“Baj Kajjieon̄ Wōt,” Liaona, Jept. 2022.
Ainikien Armej ro Rekwojarjar ilo Raan Ko Āliktata
Baj Kajjieon̄ Wōt
Ikar boub in kōm̧m̧ani men ko rem̧m̧an, ak jemdo̧o̧n eo aō ippān Irooj enana kōnke ikar kowaane men eo eļap an aorōk.
Ke ekar m̧ōj aō mijen ilo Jānode 2019 eo, ikar ļōmņak inaaj kar ekkatak wōt jen jeje ko aō rekwojarjar. Ilo jinoin, ekar m̧ool. Ālkin jerbal, ij ro̧o̧ltok n̄an m̧weeo im riiti jeje ko aō rekwojarjar āinwōt imminene. Ikar m̧ōņōņō in wujlepļo̧k wōt aō n̄an riiti jeje ko rekwojarjar im ekkatak kōn Rilo̧mo̧o̧r.
Ilo Juun 2019 ekar oktak, ke ļaddik eo jera ekar ro̧o̧ltok jān mijen eo an. Kom̧ro kar jino bwebwenato im kar iakwe doon jiljino wiik tokālik.
Kōn boub ko n̄an karōk iien m̧are, jerbal, etal n̄an college, im joļo̧k iien ippān jiron̄ eo ij pojen m̧areiki, ekkatak jeje ko aō rekwojarjar rekar dikļo̧k ilo wiik ko. Kōnke ikar mad ilo men ko rem̧m̧an, ikar kowaan jemdo̧o̧n eo aō ippān Irooj.
Kom̧ro ļeo ippa kar m̧are ilo Nobōm̧ba 2019. Ālkin raan in kakkije ko, ikar kajjieon̄ in bar jinoe jān ijo ikar bōjrak ie ilo jeje ko rekwojarjar. Ilowaan jejjo̧ allōn̄, kom̧ro ļeo ippa kar pepe n̄an ekkatak jeje ko rekwojarjar ippān doon. Kajjojo jibbon̄ ilowaan jejjo̧ minit kom̧ro ej riiti jeje ko rekwojarjar im kōnono kōn katak eo ilo Itok, Ļoor Eō m̧okta jān am̧ro diwōj im etal im jerbal.
Innām ewaļo̧k nan̄inmej in COVID-19. Ilo an apan̄ jikejuuļ in jikuuļ im jerbal, ekar bōjrak am̧ro ekkatak in jibbon̄ jān jeje ko rekwojarjar. Jidik wōt am̧ro ekkatak, im jemdo̧o̧n eo am̧ro ippān Irooj ekar nana. Men̄e ālkin an jako kean̄ ko im kom̧ro kar jino etal n̄an jar, kom̧ro kar apan̄ wōt n̄an ekkatak.
Ro uwaan Kabun̄ in ewōr ien ko rej apan̄ n̄an riit emakijkij jān jeje ko rekwojarjar. Mour ko ad reboub, im jej ioon apan̄ ko kajjojo raan. Ak ejjab rum̧wij n̄an bar jinoe.
Būreejtōn Russell M. Nelson ekar ba, “Irooj ejjab kōtmāne wāppen jān kōj ilo wāween in ilo ad eddōkļo̧k n̄an indeeo.” Ak, ekar ba, “jen aolep kōm̧m̧an em̧m̧anļo̧k im maron̄ em̧m̧anļo̧k.”1
Kom̧ro kar ļeo ippa bar jino riiti jeje ko rekwojarjar. Kōmij jab riwānōk, ak kōmij kajjieon̄ kajjojo raan n̄an kōkajoorļo̧k naan in kam̧ool ko am̧. Ij kam̧m̧oolol kōn elōn̄ iien ko Irooj ej litok bwe jen ukweļo̧k, kōm̧m̧an emman, im em̧m̧anļo̧k.