Auaunaga ma le Loto Gaua’i

I Lona soifuaga atoa, sa naunau Iesu Keriso e ositaulaga le talafeagai ma le mafanafana ina ia mafai ai ona auauna atu i isi. E leai se isi mea na sili atu ona manino ai lenei mea nai lo le Faatoaga o Ketesemane ma le taimi o mea na tutupu e tau atu i Lana taulaga i luga o le satauro. Sa gaua’i atu le Faaola i le finagalo o Lona Tama. Sa naunau o Ia e ositaulaga o ia lava mo isi, e aofia ai le faomea i Ona autafa, o fitafita agaleaga, ma tagata sa teena o Ia (tagai Luka 23:34, 39–43).

Ata

o le Faasatauroga o Keriso

O Le Faasatauroga o Keriso, faaaloaloga a le Falemataaga o Talafaasolopito o le Ekalesia

Taulaga ma le Gaua’i Atu i le Auaunaga

O le aoao e gaua’i atu o tatou loto i le Atua o se vaega tāua o le auaunaga auā o se vaega tāua o le avea e faapei o Ia. E lē gata ina fesoasoani ia i tatou e ausia ai o tatou gafatia atoatoa, ae e mafai ai foi ona sili atu lo tatou gafatia e faamanuia ai isi.

“O le tuuina atu o le loto o se tasi i le Atua o le faailoga o le laasaga mulimuli i lo tatou tuputupu a’e faaleagaga,” na aoao mai ai Elder Neal A. Maxwell (1926–2004) o le Korama a Aposetolo e Toasefululua. “Pau lava lea o le taimi e amata ai ona atoatoa lo tatou aogā i le Atua! E faapefea ona tatou tatalo faamaoni e avea ma meafaigaluega i Ona aao pe afai o loo saili le meafaigaluega e fai atu e ia le faatonuga?”¹

O tatou naunau ea e fai ni tofiga pe mulimuli i uunaiga e auauna atu, e tusa lava pe lē talafeagai? O tatou loto ea e gaua’i atu i le finagalo o le Atua ma ositaulaga o tatou taimi ma taleni e faamanuia ai isi o loo manaomia i tatou, e tusa lava pe na latou faia se mea sese ia i tatou i le taimi ua tuanai? Afai tatou te tali atu e pei ona faia e le Faaola, faatasi ma le ositaulaga ma le gaua’i atu, e leai se mea e poloaiina ai i tatou e fai o le a lē mafaia (tagai Mareko 14:36; Ioane 19:30).

A oo ina tatou iloa le Faaola, o le a sili atu ona tatou iloa le mea e tatau ona tatou faia e auauna atu ai i Lona tulaga. E faapefea ona tatou atiina a’e le uiga faa-Keriso o le loto gaua’i?

1. E mafai ona tatou manatua mea uma na faia e le Atua mo i tatou. Ma e mafai ona tatou manatua ona ua tuuina mai e le Atua ia i tatou mea uma ua tatou maua, o le gaua’i atu o ō tatou loto i Lona finagalo ua na o le pau lea o le mea e ā tatou moni e avatu ia te Ia.²

2. E mafai ona tatou anapopogi ma tatalo mo se loto gaua’i (tagai Alema 13:28; Helamana 3:35).

3. A o tatou lagonaina uunaiga a le Agaga Paia, e mafai ona tatou tautino atu e gaua’i atu ma mulimuli i ai e lē aunoa (tagai Mosaea 3:19).

4. E mafai ona tatou iloiloina ma le faamaoni o tatou olaga ma talia le aoaiga a le Agaga. Mafaufau i le fesili lenei mai ia Peresitene Russell M. Nelson:

   1. “O e loto e avea le Atua ma faatosinaga sili ona tāua i lou olaga?”

   2. Pe o le a e faatagaina Lona siufofoga ia faamuamua i loo se isi lava leo?”

   3. “O e loto e faataga soo se mea o finagalo o Ia e te faia ia faamuamua i loo isi faamoemoega uma?”

   4. O e loto e tofatumoanaina lou loto i Lona finagalo?”³

5. Tautino atu ma faia ni fuafuaga e aveese ai soo se mea i lou olaga ua faamuamua i le finagalo o le Atua. Pe a tatou ositaulaga mo Ia, e faamanuiaina i tatou.⁴