Ang Walay Kataposan nga Pakigsaad

Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. Diha sa Hebreo nga pinulongan, kana nga masaaron nga gugma gitawag og hesed (חֶסֶד).³

Ang Hesed walay igo nga katugbang diha sa Iningles. Ang mga tighubad sa King James nga Bersiyon sa Biblia tingali nanglimbasog gayod kon unsaon sa paghubad sa hesed diha sa Iningles. Sila kanunayng mipili sa “gugmang walay paglubad.” Kini makakuha og dako nga kahulogan sa hesed apan dili tanan. Ang uban gihubad usab, sama sa “kaluoy” ug “kamaayo.” Ang Hesed usa ka lahi nga termino nga naghulagway og usa ka relasyon sa pakigsaad diin ang duha ka partido gibugkos nga magmaunongon ug magmatinud-anon sa usag usa.

Ang usa ka celestial nga kaminyoon mao ang usa ka relasyon sa pakigsaad. Ang usa ka bana ug asawa naghimo og usa ka pakigsaad sa Dios ug sa usag usa nga magmaunungon ug magmatinud-anon sa usag usa.

Ang Hesed mao ang usa ka espesyal nga matang sa gugma ug kaluoy nga gibati sa Dios alang ug gipadangat ngadto niadtong kinsa mohimo og usa ka pakigsaad uban Kaniya. Ug kita mobalos og hesed alang Kaniya.

Imahe

bag-ong magtiayon gawas sa templo

Litrato pinaagi ni Jerry L Garns

Tungod kay ang Dios adunay hesed alang niadtong nagbaton og pakigsaad uban Kaniya, Siya mohigugma kanila. Siya mopadayon sa pakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya.

Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato.

Nasayod kamo sa makasaysayanon nga pamahayag nga gihatag sa Ginoo ngadto ni Propeta Joseph Smith. Kini naggikan sa pagpadayag. Ang Ginoo miingon ngadto ni Joseph, “Kini nga saad inyo usab, tungod kay kamo gikan kang Abraham, ug ang saad nahimo ngadto ni Abraham” (Doktrina ug mga Pakigsaad 132:31).

Sa ingon, kining walay kataposan nga pakigsaad gipahiuli isip kabahin sa talagsaong Pagpahiuli sa ebanghelyo diha sa kahingpitan niini. Hunahunaa kana! Ang pakigsaad sa kaminyoon nga gihimo diha sa templo direktang nabugkos ngadto nianang pakigsaad kang Abraham. Sa templo ang magtiayon gipaila ngadto sa tanang mga panalangin nga gitagana alang sa matinud-anong kaliwatan ni Abraham, Isaac, ug Jacob.

Sama sa gibuhat ni Adan, kamo ug ako personal nga misulod sa dalan sa pakigsaad atol sa bunyag. Dayon mas hingpit kitang misulod niini diha sa templo. Ang mga panalangin sa pakigsaad kang Abraham ihatag diha sa balaang mga templo. Kining mga panalangin motugot kanato, nga mobangon sa unang pagkabanhaw ug “makapanunod sa mga trono, mga gingharian, mga kagamhanan, mga kayutaan, ug kamandoan, ngadto sa atong ‘pagkahimaya ug himaya sa tanan nga mga butang’ [Doktrina ug mga Pakigsaad 132:19].”⁴

Sa hinapos nga bahin nga teksto sa Daang Tugon, atong mabasa ang saad ni Malaquias nga si Elijah “hiusahon niya ang mga ginikanan ug ang mga anak” (Malaquias 4:6). Sa karaan nga Israel, ang paghisgot niana nga mga amahan mahimong maglakip sa mga amahan sila si Abraham, Isaac, ug Jacob. Kini nga mga saad giklaro kon kita mobasa sa lain-laing bersiyon niini nga bersikulo nga gikutlo ni Moroni ngadto ni Propeta Joseph Smith: “Siya [Elijah] motanom sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan” (Joseph Smith—Kasaysayan 1:39). Kadtong mga amahan siguradong naglakip nila ni Abraham, Isaac, ug Jacob. (Tan-awa sa Doktrina ug mga Pakigsaad 27:9–10.)

