O Faamanuiaga o le Tausia o le Aso Sapati ia Paia

Ina ua uma ona faalogologo i le tele o lesona matagofie e uiga i le tausia o le aso Sapati ia paia, sa matou faia se faaiuga faaleaiga o se tasi o tulafono a lo matou aiga o le a i ai o le tausia lea o le aso Sapati ia paia.

O le tausia o poloaiga a le Alii e oo mai ma se valaaulia ia “tofotofo mai ia te a’u i lenei mea” (Malaki 3:10). Ioe, sa tofotofoina i matou, ma sa matou mananao e faamautinoa atu i le Alii ua matou talitonu. I se tasi Aso Sa i le mae’a ai o le lotu, sa valaauina ai lo ma’ua afafine o lē sa i ai i le tausaga faauu i le aoga tulagalua, e lona faiaoga e sau i le aoga.

Sa i ai le faiaoga i le potuaoga ma isi tamaiti aoga o loo sauni mo se tauvaga a le motu atoa i le taeao o le Aso Gafua. Na faamalamalama atu e lo ma afafine i lona faiaoga o se tasi o tulafono a lo matou aiga o le lē faia lea o ni meaaoga i le Aso Sa. Na manao le faiaoga e talanoa i lo’u toalua, o lē na fai atu foi lea faamatalaga. Ona manao lea o le faiaoga e talanoa mai ia te a’u. Ioe, sa ou fai atu foi le manatu lava lea e tasi. Sa lē fiafia o ia. Na ia fai mai e talitonu foi o ia i le tausia o le aso Sapati ia paia, ae o se tauvaga tāua tele lenei ma na manaomia le lelei o tapenaga ia manumalo ai. Sa ou ta’u atu ia te ia ou te malamalama i le tāua o le tauvaga ae o le tausia o le aso Sapati ia paia e sili atu lona tāua ia i matou. Sa ia tuu i lalo le telefoni ma tuua ai a’u ua lē gagana.

I le taeao o le Aso Gafua na fefe lo ma afafine e alu i le aoga lea o le a la faafesagai ai ma le faiaoga. Na momoli o ia e lo’u toalua i le aoga ma iloa ai ua tuua e le faiaoga lo ma afafine. Na momoli atu o ia e lo’u toalua i le nofoaga e fai ai le tauvaga lea na faatasi atu ai lo’u afafine i tamaiti o lana vasega. E le’i manumalo lo’u afafine i lena aso, ae na o ia lava le tamaitiiti aoga mai lana vasega na manumalo i se faailoga.

Na faamanatu atu e le Alii ia Isaraelu e: “Manatua le aso sapati e te faapaiaina.

“O aso e ono e te galue ai, ma fai ai au galuega uma lava:

“A o le aso fitu o le sapati lea ia Ieova lou Atua: aua e te fai ai se galuega e tasi, o oe, ma lou atalii, ma lou afafine, o lau auauna tane, ma lau auauna fafine, o au manu foi, ma le tagata ese o loo mau ma oe” (Esoto 20:8–10).

Ona faamalamalama mai lea e le Alii le mafuaaga. “Aua na faia e Ieova i aso e ono o le lagi ma le lalolagi, atoa ma le sami, ma mea uma lava o i ai, ona malolo ai lea o ia i le aso fitu; o le mea lea na faamanuia ai e Ieova le aso sapati, ma na faapaiaina ai” (Esoto 20:11).

O le sāvali lava lea e tasi na faasoa mai e le perofeta o Apinati i le Tupu o Noa ma ana faitaulaga. (Tagai Mosaea 13:16–19.) Ua aoao mai le Alii i le Mataupu Faavae ma Feagaiga 59:13, “Ma i le aso lenei, aua neʼi e faia ai se isi lava mea, tau lava o le saunia o au meaai ma le manatu tasi o le loto ina ia atoatoa lau anapogi, po o, i ni isi upu, ina ia atoatoa lou olioli”.

I le fuaiupu 16 o loo faapea mai, “E moni Ou te fai atu, o le tulaga e oo i ai la outou faia o lenei mea, e ā outou le atoatoa o le lalolagi”.

I upu a lo tatou Perofeta pele, o Elder Russell M. Nelson, i lana saunoaga i le Konafesi Aoao o Aperila 2015, “O Le Sapati o se Aso Fiafia”, na ia saunoa ai: “Na avea le Sapati ma se aso mo le faamalologa faaletagata lava ia. Na saunia e le Aso Sa lena toomaga sa sili ona manaomia”.

Na ia faaauau, “O le a le uiga o le fetalaiga a le Faaola ina ua Ia fetalai mai “ua faia le sapati mo tagata, a ua lē faia tagata mo le sapati? (Mareko 2:27). Ou te talitonu na finagalo o Ia ina ia tatou malamalama o le Sapati o Lana meaalofa lea ia i tatou, faatagaina le malologa moni mai faigata o le olaga i aso taitasi ma le avanoa mo le toefaafouina faaleagaga ma faaletino. Na tuuina mai e le Atua ia i tatou lenei aso faapitoa, e le mo mea faafiafia po o galuega o aso taitasi ae mo se malologa mai tiute, faapea foi i le faaletino ma le faaleagaga”.¹

Tau ia tatou manatua pea le tausia o le aso Sapati ia paia. Ia tatou manatua foi na faamanuia ma faapaiaina e le Alii Lava Ia le aso mo i tatou, o Ana fanau, e malolo ai mai a tatou galuega uma. O Ia o le Atua o le atulaulau; na Ia faatuina le Sapati ma na Ia faia o Ia lava ma faataitaiga ola e ala i le malolo mai Ana galuega uma. O se aso paia ia te Ia, ma e tatau foi ona avea o se aso paia ia i tatou.

Ou te molimau atu o le aso Sapati o le meaalofa lea a le Alii ia i tatou, o se faailoaga moni o Lona mamā ma le alofa e lē mavae. O i latou e filifili e fai mea uma e gata ai le mafai ina ia tausia ai lona paia o le a lē gata ina vaaia ni vavega ae o le a selesele foi i faamanuiaga, folafolaina matagofie.