Kita Makatabang sa Uban nga Mobati nga Nahisakop Sila

Imahe

hulagway ni Ioana Schifirnet

Sa dihang mipasakop si Ioana Schifirnet sa Simbahan isip usa ka batan-on nga tin-edyer didto sa Romania, ang mga young adult sa iyang branch miabiabi kaniya ug milakip kaniya sa ilang mga klase ug mga kalihokan. “Nahimo silang akong labing suod nga mga higala,” miingon siya. “Sila mipabati kanako nga ingon og nahisakop ako.”

Samtang siya mismo nahimong usa ka young adult, gusto ni Ioana nga buhaton ang susama ug tabangan ang uban nga mobati nga giabiabi diha sa Simbahan sa Manluluwas. Bisan og gikulbaan siya mahitungod sa pagpakighigala sa mga tawo nga wala niya nailhi, nagkat-on siya sa pagpaminaw sa Espiritu Santo ug sa pagsalig sa mga pag-aghat nga iyang nadawat.

Sa dihang miapil ang laing young woman, nagbaton si Ioana og kaisog sa pagpakig-istorya kaniya. Nadiskobrehan nila ang komon nga interes sa musika, ug mitanyag si Ioana sa pagtudlo kaniya sa pagpangulo sa pagkanta. Sa wala madugay magkauban silang naggahin og panahon, nagserbisyo isip piyanista sa branch ug lider sa musika.

“Samtang giandam nako ang akong kaugalingon nga modawat sa giya sa Espiritu Santo, nagsugod ko nga makamatikod Kaniya nga nagbutang og mga ideya sa akong pangisip, nagtubag sa akong mga pangutana, nag-aghat kanako,” miingon si Ioana. “Dihay mga panahon nga wala ko masayod unsay isulti, ug dayon dunay butang nga motunga. Gibati nako nga husto kini sa dihang gisulti nako kini. Nagkat-on ko nga mosalig sa Espiritu Santo.”

Nakat-onan niya nga kasagaran dili dinagko ang mga butang nga motabang sa uban nga mobati nga ingon og nahisakop sila. Alang kaniya, kini mao ang pagkahimong gilakip diha sa Sunday School o mga kalihokan, pagdula og mga paugnat sa kusog o binuang nga mga dula, pag-bake og mga cookie, ug pagpahigayon og mga gabii sa pagsayaw. “Dili kadto maluho. Paglingaw-lingaw lang kadto o pagpakig-istoryahanay. Ug kon konektado na kini ngadto sa usa ka butang nga espirituhanon, kana makahimo niini nga espesyal kaayo.”

Si Ioana mitapos, “Sa paghandom, mipasakop unta ako sa Simbahan ni Jesukristo nga wala kadto nga mga young single adult. Apan ang pagkaanaa nila nakatabang sa paglig-on kanako sa mga paagi nga akong gikinahanglan.”

Imahe

young adult nga kababayen-an nga nakighalubilo

Makatabang Kita sa Dios sa Pagpundok sa Iyang mga Anak

Ang pagpakighigala sa uban mahimong lisod, ilabi na kon kini usa ka tawo nga dili kaayo nato kaila o kinsa tingali adunay lahi nga mga gituohan kay sa kanato.

Sobra sa 40 ka tuig, si Jeremias misulay sa pagtabang sa mga tawo nga moduol ngadto sa Manluluwas, daghan kanila dili interesado sa iyang tabang. Gibaliwala nila ang mga propeta. Ang ilang mga kasingkasing napahiluna diha sa ubang mga butang kay sa Ginoo. (Tan-awa sa Jeremias 2–3; 5; 7; 11.)

Nasayod si Jeremias nga ang balay sa Israel magkatibulaag. Apan nanagna siya sa usa ka dako nga pagpundok sa atong panahon, sa dihang ang Ginoo mopundok sa Israel ngadto sa Zion, magpadala og mga mananagat ug mga mangangayam aron sa pagpangita kanila (tan-awa sa Jeremias 16:16).

Si Presidente Russell M. Nelson midapit kanato sa pag-apil niini nga pagpundok: “Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.”¹

Imahe

kalalakin-an nga mitambog sa pukot ngadto sa dagat

Mga Baroganan nga Hunahunaon

Samtang maghunahuna kamo mahitungod kon unsaon ninyo sa pagpakighigala ug pag-abiabi sa uban, ikonsiderar kini nga mga ideya gikan sa kasinatian ni Ioana:

• Ang Espiritu Santo makagiya sa atong mga pulong ug mga aksiyon, ingon man sa paghimo sa atong labing maayo nga mga paningkamot ngadto sa usa ka butang nga makahuloganon (tan-awa sa Moises 6:32–34).

• Pangita og komon nga mga interes.²

• Dapita ang uban nga moapil kaninyo diha sa mga kalihokan diin inyo nang giplanohan nga salmotan.³

• Si Presidente Nelson midapit kanato sa pagpundok sa uban pinaagi sa pagkahimong usa ka kahayag ug sa pagtakda og sumbanan nga magpakita kon sa unsang paagi ang tinuod nga mga disipulo magpakabuhi.⁴