Imahe

imahe ni Jesukristo

Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Jesukristo: Ang Sentro sa Pakigsaad

Ang maulaon nga sakripisyo sa Manluluwas makapahimo sa Amahan sa pagtuman sa Iyang mga saad ngadto sa Iyang mga anak. Tungod kay si Jesukristo mao “ang dalan, ug ang kamatuoran, ug ang kinabuhi,” kini nagsunod nga “walay bisan kinsa nga makaadto sa Amahan, gawas kon pinaagi [Kaniya]” (Juan 14:6). Ang katumanan sa pakigsaad kang Abraham mahimong posible tungod sa Pag-ula sa atong Manluluwas, ang Ginoo nga si Jesukristo. Si Jesukristo mao ang sentro sa pakigsaad kang Abraham.

Ang Daang Tugon dili lang usa ka libro sa kasulatan; kini usa usab ka libro kabahin sa kasaysayan. Mahinumdoman ninyo nga nagbasa kabahin sa kaminyoon ni Sarai ug Abram. Tungod kay sila walay anak, si Sarai mihatag sa iyang sulugoon, si Hagar, nga mamahimo usab nga asawa ni Abram, sumala sa direksiyon sa Ginoo. Nanganak si Hagar kang Ismael.⁵ Gipangga ni Abram si Ismael, apan siya dili ang anak nga agian sa pakigsaad. (Tan-awa sa Genesis 11:29–30; 16:1, 3, 11; Doktrina ug mga Pakigsaad 132:34.)

Isip usa ka panalangin gikan sa Dios, ug agig tubag ngadto sa hugot nga pagtuo ni Sarai,⁶ siya nagsabak diha sa iyang katigulangon aron ang pakigsaad moagi pinaagi sa iyang anak, si Isaac (tan-awa sa Genesis 17:19). Natawo siya diha sa pakigsaad.

Ang Dios mihatag ni Sarai ug Abram og bag-ong ngalan—Sara ug Abraham (tan-awa sa Genesis 17:5, 15). Ang pagtugyan niadtong bag-ong mga ngalan nagtimaan sa sinugdanan sa usa ka bag-ong kinabuhi ug usa ka bag-ong kapalaran alang niining pamilya.

Si Abraham mipangga ni Ismael ug ni Isaac. Ang Dios misulti ni Abraham nga si Ismael; mosanay ug mahimong usa ka bantugan nga nasod (tan-awa sa Genesis 17:20). Sa samang higayon, ang Dios miklaro niini nga ang walay kataposan nga pakigsaad matukod pinaagi ni Isaac (tan-awa sa Genesis 17:19).

Ang tanan kinsa modawat sa ebanghelyo mamahimong kabahin sa linya sa kaliwatan ni Abraham. Sa Mga Taga-Galatia atong mabasa:

“Gibunyagan kamo aron mahiusa kang Kristo busa nakaambit kamo sa kinaiya ni Kristo.

“… Nahiusa na man kamong tanan kang Kristo Jesus.

“[Ug] kon kamo iya na ni Kristo, mga kaliwat kamo ni Abraham ug madawat ninyo ang gisaad sa Dios” (Mga Taga-Galatia 3:27–29).

Sa ingon, kita mamahimong mga manununod ngadto sa pakigsaad mahimong pinaagi sa pagkahimugso o pinaagi sa pagsagop.

Imahe

mga tawo nga nagpundok alang sa tulumanon sa bunyag

Ang anak nga lalaki nila ni Isaac ug Rebekah natawo diha sa pakigsaad. Agi og dugang, siya mipili sa pagsulod sa iyang kaugalingong pagbuot. Sama sa inyong nasayran, ang ngalan ni Jacob giusab ngadto sa Israel (tan-awa sa Genesis 32:28), nagpasabot nga “ipatigbabaw ang Dios” o “ang tawo kinsa mopatigbabaw uban sa Dios.”⁷

Sa Exodo atong mabasa nga “gihinumdoman [sa Dios] ang iyang kasabotan tali kaniya ug kang Abraham, kang Isaac ug kang Jacob” (Exodo 2:24). Ang Dios misulti sa mga anak ni Israel, “Kon magmasinugtanon kamo kanako ug magtuman sa akong sugo, mahimo kamo nga pinili kong katawhan” (Exodo 19:5).

Ang mga pulong “pinili nga bahandi” gihubad gikan sa Hebreo nga segullah, nagpasabot nga taas og bili nga kabtangan—usa ka “bahandi.”⁸

Ang libro sa Deuteronomio nag-asoy sa kaimportante sa pakigsaad. Ang Apostoles sa Bag-ong Tugon nasayod kabahin niini nga pakigsaad. Human si Pedro miayo sa bakol nga lalaki diha sa mga ang-ang sa templo, mitudlo siya sa mga tumatan-aw kabahin ni Jesus. Miingon si Pedro, “Ang Dios ni Abraham, ug ni Isaac, ug ni Jacob, ang Dios sa atong mga katigulangan, nagpasidungog sa iyang Sulugoon nga si Jesus” (Mga Buhat 3:13).

