān Doulul eo an Jon̄oulruo Rijilōk ro ekar ba, “Āinwōt an jerbal in kijejeto eo emakijkij im kōm̧m̧an aolep iien en̄iin ej āinwōt an aikuj n̄an an maron̄ ekkōt ānbwin eo im kōļmenļo̧kjeņ eo, ebarāinwōt m̧ool n̄an men ko an jetōb.”3
Kōļapļo̧k Jetōb eo Am
Kam̧m̧oolol n̄an ritōl ro an Kabun̄ in, elōn̄ ippād menin jipan̄ ko n̄an kōj n̄an kōkajoorļo̧k jetōb eo ad. Ļōmņak kōn em̧m̧anļo̧k ko ilo Gospel Library app eo me ekōm̧m̧an bwe kajoor eo an jeje ko rekwojarjar im ekkatak kōn gospel eo en pidodo an pād ilo pojo ko ad aolep iien. Ļōmņak kōn oktak ko ippānļo̧k jerbal in karejar ilo an ļapļo̧k kōjerbal technology ilo ad tōparļo̧k ro jet. Ļōmņak kōn m̧weo, jipan̄ ko an Kabun̄ in n̄an ekkatak im Itok, Ļoor Eō bok in ekkatak eo, eo emaron̄ kōkm̧anm̧anļo̧k jetōb eo ad jekdo̧o̧n ia eo jej pād ie.
Jejjab aikuj kōttoļo̧k kōj jān aolepen menin jipan̄ kein repād! Jemaron̄ jerbal ippān doon, kālet aolep iien ko rem̧m̧an n̄an mour kōn jetōb, rōjan̄ mour im aenōm̧m̧an, im kōm̧m̧an bwe mour in jetōb en m̧ōttan mour ko ad. Paul ej ba n̄an kōj: “A leen Jetōb, yokwe, lan̄lōn̄, aenōm̧m̧an, meanwōd, jouj, em̧m̧an, [im] tiljek” [Galatia 5:22–23).
Kōm̧m̧an im Kōjparok Kōttōbar ko ilo Jetōb
Juon armej eo ej mour kōn jetōb ej kōkajoorļo̧k mour in jetōb eo an im, n̄e kōm̧m̧ani kōttōbar ko, ej kajjitōk, “Kōttōbar ko aō rej ke pedped ioon aikuj ko aō?”
Juon armej eo ej mour kōn jetōb ej kappukot n̄an jeļā kilen ļoor im̧we ko an jetōb im mour kaki im̧we ko. Kōn menin, kōm̧m̧ani kōttōbar ko n̄an eddōkļo̧k ilo jetōb eaorōk.
Annie, leddik eo jibum̧ 5 an iiō, ekar kōm̧m̧ane juon kōttōbar n̄an ekkatak baajkōļ. Ekar ekkatak im ekar m̧ōkaj an jeļā, kōn menin baam̧le eo an rekar bōk e n̄an juon iien an baam̧le eo bajkōļ.
Ke rej bajkōļ, jinen Annie ekar bwilōn̄ kōn an em̧m̧an an Annie bajkōļ lōn̄ļo̧k ilo to̧l eo im ilo būrij eo. Annie ekar kwaļo̧k an kar jeļā: “Ikar dāpdep wōt, m̧am̧a, im ļak kar patōļ.”
Jej aikuj kōm̧m̧ane ejja āinwōt. Patōļ wōt n̄an ad dāpiji bwe en jokon wōt juon. Men ko repidodo āinwōt, jar kajjojo raan, ekkatak jeje ko rekwojarjar, im ļoor naan in kanaan n̄an kōjparok jetōb eo ad ilo an eddōkļo̧k jekdo̧o̧n to̧l ko, nan̄inmej ko, im oktak in mour.
Būreejtōn Russell M. Nelson ekar ba: “N̄e ikdeleel eo am̧ eļap bwe Anij en anjo̧, n̄an m̧ōttan Israel, elōn̄ kālet ko remaron̄ pidodo. Elōn̄ men in kōnono ko rej jino allikarļo̧k! … Kwojeļā ta eo kwoj kōņaan n̄an kōtōbarļ. Kwojeļā kain rot armej eo kwoj kōņaan erom̧.”4
Ilo am̧ mije ta eo elukkuun aorōk, kwonaaj lo bwe jerbal in n̄an kōkajoorļo̧k jetōb eo am̧ im ijjino in mour in jetōb eo emaron̄ in pidodoļo̧k, mekarta ej bōk kijejeto im kijenmej. Kōn menin, dāpdep wōt im patōļ wōt!
Kōļapļo̧k Jetōb in Liaona eo Am̧
Elōn̄ men ko ilo laļin rej kajjieon̄ im̧we kōj jet ien im kōm̧m̧an bwe kwon maron̄ en̄jake aipādpād kōn iaļ eo kwoj aikuj etal ie ļo̧k. Keememej bwe jetōbin liaona eo am̧ ej jerbal n̄e kwoj kile ainikien Jetōb jān ainikien ko an laļin.
Jetōb Kwojarjar elur, ealikkar, im ekanōm̧m̧an. Ej letok tōl eo ekkar n̄an bōktok aenōm̧m̧an im kōjatdikdik. Em̧m̧an an jerbal ilo bōro kuk ewāppen ippān Jemedwōj Ilan̄ im Jisōs Kraist, kakūrm̧ool jet iaan jerbal ko n̄an jipan̄ eok mour jim̧we n̄an bōk kōjeraam̧m̧an ko an gospel in.
Būreejtōn Nelson ekar ba: “Jipan̄ eo eļap kōn kajoor an jetōb ej Anij Jemed.” “Ribōktok enaan eo an kajoor in ej Jetōb Kwojarjar. Kajoor in eoktak jān kajoor in jarom̧. Kein jerbal jarom ko rej kōjerbal kajoor. Ilo an jerbal kajoor in jetōb eo An ej kōkajoorļo̧k kajoor eo ad. Ilo an kajoor in jarom maron̄ jerbal n̄an wōt jidik iien, jetōbin kajoor emaron̄ jerbal iien im indeeo!”5
N̄an erom̧ eo ej mour kōn jetōb, dāpdep wōt, batōļ wōt, im kōm̧m̧ani kōttōbar ko an jetōb. Kōjerbal elōn̄ menin jipan̄ ko repād n̄an am̧ kōkajoorļo̧k jetōb eo am̧.
Ij kam̧ool bwe n̄an mour kōn jetōb aet em̧ool ej mour im aenōm̧m̧an (lale 2 Nipai 9:39), en̄in em̧m̧anļo̧k eo ad ilo mour n̄e jej juon wōt ippān Jemen im Nejin, im bwe Anij ej iakwe kōj im ej ļōmņak kōn kōj im aikuj ko ad.
Jān juon kōnono ilo devotional, “To Be Spiritually Minded Is Life and Peace,” kar kwaļo̧k ilo Brigham Young University ilo Pāpode 9, 2021. N̄an likio in kōnono eo, etal n̄an speeches.byu.edu.