“Sa Unsa nga Buhat si Jesus Gidihogan nga Mobuhat?,” Liahona, Okt. 2022.
Dali, Sunod Kanako
Sa Unsa nga Buhat si Jesus Gidihogan nga Mobuhat?
Sa sayong bahin sa Iyang yutan-ong pangalagad, giduaw ni Jesukristo ang sinagoga sa Nazaret. Siya mibasa sa basahon ni Isaias, sa mga bersikulo nga atong nahibaloan karon isip Isaias 61:1–2. Dayon Siya mipahibalo, “Natuman karong adlawa kining bahina sa kasulatan sumala sa inyong nadungog” (Lucas 4:21).
Ang unang tulo ka bersikulo sa Isaias 61 naghulagway sa misyon ug pagpangalagad sa Manluluwas. Hunahunaa kon sa unsang paagi Siya mituman ug gituman kini:
“Pagsangyaw sa maayong balita ngadto sa mga kabos” (bersikulo 1). Ang pulong ebanghelyo nagpasabot og “maayong balita.”
Mga paghulagway pinaagi ni Denis Freitas
“Paglipay sa mga nagmagul-anon” (bersikulo 1). Pananglitan, “siya mihalad sa iyang kaugalingon sa usa ka sakripisyo alang sa sala … sa tanan niadto kinsa adunay usa ka masulub-on nga kasingkasing ug mahinulsulon nga espiritu” (2 Nephi 2:7).
“Pagpagawas sa mga binilanggo ug mga binihag” (bersikulo 1). Kini mahimong magpasabot usab ngadto sa mga buhat sa Daang Tugon sa paghatag og kagawasan sa mga ulipon sa matag 50 ka tuig diha sa tuig sa jubilee (tan-awa sa Levitico 25) apan mahimo usab nga nagpasabot ngadto sa pagsangyaw sa ebanghelyo didto sa kalibotan sa espiritu aron pagpalingkawas niadtong anaa sa bilanggoan sa espiritu (tan-awa sa Doktrina ug mga Pakigsaad 138).
“Paghupay niadtong nagsubo” (bersikulo 2). Ang Ginoo makahupay kanato pinaagi sa Iyang Espiritu, ug kita usab sa “paghupay niadto nga nagkinahanglan sa kahupayan” (Mosiah 18:9).
“Nagdala akog kalipay inay kagul-anan” (bersikulo 3). “Matag usa kanato motagamtam sa kapait sa kagul-anan sa kinabuhi, gikan sa sala ug isalikway ang kasubo ug kasagmuyo. Apan ang pag-ula ni Kristo makabayaw kanato diha sa katahom gikan sa atong kalipay inay kagul-anan diha sa siguradong saad sa imortalidad ug kinabuhing dayon.”1