Si Pedro mitapos sa iyang mensahe pinaagi sa pagsulti sa iyang mga tigpaminaw, “Kamo mao ang mga anak sa mga propeta ug sa pakigsaad nga gihimo sa Dios uban sa inyong mga ginikanan, sa iyang pag-ingon kang Abraham, ‘Pinaagi sa imong kaliwat pagapanalanginan ang tanang kabanayan sa yuta” (Mga Buhat 3:25). Si Pedro miklaro niini ngadto kanila nga ang bahin sa misyon ni Kristo mao ang pagtuman sa pakigsaad sa Dios.

Ang Ginoo mihatag og susama nga wali ngadto sa mga tawo sa karaang Amerika. Didto, ang nabanhaw nga Kristo misulti sa mga tawo kon si kinsa gayod sila. Miingon Siya:

“Kamo mao ang mga kaliwatan sa mga propeta; ug kamo mga sakop sa balay ni Israel; ug kamo anaa sa pakigsaad diin ang Amahan mihimo uban sa inyong mga amahan, nag-ingon ngadto kang Abraham: Ug diha sa imong binhi ang tanan nga mga kaliwatan sa yuta mapanalanginan.

“Ang Amahan ingon nga mipasanay kanako nganha kaninyo pag-una, ug mipadala kanako sa pagpanalangin kaninyo diha sa pagpabiya sa matag usa kaninyo gikan sa iyang mga kadautan; ug kini tungod kay kamo ang mga anak sa pakigsaad” (3 Nephi 20:25–26).

Nakita ba ninyo ang kahulugan niini? Kadtong kinsa motuman sa ilang mga pakigsaad uban sa Dios mamahimong usa ka kalag nga makabatok sa sala! Kadtong kinsa motuman sa ilang mga pakigsaad makabaton og kalig-on sa pagbatok sa makanunayon nga impluwensiya sa kalibotan.

Imahe

lalaki nag-ambit sa sakramento

Ang Ginoo misugo nga kita mosabwag sa ebanghelyo ug mopaambit sa pakigsaad. Mao kana nganong kita adunay mga misyonaryo. Siya nangandoy alang sa matag usa sa Iyang mga anak nga makabaton og oportunidad sa pagpili sa ebanghelyo sa Manluluwas ug mosugod sa dalan sa pakigsaad. Ang Dios gusto nga ikonektar ang tanang katawhan ngadto sa pakigsaad nga Iyang gihimo sa karaang panahon uban ni Abraham.

Mao nga, ang misyonaryo nga buhat usa ka mahinungdanon nga bahin sa dakong panagpundok sa Israel. Kana nga panagpundok mao ang labing importanting buhat nga nahitabo sa yuta karon. Walay laing ikatandi sa kadako niini. Walay laing ikatandi ang kaimportante niini. Ang mga misyonaryo sa Ginoo—Iyang mga disipulo—nalambigit diha sa labing dakong hagit, sa labing dakong kawsa, sa labing dakong buhat dinhi sa yuta karon.

Apan aduna pay mas labaw pa—mas labaw pa. Adunay dakong panginahanglan sa pagsangyaw sa ebanghelyo ngadto sa mga tawo sa pikas habig sa tabil. Gusto sa Dios nga ang tanan, sa duha ka habig sa tabil, nga matagamtam ang mga panalangin sa Iyang pakigsaad. Ang dalan sa pakigsaad bukas ngadto sa tanan. Kami nangamuyo sa tanan sa paglakaw niana nga dalan uban kanamo. Walay laing buhat nga nag-lakip sa tanan (buhi o patay). Tungod kay “ang Ginoo maloloy-on ngadto sa tanan kinsa, diha sa katim-os sa ilang mga kasingkasing, motawag nganha sa iyang balaan nga ngalan” (Helaman 3:27).

Tungod kay ang Melchizedek nga Pagkapari gipahiuli, ang kababayen-an ug kalalakin-an nga nagsunod sa pakigsaad maka-access sa “tanan nga espirituhanon nga mga panalangin” sa ebanghelyo (Doktrina ug mga Pakigsaad 107:18).

