Nabug-atan? Ipadayon ang Inyong Pagtutok kang Kristo

Diha sa sambingay sa mga salapi (tan-awa sa Mateo 25:14–30), usa ka agalon mihatag sa tulo ka sulugoon og bahin sa katigayonan sa wala pa mibiya sa usa ka layong panaw. Sa dihang siya mibalik, ang duha sa mga sulugoon namuhonan sa ilang mga salapi ug napanalanginan, samtang ang ikatulo mitago sa iyang talanton ug gisalikway.

Kita lagmit maghunahuna kon giunsa man pagkahibalo sa mga sulugoon kon unsa ang buhaton sa mga salapi nga gihatag kanila. Ang tulo adunay “abilidad” (Mateo 25:15) ug nasayod kon unsaon sa pagpamuhonan, apan ang ikatulo mipili nga dili mogamit sa iyang kahibalo. Nakasabot siya sa iyang tahas, apan tingali wala siya makasabot sa agalon.

Gamit ang lig-on nga salabotan ni Kristo, kita wala kinahanglana nga “sugo[on] sa tanang butang” apan masayod nga si Kristo ug ang Iyang mga pagtulon-an igo na aron “mobuhat og daghan nga mga butang diha sa [atong] kaugalingon nga gawasnon nga kabubut-on,ug magpahinabo sa daghan nga mga pagkamatarong” (Doktrina ug mga Pakigsaad 58:26–27). Kasagaran, kon mas makaila kita Kaniya, mas makita sa atong mga lihok ang Iyang kabubut-on ngari kanato.

Ang Ginoo naglaom nga kita mogamit sa atong mga abilidad sa pagkat-on Kaniya ug sundon ang Kristohanong pamatasan diha sa atong kaugalingong kinabuhi—labaw sa tanan, Siya naglaom nga kita mamahimong sama Kaniya.³

Ang pagkat-on kabahin ni Kristo mao ang mahangturon nga paningkamot, ug Siya mosuporta kanato sa matag lakang. Diha sa natad sa edukasyon, adunay usa ka konsepto nga naila isip damba. Ang mga magtutudlo mogamit niining konsepto sa pagtabang sa mga estudyante nga makabaton og mas lig-on nga panabot ug mas dakong kagawasan samtang sila nagkat-on.⁴ Sa samang paagi, kita makaingon nga si Kristo, isip ang Agalon nga Magtutudlo, migamit og damba sa pagtabang kanato nga molambo diha sa Iyang ebanghelyo ug “pagkat-on [Kaniya]” (Mateo 11:29; tan-awa usab sa bersikulo 28; Dokrina ug mga Pakigsaad 19:23).

Isip mga disipulo ni Jesukristo, kita magpadayon sa paglig-on sa atong panabot sa unsay atong nahibaloan ug modugang ngadto niana nga kahibalo “pagtulun-an human sa laing pagtulun-an” (2 Nephi 28:30). Samtang kita mopalig-on sa atong pagsabot ni Kristo, Siya makasalig kanato uban sa dugang nga kahibalo “kay ngadto kaniya nga modawat Ako mohatag og dugang pa” (2 Nephi 28:30).

Hunahunaa kon sa unsang paagi nga kita gitudloan isip mga anak. Ang gagmayng mga bata nagkinahanglan og makanunayon nga pahinumdom aron matabangan nga mapalig-on ang ilang panabot sa unsay gitudlo na sa ilang mga ginikanan; diha sa playground, usa ka gamayng bata tingali nagkinahanglan nga pahinumdoman og kadaghan nga dili mobutang og hugaw ngadto sa ilang ba-ba. Apan, samtang sila magdako ug mohingkod, ingon usab ang ilang panabot kabahin niadtong mga baroganan, ug ang ilang mga ginikanan makatabang nila nga makat-on og butang nga bag-o.

Adunay mga higayon nga kita mobalik ug mahimong nagkinahanglan nga matudloan og usab sa mga butang, apan mao kana ang mga butang kabahin sa damba—kitang tanan mga estudyante nga nagkinahanglan sa tabang sa atong Agalon nga Magtutudlo. Si Kristo mipahigayon sa Pag-ula aron nga, uban sa kamapainubsanon ug hugot nga pagtuo, kita makadangop ngadto Kaniya pinaagi sa paghinulsol ug matudloan pag-usab.

Imahe

babaye naggunit og hulagway ni Jesukristo

Pagsunod sa Iyang mga Sugo

Isip kabahin sa edukasyon sa Langitnong Amahan ug ni Jesukristo alang kanato, kita makadawat og giya kabahin sa pagpakabuhi nga matarong. Usahay kini nga giya naglakip og piho nga mga lagda nga kita kinahanglan nga mosunod. Kita tingali mokonsiderar niining mga lagda nga kabahin sa damba ni Kristo—piho nga instruksiyon aron sa pagtabang kanato nga mapalig-on ang atong panabot sa baroganan sa ebanghelyo nga gipresentar niini.

Ikonsiderar ang baroganan sa ebanghelyo sa kaligdong, pananglitan. Ang Alang sa Kalig-on sa Kabatan-onan nga booklet naghatag sa matag piho, maaksiyonan nga kahulogan sa dili ligdong nga sininaan: “Ang dili tarong nga sinina naglakip sa bisan unsa nga sinina nga hugot, nipis kaayo, o nagpakita sa bisan unsang paagi.”⁵ Kon kita mosunod niining lagda, kini makatabang kanato nga malig-on ang atong panabot sa tanan nga kaligdong—usa ka kinaiya sa kamapainubsanon, pagkadesente, ug “himaya sa Dios” (1 Mga Taga Corinto 6:20)⁶—hangtod ang atong mga kasingkasing mausab ug atong mga aksiyon mas mapaduol ngadto kang Kristo nga mahimong ikaduha nga kinaiyahan.

