Pag-ampo alang Kanila

Imahe

babaye nga medikal nga propesyonal nga nakig-istorya sa usa ka babaye nga pasyente

Pipila ka tuig nang milabay, mihukom ako nga motambong sa templo kada semana. Nianang panahona, nagpuyo kami duol sa usa ka templo. Kini nga binuhatan nahimong kapiyalan nga tinubdan sa kahayag ug gahom nga akong nasaligan.

Usa ka tuig ang milabay, sa dihang mibalhin ang among pamilya latas [across] sa nasod, wala na kami nagpuyo duol sa templo. Ang pagtambong sa templo dili imposible, apan kay nag-atubang og mas taas nga panahon sa pagbiyahe ug sa mga panginahanglan sa akong batan-on nga pamilya, mitambong lamang ko kaduha sa usa ka bulan.

Sa dihang nagsugod ang COVID-19 nga pandemya, dili na gayod ako makatambong sa templo, nga ingon og usa ka silot human sa pag-organisar og usab sa akong kinabuhi aron makanunayon nga makatambong. Naghunahuna ko unsaon nako nga makapadayon sa paglambo sa espirituhanon nga paagi, ug bug-at ang akong gibati sa murag unsa ka dili makiangayon ang mga butang.

Atol sa usa ka naandan nga paglimpyo sa ngipon, nanglimbasog ko sa pagkalma sa akong hunahuna. Sa dihang ang hygienist nangutana nako kon unsa ang akong gustong paminawon atol sa paglimpyo sa akong ngipon, mitubag ko, “Ganahan gayod ko og makarelaks nga mga tunog sa pagpamalandong.”

Miingon siya nga wala pa gayoy mihangyo niana, apan gibuhat niya. Kinse minutos ang milabay sa among appointment, mipahayag siya nga nalingaw gayod siya sa among “makapamalandong nga paglimpyo sa ngipon.” Dayon misulti siya mahitungod sa kabalaka sa iyang kaugalingon nga kinabuhi, nga naglakip sa bag-ohay lang nga kadaot [injury] sa iyang 13 anyos nga anak nga lalaki. Napalibotan sa kanunayng hinay nga kasaba diha sa usa ka bisi nga opisina, gipaambit niya ang iyang kabug-at kanako, ug magkauban namong nakaplagan ang kalinaw.

Diha sa relaks nga kahimtang sa akong pangisip, naghunahuna ako sa templo. Nakaplagan nako ang akong kaugalingon nga miuswag sa usa ka sesyon sa initiatory, naghunahuna sa mga pulong ug mga pulongan nga gigamit atol sa ordinansa. Tulo ka tataw nga mga pag-aghat gikan sa Espiritu ang misunod dayon:

• Pangutan-a ang hygienist sa ngalan sa iyang anak nga lalaki.

• Sultihi siya nga mag-ampo ka alang kaniya.

• Pag-ampo alang kanila sumala sa ilang ngalan.

Pinaagi niining murag yano nga panag-istoryahanay, nabati nako ang akong kabug-at nga nahimong usa ka panalangin. Nakahunahuna ko og kadali kon sa unsang paagi ang akong mga pakigsaad mitabang kanako sa paghigugma sa Langitnong Amahan ug sa akong silingan. Ang Espiritu mitudlo kanako nga ang pagtambong sa templo sama ra sa pagtabang sa uban niini nga habig sa tabil kay kini mahitungod sa paglig-on kanako ug sa akong mga katigulangan sa espirituhanon nga paagi.

Ang mga pagsirado sa templo wala mipugong sa akong espirituhanon nga paglambo. Hinuon, kini mitugot kanako sa paghimo og bag-o nga mga paagi sa pag-apil diha sa buhat sa Dios ug makadawat og langitnong gugma, kahayag, ug kahibalo.