E Na’o Tusiga Faatekinolosi: Talavou Matutua
Faalogoina Patino o le Siufofoga o le Agaga
E fetalai mai le Tama Faalelagi ma Iesu Keriso ia i tatou i ni auala eseese—e faalagolago ia i tatou le aoao ia iloa le siufofoga o le Agaga.
Ata pu’e mai faaaloaloga a le tusitala
E finagalo le Tama Faalelagi ma Iesu Keriso i se sootaga loloto, patino ma i tatou taitoatasi, ma La te silafia le tele o mea e uiga ia i tatou—e oo lava i o tatou uiga faaletagata—ua la iloa tonu le ala e aapa mai ai ia i tatou. Ou te talitonu e masani ona La auina mai le Agaga e fesootai mai ia i tatou i auala e sili ona tatou fiafia i ai (tagai le 2 Nifae 31:3).
O le suesue i mataupu tau i le mafaufau, ua ou aoaoina ai le tele o mea e uiga i uiga faaletagata. E eseese uma lava le mauaina ma le faagaoioia o faamatalaga e tagata uma. Ma atonu foi o lenei mea e faatatau i le ala tatou te lagonaina ai foi le Agaga.
E eseese auala e lagona ai le Agaga Paia ma maua ai tali. Mo se faataitaiga, na lipoti mai Enosa, “Faauta, na oo mai le siufofoga o le Alii i lo’u mafaufau” (Enosa 1:10). Ua aoao mai Paulo e oo mai le Agaga o ni lagona o le “alofa, olioli, filemu, onosai, mataalofa” (Kalatia 5:22; tagai foi fuaiupu 23). Ma sa iloa e Iosefa Samita sa ia mauaina faaaliga ona o se manatu patino “sa i ai i lona mafaufau, ma fetaomi o ia lava i luga o ona lagona e sili ona malosi” (Mataupu Faavae ma Feagaiga 128:1).
I le mafaufau ai i le fautuaga a perofeta e saili le Agaga, ou te mafaufau lava i taimi uma pe mafai faapefea ona ou faailoaina Lona siufofoga i lo’u olaga ma pe afai e fetalai mai o Ia ia te a’u i se auala e faapitoa le tulaga ese ia te a’u.
Aoao ia Iloa le Agaga
O le tuputupu ae sa ou manatu o le Agaga e nao se leo tautala ai, lea na ou manatu ai e toalaiti lava ni tagata na faamanuiaina e faalogoina lena leo. O lea la, ina ua ou feiloai i faifeautalai ma taliaina la latou valaaulia e tatalo i le Tama Faalelagi mo se faamautinoaga e moni le talalelei, sa ou faamoemoe e faalogo i se leo e mafai ona logonaina. Ma sa ou le fiafia ina ua ou le logonaina. E ui lava sa ou lagonaina e moni le la savali, ae sa ou musu lava e papatiso aua ou te lei faalogoina le siufofoga o le Agaga.
A o papatisoina tagata o lo’u aiga ma tuuina atu molimau, sa ou lagonaina e pei ou te le o faia se mea sao, ona sa lei “fetalai mai” le Tama Faalelagi ia te a’u. Ina ua o atu lo’u tina ma lo’u uso matua i le malumalu, sa ou maua se lagona malosi o le malumalu o le maota moni lava o le Alii ma e tatau ona ou saunia e alu iina i se aso. Ae ou te lei iloaina lava o ou lagona o ni uunaiga mai le Agaga.
I se tasi aso sa ou faitau ai mai le Tusi a Mamona faatasi ma faifeautalai, ma sa ou maua se lagona malosi o le mea sa matou faitauina e moni. Sa ou ta’u atu i alii faifeautalai le mea sa ou lagonaina, ma sa la fesoasoani mai ia te a’u ia ou malamalama o le molimau sa ou lagonaina o le Agaga Paia lea na fetalai mai ia te a’u. I lena taimi, sa ou iloa ai sa ou lagonaina le Agaga i le tele o auala, ae ou te lei mafaufauina e eseese lava auala e talanoa mai o Ia ia i tatou uma. Sa ou taliaina le valaaulia e papatisoina i lena aso.
O le I Ai o le Agaga i Lo’u Olaga
O le toatele o i tatou atonu e faigata ona lagonaina le Agaga pe iloa pe o fetalai mai o Ia ia i tatou. Ae afai tatou te aoao e uiga i auala eseese e fesootai mai ai o Ia ia i tatou ma ole atu i le Tama Faalelagi mo se fesoasoani, o le a mafai ona tatou iloa uunaiga, e tusa lava pe ese lo latou oo mai nai lo le mea sa tatou faamoemoeina.
Ua ou matauina lena mea mo au, o uunaiga e oo mai lava i taimi uma i o’u lagona. E oo lava ae ou te lei auai i le Ekalesia, sa ou maua i taimi uma se lagona mamana e moni le talalelei. Ou te manatua lo’u auai i le sauniga faamanatuga mo le taimi muamua ma lagonaina le filemu, lea ua ou iloaina nei o le Agaga.
E ui lava ua ou iloaina e tele taimi e talanoa mai ai le Agaga ia te a’u e ala i ou lagona, ae o loo ou aoao pea i le auala e iloa ai Lona i ai i lo’u olaga i aso taitasi.
Ua tuuina mai e Peresitene Russell M. Nelson ni fautuaga i auala e saunoa mai ai le Agaga ia i tatou: “Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A o e faiso’oa lenei faagasologa i lea aso ma lea aso, masina ma lea masina, tausaga ma lea tausaga, o le a e ‘ola ai i le mataupu faavae o faaaliga’ [Aoaoga a Peresitene o le Ekalesia: Iosefa Samita (2007), 132].”1
A o tatou taumafai e iloa le Agaga, e mafai ona tatou manatua e na te silafia i tatou ma fetalai mai ia i tatou taitoatasi. Afai tatou te ola agavaa mo Lana mafutaga ma faatino le faatuatua ia Iesu Keriso, o le a mafai ona tatou iloa Lona siufofoga ma faatagaina o Ia e taiala i tatou.