“Uwaak eo an Bok in Mormon eo Aō,” Liaona, Jept. 2022.
Ainikien Armej ro Rekwojarjar ilo Raan Ko Āliktata
Uwaak eo an Bok in Mormon eo Aō
Ikar lukkuun kajjieon̄ n̄an “jipan̄” Mam̧a Wong, ak men eo ekar aikuji epidodo, naan eo an Anij ekajoor.
Mam̧a Wong im Annie
Pija en rijeje eo
Ālkin aō kar peptaij ilo Juun 2002, ikar kwaļo̧k tōmak eo aō n̄an jinō. Men̄e Mam̧a Wong ekkā an kobatok ippa n̄an jar, ekar jab kōņaan jeļā eļapļo̧k.
Ak, 10 iiō tokālik, Mam̧a Wong ekar kālet bwe en peptaij. Iaar m̧ōņōņō. Ekaburom̧ōjm̧ōj, jet iiō tokālik, ekar bōjrak an kōkajoorļo̧k naan in kam̧ool eo an im kar kōm̧m̧an jekpen ņae ko n̄an jab pād ilo m̧ōnjar.
Ikar kipel e bwe en itok n̄an m̧ōnjar, ak ekar kōm̧m̧an jum̧ae. Em̧ool, ekar bōjrak aō iuuni bwe en jab kakkure jemdo̧o̧n eo am̧ro.
Ilo Oktoba in 2019 Kweilo̧k eo Eļap, Būreejtōn Russell M. Nelson ekar kūr membōr ro an Kabun̄ in n̄an “āje [ad] make karōk” n̄an kōkajoorļo̧k naan in kam̧ool eo ad kōn Jepļaaktok in.1 Ke ij ļōmņak kōn kūr eo an, ikar lukkuun en̄jake ke ij aikuj kōm̧m̧ani men ko rem̧m̧anļo̧k ikōtaam̧ro Mam̧a Wong im n̄a.
N̄an kōttōbar eo aō ilo Iiō in Ekāāl, iaar kallim̧uri eō make n̄an riiti Bok in Mormon ippān Mam̧a Wong. N̄e ej ba emetak mejān, ij ba, “Kwomaron̄ ron̄jake wōt.” N̄e ej ba ej tin kwoļkwōļ kōnono, ij ļoor ļo̧k n̄an jikin kōmat eo im riit eļaaj.
Ekar etal im Mam̧a Wong ekar ron̄jake im keememej ta eo iaar riiti. Alkin jet iien, ekar kālet bwe en riit ippān make. Tokālik ekar ba n̄an eō ke juon em̧m̧aan eban kar je Bok in Mormon. Ekar jab pere ke bok in ej naan eo an Anij. N̄an eō, lo an kar jab itok limoin n̄an kōņaan riit im n̄an an kwaļo̧k naan in kam̧ool eo kōn Bok in Mormon ej juon kabwilōn̄lōn̄.
Ālkin an Mam̧a Wong kar peptaij, ikar inepata bwe ekar kobatok ilo Kabun̄ in kōn wōt n̄a. Ak kiiō ekar wōr an make naan in kam̧ool. Ikar lukkuun kajjieon̄ n̄an “jipan̄” Mam̧a Wong, ak men eo ekar aikuji epidodo, naan eo an Anij ekajoor.
Ij kam̧m̧oolol kōn juon rikanaan emour eo aolep iien ej letok n̄an kōj tōl. Eļan̄n̄e jenaaj mour kōn ta eo ej kwaļo̧ke, kōjeraam̧m̧an ko reļļap renaaj waļo̧k. En̄jake in ekar kwaļo̧k n̄an eō ewi jon̄an an Irooj kōņaan kōjeraam̧m̧an kōj. Men eo wōt ikar kōm̧m̧ane ej riiti jejjo̧ jebta ko n̄an jinō jān Bok in Mormon. Innām Irooj ekar bōk jikin!