Atol sa pagpahinungod sa Kirtland Temple niadtong 1836, ubos sa direksiyon sa Ginoo, si Elijah mipakita. Iyang katuyoan? “Sa pagpabalik … [sa] mga anak ngadto sa mga amahan” (Doktrina ug mga Pakigsaad 110:15). Si Elias usab mipakita. Iyang katuyoan? Aron itugyan ngadto ni Joseph Smith ug Oliver Cowdery ang “kapaigoan sa ebanghelyo ni Abraham, miingon nga diha kanamo ug sa among binhi sa tanan nga mga kaliwatan nga mosunod kanamo pagapanalanginan” (Doktrina ug mga Pakigsaad 110:12). Busa, ang Agalon mitugyan diha nila ni Joseph Smith ug ni Oliver Cowdery ang awtoridad sa pagkapari ug ang katungod sa pagdala sa lahi nga mga panalangin sa pakigsaad kang Abraham ngadto sa uban.⁹

Sa Simbahan, kita nagsunod sa dalan sa pakigsaad sa tinagsa-tagsa ug sa hinugpong nga paagi. Sama sa mga kaminyoon ug mga pamilya patas ang kalig-on nga mamugna nga makamugna og usa ka espesyal nga gugma, ingon man ang bag-ong relasyon nga naporma sa dihang kita mibugkos sa atong mga kaugalingon pinaagi sa pakigsaad direkta ngadto sa Dios!

Tingali kini ang unsay gipasabot ni Nephi sa dihang siya miingon nga ang Dios “nahigugma niadto kinsa modawat kaniya nga ilang Dios” (1 Nephi 17:40). Kini mao gayod ang eksakto kon ngano, isip kabahin sa pakigsaad, usa ka espesyal nga kaluoy ug gugma—o hesed—magamit sa tanan kinsa mosulod niining makabugkos ug suod nga relasyon uban sa Dios, gani sa “dili maihap nga kaliwatan” (Deuteronomio 7:9).

Ang paghimo og usa ka pakigsaad sa Dios mousab sa atong relasyon uban Kaniya hangtod sa kahangtoran. Kini mopanalangin kanato sa naghingapin nga gugma ug kaluoy.¹⁰ Kini makaapekto kon si kinsa kita karon ug sa unsang paagi ang Dios motabang kanato nga mamahimong unsa atong sangpotan. Kita gisaaran nga kita, usab, mahimong usa ka “lahi nga bahandi” ngadto Kaniya (Salmo 135:4).

Kadtong mohimo og sagradong mga pakigsaad ug motuman niini gisaaran og kinabuhing dayon ug kahimayaan, “ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7). Si Jesukristo mao ang migarantiya niadtong mga pakigsaad (tan-awa sa Mga Hebreo 7:22; 8:6). Ang mga tigtuman sa pakigsaad kinsa mohigugma sa Dios ug motugot Kaniya aron mopatigbabaw sa tanang mga butang sa ilang mga kinabuhi mohimo Kaniya nga ang labing gamhanang impluwensiya diha sa ilang mga kinabuhi.

Sa atong panahon kina adunay pribilehiyo sa pagdawat og patriyarkal nga mga panalangin ug makahibalo sa atong koneksiyon ngadto sa karaang mga patriyarka. Kadtong mga panalangin maghatag usab og daklit nga pagtan-aw sa unsay anaa sa unahan.

Imahe

Si Jesus nakigsulti kang Pedro

Lovest Thou Me More Than These [Gihigugma Mo Ba Ako Labaw Pa Niini]? ni David Lindsley

Ang atong calling isip Israel sa pakigsaad mao ang pagsiguro nga ang matag miyembro sa Simbahan makaamgo sa kalipay ug mga pribilehiyo nga kauban sa paghimo og mga pakigsaad sa Dios. Usa kini ka tawag sa pag-awhag sa matag lalaki ug babaye, batang lalaki ug batang babaye nga masulondon sa pakigsaad, sa pagpaambit sa ebanghelyo niadtong kinsa mosulod sa ilang impluwensiya. Usa usab kini ka tawag sa pagsuporta ug pag-awhag sa atong mga misyonaryo, kinsa gipadala nga dala ang mga instruksiyon sa pagbunyag ug pagtabang sa uban sa pagpundok sa Israel, aron nga magkauban kita nga mamahimong katawhan sa Dios ug Siya mahimong atong Dios (tan-awa sa Doktrina ug mga Pakigsaad 42:9).

