Mga Angay Buhaton ug Mga Dili Angay Buhaton sa Pagdapit sa mga Higala ngadto sa Simbahan
Ania ang pipila ka paagi sa pagtabang sa mga higala nga mobati nga mas komportable mahitungod sa pag-adto sa simbahan.
Ang pagdapit sa uban nga mosimba uban kanato diha sa panagtigom alang sa sakramento usa ka nindot nga paagi sa pagpaambit sa kahayag ug gugma sa Manluluwas ngadto sa pamilya ug mga higala. Apan usahay gihimo nato kining mas lisod kay sa gikinahanglan niini.
Aniay pito ka paagi nga kita makatabang sa mga higala nga mobati nga mas komportable sa pagdawat sa pagdapit nga mosimba:
1. Buhata Kini Tungod sa Gugma
Nganong gidapit ninyo sila? Kini ba para kaninyo o para kanila? Kon kamo nagpakabana alang kanila ug gusto ang labing maayo alang kanila, mabati nila ang inyong sinseridad. Kon ilang makita nga importante sila kaninyo, mahimong mas andam sila nga magkat-on kon unsa pay mas importante alang kaninyo.
2. Dapita Sila nga Mosimba uban Kaninyo
Pangutan-a ang inyong mga higala kon aduna ba silay dapit sa pagsimba sa Manluluwas ug dapita sila nga mosimba uban kaninyo, ilabi na sa mga panahon sama sa Pasko ug sa Pasko sa Pagkabanhaw. Kon sila dili mga Kristiyano, pangutan-a sila kon ganahan ba sila nga magkat-on pa og dugang mahitungod ni Jesukristo ug dapita sila sa pagsinati og Kristiyano nga tulumanon sa pagsimba uban kaninyo. Hinumdomi nga ipakita ang samang pagtahod alang sa ilang mga gituohan nga inyong gilaoman nga ilang ihatag sa inyong mga gituohan.
3. Ayaw Ipersonal ang “Dili”
Kon ang inyong higala mobalibad, dawata ang “dili” sa mabination nga paagi. Apan ayaw hunahunaa nga ang usa ka “dili” sa pagtambong sa simbahan nagpasabot nga usa ka “dili” ngadto kaninyo. Adunay daghang rason nga tingali mibalibad sila nga walay kalabotan sa unsay ilang gibati mahitungod kaninyo. Kon dili ninyo tugotan ang usa ka “dili” sa pag-usab sa inyong relasyon, tingali kamo adunay kahigayonan unya nga mas makasabot sa ilang mga pagbati.
4. Tabangi ang Inyong mga Higala nga Makahibalo kon Unsay Mapaabot
Kon ang inyong mga higala modawat sa pagdapit nga mosimba, tabangi sila nga makasabot kon unsay mapaabot: unsa ilang pwede nga sul-obon, ang katuyoan ug gidugayon sa matag miting, ug unsay mahitabo diha sa mga miting—o unsay dili mahitabo (sama pananglit, ang mga donasyon dili kolektahon atol sa atong mga miting). Kinahanglan usab ninyong ipasabot ngadto kanila kon unsa ang sakramento ug unsay gipasabot niini. Tingali kini makatabang kanila nga mahimong mas komportable kon sila mosimba.
Aniay pipila ka bidyo nga inyong mapaambit nga tingali makatabang kanila nga mahibalo kon unsay mapaabot:
5. Ilisdi ang mga Kasayoran og mga Pagpaila-ila
Ang mga tawo kasagaran dili kaayo interesado sa atong doktrina (tingali sa sinugdanan) kay sa atong komunidad ug maayo nga mga buhat. Tabangi sila nga mokonektar ngadto sa mga tawo, ug ipaambit kon sa unsang paagi kita nalambigit diha sa komunidad, magkaubang moserbisyo, ug nag-atiman sa usag usa.
Usa ka nindot nga paagi sa pagpaila-ila sa usa ka tawo ngadto sa gipahiuli nga ebanghelyo ni Jesukristo mao ang pagsugod sa pagpaambit sa mga panalangin nga ikatanyag sa ebanghelyo. Sama pananglit, mahimo ninyong sulayan nga ipakita sa ilaha kon sa unsang paagi ang Simbahan makatabang nila sa pagpangita sa mga kagikan sa ilang pamilya, pagpalig-on sa ilang pamilya, mahimong mas makabarog sa kaugalingong pagpaningkamot, makahatag og makahuluganon nga pagserbisyo, ug mahatagan ang ilang mga anak og maayo nga sumbanan nga sundon sa ilang kinabuhi. Ang paghisgot sa piho nga mga doktrina ug mga gituohan mahimong unya na kon andam na sila.
Ang pipila ka tawo nga mahimong gusto nimong ipaila-ila sa ilaha naglakip sa bishop, ang presidente sa Relief Society, usa ka consultant sa templo ug family history, o ang magtutudlo sa Primary alang sa bisan kinsang anak diha sa pamilya.
6. Abiabiha ang Tanan
Kon motambong ang inyong mga higala, buhata kutob sa inyong mahimo nga mobati sila nga giabiabi ug matubag ang ilang mga panginahanglan. Sa samang paagi, kon makakita kamo og usa ka tawo sa simbahan nga wala ninyo nailhi, magmahigalaon ug magmaabiabihon. Pahibaloa sila kon unsa ka nindot nga anaa sila didto. Ikonsiderar ang mga butang gikan sa ilang panglantaw, pagdapit og mga pangutana, ug tabangi sila nga makasabot sa ilang kasinatian.
7. Ayaw Pamugos; I-follow Up
Ang uban nga tingali interesado nga motambong mahadlok nga pugson sila ngadto sa usa ka butang. Samtang maningkamot kamo sa paghatag og maayo nga kasinatian diin ang inyong mga higala makabati sa Espiritu Santo, pagpaambit og mga hunahuna ug mga pagbati, apan ayaw batia nga ingon og kinahanglan ninyong ipugos ang usa ka espirituhanon nga kasinatian. Salig sa Dios ug tugoti ang Espiritu sa paghimo sa Iyang buhat. Ug kon ang inyong mga higala walay panahon nga magpabilin alang sa tibuok nga eskedyul sa miting o magpabilin human sa simba aron makig-istorya, pasalamati sila sa pagtambong ug paghimo og oportunidad aron maka-follow up.
Ang Labing Importante nga Pagdapit
Ang pagdapit sa uban nga mosimba sa Manluluwas uban kanato dili kinahanglang makaugtas kanato o kanila. Samtang modapit kita og mga higala, atong gilihok ang pagdapit ni Presidente Russell M. Nelson nga mangalagad ngadto sa uban diha sa usa ka “bag-o, mas balaan nga paagi.”1 ug “sa pagpundok sa Israel.”2 Mosunod ang hingpit nga kalipay kon kita mopaambit sa kahayag ug gugma sa Manluluwas ngadto niadtong naglibot kanato.