Digital Lamang: Mga Young Adult
Pagkaplag nga Nahisakop Pag-usab diha sa Templo
Wala na ko makaadto sa templo sa daghang katuigan, apan ako midangop ngadto sa Manluluwas aron tabangan ko nga mamahimong takos sa pagsulod pag-usab.
Gilitratohan ni Megan Barnum
Nagbarog ko diha sa pasilyo [foyer] samtang ang ikaduhang magtatambag sa bishopric mihangyo nako nga mamulong sa miting sa sakramento kabahin sa kaimportante sa mga templo. Ang akong mga mata nagtan-aw sa ubos ug namula ang akong mga aping nga mibati og kaulaw, mihangyo ko og lahi nga hilisgotan nga ipamulong. Wala na ko nakatambong sa templo og pipila ka tuig tungod sa mga pagpili sa kinabuhi nga nakapabulag kanako gikan sa akong Langitnong Amahan, ug ako wala mobati nga sarang sa pagpamulong kabahin sa templo.
Human niana nga kasinatian, ang templo nagsige og santop sa akong hunahuna, ug akong gibati ang nagkadako nga tinguha nga maanaa didto apan nakigbisog usab sa mga pagbati sa pagkadili takos. Ako mibati og kahadlok nga ang Langitnong Amahan dili gusto nga ako anaa sa Iyang sagrado nga balay.
Paghimo og Lakang sa Pag-usab
Samtang nagsingabot ang komperensiya, gikulbaan ko nga naminaw ngadto sa mga mamumulong, nanghinaot nga ako mobati og pipila ka timailhan nga ang Dios nahigugma pa gihapon nako bisan pa sa akong mga kasaypanan. Mao kadto sa dihang si Presidente Dieter F. Uchtdorf, Ikaduhang Magtatambag sa Unang Kapangulohan, miingon: “Dili igsapayan unsa ka guba ang atong kinabuhi. It matters not how scarlet our sins, how deep our bitterness, how lonely, abandoned, or broken our hearts may be. … Walay kinabuhi nga hilabihan ang pagkahugno nga dili na mahimong mapahiuli.”1
Klaro kaayo nakong gibati nga ang Dios namulong kanako. Ako naghunahuna sulod sa pipila na ka bulan kon unsaon sa pagbalik ngadto ni Kristo, ug kadto nga mensahe sa komperensiya mao ang Iyang tawag ngari kanako aron sa paghimo og mga kausaban aron makasulod pag-usab sa Iyang balay.
Nakigkita ko sa akong bishop aron hisgotan ang pagsulod og usab sa templo. Siya mitabang kanako nga makasabot sa papel ni Jesukristo diha sa akong kinabuhi ug sa unsang paagi ang pagdawat sa Iyang Pag-ula makatabang nako sa paghatag sa akong palas-anon sa kasakit ug sala ngadto Kaniya. Misugod ko sa pag-ampo alang sa panabot, kalig-on, ug pailob sa akong kaugalingon. Pinaagi sa pagsalig sa Dios og dugang pa ug paghimo og dugang pa nga kamaayo sa matag adlaw, ako sa hinay-hinay nakonektar og balik sa kahayag sa Manluluwas.
Ang pakigtambayayong uban sa akong bishop ug pagkat-on og dugang pa kabahin sa akong Manluluwas nakapalawom sa akong pagpamatuod sa akong pagkatawo isip usa ka anak nga babaye sa Langitnong Amahan. Akong nasabtan nga ang akong mahigugmaong Manunubos dili gayod mohangyo kanako nga ibulag ang akong kaugalingon gikan Kaniya, apan nga si Satanas mosulay sa paghimo kanako nga mobati nga daw ako wala nahisakop diha sa templo. Uban niining kahibalo, ako sa kataposan mibati nga andam na sa pagsulod og usab sa balay sa Dios.
Pagbalik ngadto sa Templo
Dala ang usa ka bag-o kaayong gipilo nga rekomend nga akong gigunitan, milakaw ko padulong sa templo sa unang higayon sa mga katuigan, kalit lang nga mabalak-on kabahin sa akong dapit diha sa balay sa Dios. Nagkaduol ko sa mga pultahan nagkadako ang akong gibati nga kawalay kasiguroan. Mura ba ko og boang tan-awon nga wala masayod kon asa moadto o unsay buhaton? Tigulang na ba ko kaayo aron moadto sa templo alang sa mga bunyag?
Ang lalaki diha sa front desk mipahiyom samtang ako misulod, mi-welcome kanako ngadto sa templo. Kadtong buntaga nakapalagsik sa akong espiritu samtang ang mga worker sa templo mipasalig kanako sa akong dapit diha sa balay sa Dios.
Sa akong pagbiya sa templo, usa sa mga worker mibabay kanako samtang naglakaw ko sa hawanan padulong mogawas sa bunyaganan [baptistry]. Inubanan sa pinahunghong, malipayon nga tingog miingon siya, “Salamat sa pag-anhi sa templo karon—kami nagkinahanglan nimo dinhi!” Ako misaad kaniya nga mobalik ko sa sunod semana kay ako naglantaw nga mabati pag-usab ang kamainiton diha sa templo.
Tungod sa atong balaanong pagkatawo isip mga anak nga babaye ug mga anak nga lalaki sa langitnong mga ginikanan, matag usa kanato makakaplag nga nahisakop diha sa templo. Walay butang nga permanenting makapahilayo kanato sa mahigugmaong pagtabang sa Dios kon kita magtinguha nga maanaa sa Iyang presensiya. Siya gusto nga adto kita didto, ug kon kita mohimo og ginagmayng mga lakang aron mas mahisama sa atong Manluluwas sa matag adlaw, kita makapahiuyon sa atong kinabuhi sa Iyahang kinabuhi ug kanunayng magpabilin nga takos sa templo. Ako nasayod nga tungod sa Pag-ula ni Jesukristo, kita makasulod sa balaan nga balay sa Dios ug modawat sa mga panalangin nga nagpaabot alang kanato diha sa sulod, ug, sama sa akong nasinati, kadtong mga panalangin angay sa tanang butang.