Matag lalaki ug matag babaye kinsa moapil sa mga ordinansa sa pagkapari ug kinsa mohimo ug motuman sa mga pakigsaad sa Dios adunay direktang agianan ngadto sa gahom sa Dios. Kita modala sa ngalan sa Ginoo diha sa atong kaugalingon isip mga indibidwal. Kita modala usab sa Iyang ngalan ngari kanato isip mga katawhan. Isip madasigon kabahin sa paggamit sa hustong ngalan sa Ang Simbahan ni Jesukristo sa mga Santos sa Ulahing mga Adlaw mao ang usa ka mahinungdanong paagi nga kita isip usa ka katawhan modala sa Iyang ngalan ngari kanato. Sa pagkatinuod, ang matag maayo nga buhat sa Ang Simbahan ni Jesukristo sa mga Santos sa Ulahing mga Adlaw ug sa mga miyembro niini mao ang usa ka pagpahayag sa hesed sa Dios.

Ngano nga ang Israel nagkatibulaag? Tungod kay ang mga tawo misupak sa mga sugo ug mibato sa mga propeta. Ang mahigugmaon apan nagbangutan nga Amahan mitubag pinaagi sa pagpatibulaag sa Israel sa layo ug halapad.¹¹

Apan, Siya mipatibulaag kanila nga adunay usa ka saad nga usa ka adlaw ang Israel pagapundokon pag-usab ngadto sa Iyang panon.

Ang tribo ni Judah gihatagan og responsibilidad sa pag-andam sa kalibotan alang sa unang pag-anhi sa Ginoo. Gikan niana nga tribo, si Maria gitawag nga mahimong inahan sa Anak sa Dios.

Ang tribo ni Jose, pinaagi niya ug sa mga anak nga lalaki ni Asenath, sila si Ephraim ug Manases (tan-awa sa Genesis 41:50–52; 46:20), nahatagan sa responsibilidad sa pagpangulo diha sa pagpundok sa Israel, sa pag-andam sa kalibotan sa Ikaduha nga Pag-anhi sa Ginoo.

Sa ingon nga walay kataposang hesed nga relasyon, natural lang nga gusto sa Diyos nga pundokon ang Israel. Siya ang atong Langitnong Amahan! Gusto Siya nga ang matag usa sa Iyang mga anak—sa isig ka habig sa tabil—makadungog sa mensahe sa gipahiuli nga ebanghelyo ni Jesukristo.

Ang dalan sa pakigsaad mao ang dalan sa gugma—kana nga dili katuohan nga hesed, nga manggiloy-ong pag-amuma ug pagtabang sa usag usa. Ang pagbati niana nga gugma makapalingkawas ug makapabayaw. Ang labing dakong kalipay nga inyo gayod nga masinati mao nga kon kamo malukop sa gugma alang sa Dios ug alang sa tanan Niyang mga anak.

Ang paghigugma sa Dios nga labaw pa kay ni bisan kinsa o bisan unsang butang mao ang kondisyon nga makapadala og tinuod nga kalinaw, kahupay, og kamasaligon ug kalipay.

Ang dalan sa pakigsaad mahitungod gayod sa atong relasyon uban sa Dios—ang atong hesed nga relasyon diha Kaniya. Kon kita mosulod og usa ka pakigsaad uban sa Dios, kita naghimo og usa ka pakigsaad uban Kaniya kinsa kanunayng motuman sa Iyang pulong. Siya mobuhat sa tanang butang kutob sa Iyang mahimo, nga walay paglapas sa atong kabubut-on, aron matabangan kita nga motuman sa atoa.

Ang Basahon ni Mormon nagsugod ug gitapos sa pakisayran ngadto niining walay kataposan nga pakigsaad. Gikan niining ulohan nga pahina hangtod sa pagtapos sa mga pagpamatuod ni Mormon ug ni Moroni, ang Basahon ni Mormon naghimo og mga pakisayran ngadto sa pakigsaad (tan-awa sa Mormon 5:20; 9:37). “Ang pag-abot sa Basahon ni Mormon usa ka timailhan ngadto sa tibuok kalibotan nga ang Ginoo nagsugod na sa pagpundok sa Israel ug sa pagtuman sa mga pakigsaad nga Iyang gihimo ngadto ni Abraham, Isaac ug Jacob.”¹²

Minahal kong mga kaigsoonan, kita gitawag niining mahinungdanong panahon sa kasaysayan sa yuta sa pagtudlo sa kalibotan kabahin sa katahom ug gahom sa walay kataposan nga pakigsaad. Ang Atong Langitnong Amahan nagsalig kanato nga walay pagpanagana aron buhaton kining talagsaon nga buhat.