Samtang akong gigamit kini nga kausaban sa panghunahuna ngadto sa tanang “buhatonon” nga akong gibati nga kinahanglan nakong matuman diha sa ebanghelyo, ang akong nagkadako nga mga pagbati nga nawad-an og kadasig sa pagpadayon misugod sa pagkausab ngadto sa pagbati sa hugot nga pagtuo. Ang akong palas-anon migaan pamation samtang ako naglantaw ngadto sa sentro sa mga baroganan sa ebanghelyo nga girepresentar sa matag buhatunon o kasugoan. Ang ikapulo nagtudlo nako kabahin sa paggamit sa balaod sa pagpahinungod sa akong kinabuhi. Ang pagtambong sa simbahan matag semana aron moambit sa sakramento nahimong usa ka leksiyon diha sa Pag-ula sa Manluluwas. Sa kalit lang mibati nga adunay espiritu, ug dili lang usa ka sulat, ngadto sa mga balaod sa Dios diha sa akong kinabuhi.

Samtang kita motutok diha sa Manluluwas ug motugot Kaniya sa pag-usab sa atong mga kasingkasing, ang hitsura sa Dios mahimong “gikulit diha sa [atong] mga panagway” (Alma 5:19). Siya gusto nga dili lang kita mosunod Kaniya apan mamahimong sama Kaniya, maghunahuna ug mobuhat sama sa Iyang buhaton, aron makaila Kaniya.

Diha sa sambingay sa mga salapi (tan-awa sa Mateo 25:14–30), unsaon man sa kataposan nga sulugoon sa pag-angkon nga nakaila sa iyang agalon apan ang gibuhat eksaktong sukwahi sa iyang kabubut-on? Siya mahimong nakasabot sa iyang agalon sa mabaw ra kaayo nga lebel, isip usa ka “istrikto nga tawo” (Mateo 25:24), samtang ang “maayo ug matinud-anon nga [mga] sulugoon” (Mateo 25:21) nakasabot ra gayod sa tinguha ug tumong sa ilang agalon.

Aron tinud-anayng makaila sa Langitnong Amahan ug sa Manluluwas diha sa Ilang tinguha ug tumong, kita kinahanglan nga mopalig-on sa atong panabot sa Ilang tinguha ug tumong sa mga baroganan sa ebanghelyo. Si Kristo nagtudlo og pipila niining mahinungdanong mga baroganan diha sa Juan 3:3–21, lakip sa Iyang Pag-ula ug sa gugma sa Dios alang kanato. Kita nakakat-on og dugang pa diha sa duha ka talagsaong mga sugo: higugmaa ang Dios ug higugmaa ang atong mga silingan sama sa atong kaugalingon (tan-awa sa Mateo 22:37–39).

Ang tanang mga sugo ug ang atong mga pakigsaad ug mga calling diha sa ebanghelyo makatudlo kanato ngadto niining mahinungdanong mga baroganan, diin agig resulta motudlo kanato ngadto ni Kristo. Hunahunaa kon sa unsang paagi ang uban nga pagtulon-an makatabang sa pagpalig-on sa mahinungdanong mga kamatuoran diha sa ebanghelyo. Unsa ang gitudlo sa sakramento kaninyo kabahin sa gugma sa Dios alang kaninyo? Unsa ang gitudlo sa pagpangalagad kaninyo mahitungod sa inyong gugma alang sa Dios?

Kon kita motan-aw sa mga sugo ug sa atong mga responsibilidad isip mga disipulo ni Kristo isip mga kahasol lang nga mga buhatonon, ang atong mga pagbati sa pagkawala sa kadasig nga mopadayon makapahimo natong mangutana kon angay ba kining sundon. Tungod niining panghunahuna, kita tingali magsugod sa pagbati og kapait ug mosugod sa paglantaw sa mga sugo isip paglimita ug dili makiangayon. Ang pagsabot sa plano sa kalipay uban ni Jesukristo diha sa sentro sa plano makatabang kanato sa pagtutok kon nganong luyo sa tanang gihangyo sa Ginoo nga atong buhaton ug makausab sa atong mga responsibilidad gikan sa laay ngadto sa pagkamakahuluganon (tan-awa sa Alma 12:32).

Kon pamati niini imposible nga masayran kon unsa ang importante o unsa ang angay sa diyutay natong kusog, kita “[mo]bansay sa usa ka tipik sa hugot nga pagtuo” (Alma 32:27) nga si Kristo mao ang dalan ug nga ang dalan sa pagkigsaad modala kanato ngadto Kaniya. Kita “[mosulay] sa [Iyang] mga pulong, … bisan [kita] kutob ra sa pagtinguha a pagtuo” (Alma 32:27). Sa pagbuhat sa ingon, kita mahimong makakita kon nganong ang Manluluwas anaa sa pagtinguha sa tanang butang—tingali bisan kadtong mga butang nga inyong gipanglimbasogan diha sa ebanghelyo. Unsa kaha kon ang tanan nagtudlo kanato ngadto ni Kristo, sa Iyang maulaon nga sakripisyo, ug sa Iyang Pagkabanhaw? Unsa kaha kon ang tanang nagtudlo ngadto sa Iyang gugma ug sa Langitnong Amahan alang kanato?

Samtang akong gisentro ang pundasyon sa akong pagpamatuod ni Kristo, ang palas-anon sa pagkawalay kadasig sa pagpadayon mas mogaan. Nabug-atan gihapon ko usahay, apan ang pagtutok pag-usab sa akong kasingkasing ngadto Kaniya nakatabang nako nga makaamgo nga ang labing importante mao ang akong mga paningkamot, madako man o magamay, nga mas mapaduol ngadto Kaniya sa matag adlaw.